જાપાનની જડીબુટ્ટીની કમાલ, પીરિયડ્સમાં દુખાવાથી રાહત મળશે:ગુજરાતની કંપનીએ એવી ટેબ્લેટ બનાવી કે દુનિયા દંગ રહી જશે, હેવી બ્લીડિંગ અને મૂડ સ્વિંગ નહીં થાય

અમદાવાદની 22 વર્ષની રિયા દર મહિને અમૂક દિવસો દરમિયાન સૂનમૂન થઇ જાય છે. તેનું મન ક્યાંય લાગતું નથી. પરિવારમાં કોઇ સાથે સરખી વાતચીત નથી કરતી. આખો દિવસ ઉદાસ થઇને બેસી રહે છે. કંઇક આવી જ હાલત સુરતની 26 વર્ષની શ્રેયાની પણ છે. એક ખાનગી કંપનીમાં નોકરી કરતી શ્રેયાના કલીગ્સ તેના હસમુખા સ્વભાવના ફેન છે. હંમેશા બધા સાથે મસ્તી કરતી નટખટ સ્વભાવની શ્રેયાનો મૂડ મહિનાના અમૂક દિવસોમાં સાવ બગડી જાય છે. ઉપર જેની વાત કરી તે શ્રેયા અને રિયાના પાત્રો ભલે કાલ્પનિક છે પણ આવી સ્થિતિ વાસ્તવિક છે. દુનિયાનો કોઇ પણ ખૂણો હોય કે પછી કોઇ પણ પરિવાર હોય. સ્ત્રીના રંગ, રૂપ, ભાષા કે કદ ભલે અલગ હોઇ શકે પણ મહિનામાં એકવાર પીરિયડ્સ દરમિયાન થતી અસહ્ય પીડા, હેવી બ્લીડિંગ, મૂડ સ્વિંગ્સ અને હિમોગ્લોબિન ઓછું થવાની શારીરિક તકલીફો તો વિશ્વની દરેક મહિલાઓ માટે માથાના દુખાવા સમાન છે. મહિલાઓ માટે પીરિયડ્સમાં માત્ર પેઇન કિલર સિવાય કોઇ કાયમી ઉકેલ નહોતો પરંતુ આ પરિસ્થિતિને જડમૂળથી બદલવા માટે ગુજરાતની ક્લેપ્સ કંપનીએ વિવિધ રિસર્ચ કરીને ક્લેપ્સ ફેમિના નામની ટેબ્લેટ તૈયાર કરી છે. જે મહિલાઓની આ સમસ્યામાં કારગત સાબિત થશે તેવો દાવો છે. આ ક્લેપ્સ ફેમિના ટેબ્લેટ શું છે? મહિલાઓને પીરિયડ્સ દરમિયાન કેવી રીતે રાહત આપશે? આ ટેબ્લેટમાં કેવા કેવા ઇન્ગ્રિડિયન્સ છે? આ તમામ સવાલો અંગે દિવ્ય ભાસ્કરે ક્લેપ્સ કંપનીના મેનેજિંગ ડાયરેક્ટર બૃહસ્પતિ ત્રિપાઠી અને ડાયરેક્ટર અવધેશ દુબે સાથે ખાસ વાતચીત કરી હતી. મહિલાઓના 'એ દિવસો' અંગે શું કહે છે અલગ અલગ રિપોર્ટસ વર્લ્ડ હેલ્થ ઓર્ગેનાઇઝેશન, નેશનલ ફેમિલી હેલ્થ સર્વે-5 અને અમેરિકન કોલેજ ઓફ ઓબ્સ્ટેટ્રિશિયન્સ એન્ડ ગાયનેકોલોજિસ્ટ્સના અલગ અલગ રિપોર્ટ પ્રમાણે વિશ્વમાં 20% થી 30% મહિલાઓ પીરિયડ્સ દરમિયાન હેવી બ્લીડિંગથી પીડાઇ રહી છે. 75% થી 80% મહિલાઓમાં ચીડિયાપણું અને ચિંતા જોવા મળે છે. 50% થી 90% મહિલાઓ અને બાળકીઓ પીરિયડ્સનો અસહ્ય દુખાવો અનુભવે છે. જ્યારે લો હિમોગ્લોબિન એટલે કે એનેમિયાથી વિશ્વમાં 30% અને ભારતમાં 57% મહિલાઓ પીડાઇ રહી છે. બૃહસ્પતિ ત્રિપાઠીએ દિવ્ય ભાસ્કરને કહ્યું, માર્કેટમાં જોઇન્ટ, લિવર, ઓર્થો, એનિમિયાથી માંડીને શરીરના દરેક પાર્ટ માટે અલગ અલગ પ્રકારની દવાઓ મળે છે. મહિલાઓને પીરિયડ્સ અને મેન્સ્ટ્રુ્અલ પેઇન થાય છે સાથે જ હેવી બ્લીડિંગના કારણે તેમનું હિમોગ્લોબિન પણ લો થાય છે તેના માટે પેઇન કિલર સિવાય કોઇ પણ દવા માર્કેટમાં નહોતી એટલે અમે આ દિશામાં કામ કરવાનું શરૂ કર્યુ. આ દવા બનાવવાનો વિચાર કેવી રીતે આવ્યો? 2023-24નું વર્ષ હતું. આ દરમિયાન સાણંદ GIDCમાં કંપનીની દવાઓ બનાવવાનો પ્લાન્ટ નાખ્યો હતો. તેમણે કહ્યું કે, નવો પ્લાન્ટ સ્થાપવા સાથે એક વિચાર આવ્યો કે આપણે મહિલાઓ માટે એવી કઇ દવા બનાવીએ જેથી તેમને મદદરૂપ થઇ શકાય. પહેલેથી એ નક્કી હતું કે મહિલાઓ માટેની જ દવા તૈયાર કરવી છે એટલે અમે માર્કેટમાં રિસર્ચ કરવાની શરૂઆત કરી સાથે જ સર્વે પણ કર્યો. અમે વિચાર્યું કે એવી દવા લાવીએ જે બજારમાં ઉપલબ્ધ ન હોય અને એકદમ યુનિક હોય સાથે જ એ દવાથી મહિલાઓને કોઇ આડઅસર પણ ન થાય એટલે અમે આ દવા બનાવવાના પ્રયત્નો શરૂ કર્યાં. દવા માટે મહત્વની 'જડીબુટ્ટી' જાપાનથી મળી દવામાં કેવા પ્રકારના ઇન્ગ્રિડિયન્સ હોવા જોઇએ તે જાણવા માટે લગભગ છ મહિના સુધી વૈજ્ઞાનિકોની મુલાકાત લીધી હતી અને માહિતી મેળવી હતી. તેઓ કહે છે કે, અમે 100 પેજનું ઇન્ગ્રિડિયન્સનું એક લિસ્ટ પણ બનાવ્યું હતું. અમે ડોક્ટરના પણ ફિડબેક લઇ રહ્યાં હતા કે આ પ્રકારની દવા બનાવવા માટે શું-શું કરવું જોઇએ. એ પછી અમે તેમાંથી કેટલાક ઇન્ગ્રિડિયન્સ નક્કી કર્યા. આ માટે અમે ભારતમાં તેની શોધ શરૂ કરી. તેમાંથી કેટલાક ભારતમાંથી મળી ગયા એ પછી બાકીના ઇન્ગ્રિડિયન્સ માટે અમે યુરોપ ગયા. એ પછી જાપાનના મારા મિત્રએ ત્યાંના એક વૈજ્ઞાનિક સાથે મુલાકાત કરાવી. આ દરમિયાન અમે વાતચીત કરી તો તેમની પાસેથી સૌથી મહત્વનું ઇન્ગ્રિડિયન્સ અમને મળી ગયું. જે આ દવા માટે ખૂબ જરૂરી હતું. 25 મહિલાઓને દવા આપી બધા ઇન્ગ્રિડિયન્સ મળ્યાં પછી શું કર્યું તેની વાત કરતા તેઓ કહે છે કે, ફાઇનલી ટેબ્લેટ ફોર્મમાં આ દવા બનાવવામાં સફળતા મળી. એ પછી આ દવાની સ્ટેબિલિટી ચેક કરી અને લેબ ટેસ્ટ પણ કર્યો. જેમાં અમને સફળતા મળી. જે બાદ અમે સેલ્ફ ટેસ્ટિંગ માટે 25 જેટલી મહિલાઓને આ દવા આપી હતી. મહિલાઓએ દવા લેવાનું શરૂ કર્યું પછી તેમનામાં ખૂબ સારું પરિણામ જોવા મળ્યું પણ આ દવાને હું કોઇપણ મહિલાને લેવાનું કહું કે પછી કોઇપણ ડોક્ટરને કહું તો તેમને અમારા પર ભરોસો ન આવે એ સ્વાભાવિક છે. એટલે અમે આ દવાનું ક્લિનિકલ ટ્રાયલ ગુજરાતની શ્રેષ્ઠ કંપની પાસે કરાવડાવ્યું. ક્લિનિકલ ટ્રાયલ વખતે શું ધ્યાને રાખ્યું? કંપનીએ 11થી 45 વર્ષની 128 જેટલી મહિલાઓ પર ક્લિનિકલ ટ્રાયલ કરાવડાવ્યો. જેમાં 2 અલગ-અલગ કેટેગરી રાખી હતી. બૃહસ્પતિ ત્રિપાઠી જણાવે છે કે, પહેલી કેટેગરી 11 થી 20 વર્ષની યુવતીઓની હતી. જ્યારે બીજી કેટેગરી 21 થી 45 વર્ષની મહિલાઓની હતી. આ 2 ગ્રુપ પણ એટલા માટે બનાવ્યા કારણ કે 11 થી 20 વર્ષની ઉંમરમાં પીરિયડ્સ દરમિયાન યુવતીઓને ખૂબ વધારે દુખાવો થાય છે અને નબળાઇ વધારે હોય છે. જેથી અમને સાચું રિઝલ્ટ પણ મળે. તેમનો દાવો છે કે, 128 મહિલાઓની પીરિયડ્સની 3 સાયકલ દરમિયાન આ દવાનો 105 દિવસનો કોર્સ રાખીને ક્લીનિકલ ટ્રાયલ કરાવ્યો. જેમાં એક ગોળી સવારે અને એક ગોળી સાંજે આપવામાં આવી હતી જેમાં અમને ખૂબ જ એક્સ્ટ્રીમ પરિણામ મળ્યું. ક્લિનિકલ ટ્રાયલ દરમિયાન પહેલા મહિનાનું જે પરિણામ આવ્યું તેમાં મહિલાઓમાં સામાન્ય પ્રમાણ જ જોવા મળ્યું હતું. બીજા મહિનામાં પહેલા મહિના કરતાં ખૂબ જ સારું ઇમ્પ્રુવમેન્ટવાળું પરિણામ મળ્યું. જ્યારે ત્રીજા મહિનામાં ત્રણેય મહિનાની સાયકલ દરમિયાનનું પરિણામ મળ્યું. એ અમારા બધા પેરામીટર્સ કરતાં પણ ખૂબ સારું આવ્યું. ઓસ્ટ્રેલિયા, અમેરિકા, ઇંગ્લેન્ડમાં પણ વેચાશે કંપનીએ આ ફોર્મ્યૂલાની પેટન્ટ ફાઇલ કરાવી છે. સાથે જ 150 દેશો માટેના રાઇટ્સની પણ પેટન્ટ ફાઇલ કરાવી છે. તેઓ કહે છે કે, હવે આ દવા અમારા સિવાય વિશ્વમાં કોઇપણ કંપની નહીં બનાવી શકે. આ દવા ભારતીય બજારમાં તો ખૂબ જલ્દીથી લાવીશું પણ તેની સાથે સાથે કમ્બોડિયા, ફિલિપિન્સ, ઇથોપિયા સાથે એમઓયુ સાઇન કર્યા છે જ્યારે ઓસ્ટ્રેલિયા અને અમેરિકા સહિત ઇંગ્લેન્ડ સાથે એમઓયુની ફાઇનલ પ્રોસેસ માટેની પ્રક્રિયા ચાલે છે. ભારતની 10 કંપનીઓ સાથે વાતચીત આ દવા માટેના જરૂર સર્ટિફિકેટની વાત કરતાં ત્રિપાઠીએ જણાવ્યું કે, અમારી આ પ્રોડક્ટ ન્યુટ્રાસ્યુટિકલ છે. જેના માટે FSSAIનું સર્ટીફિકેટ ફરજિયાત લેવું પડે. અમે તે મેળવી લીધું છે સાથે જ GMP, હલાલ, ISO સહિતના ક્વોલિટી સર્ટીફિકેટ પણ લીધા છે. ક્લિનિકલ ટ્રાયલમાં મળેલી સફળતા બાદ અમે તેને મહિલાઓ માટે માર્કેટમાં લાવવાની તૈયારી કરી રહ્યાં છીએ. આ માટે અમે ભારતની ટોપ 10 કંપનીઓ સાથે વાતચીત કરી રહ્યાં છીએ. જેમાંથી કેટલાક સાથે કોન્ફિડેન્શિયલ એગ્રીમેન્ટ પણ સાઇન કર્યાં છે. દવા તૈયાર થયા બાદ તેમણે સૌથી પહેલો પ્રયોગ પોતાના મમ્મી પર કર્યો હતો. તેમણે કહ્યું, મારા મમ્મીની ઉંમર 80 વર્ષની છે. તેઓ લિવરસિરોસિસના છેલ્લા સ્ટેજમાં છે એટલે કે હાલમાં તેમનું લિવર કામ જ નથી કરતું. જેથી તેમનામાં હિમોગ્લોબિન બનતું નહોતું. અમે જ્યારે આ દવા આપી એ પહેલાં ચેક કરાવ્યું તો તેમનું હિમોગ્લોબિન 7% જેટલું જ હતું. જેના કારણે તેમને બ્લડ ચઢાવવું પડતું હતું. તેઓ ઊભા પણ નહોતા થઇ શકતાં પણ અમે 6 મહિનાથી તેમને આ દવા આપીએ છીએ. જેથી ખૂબ સારૂં પરિણામ જોવા મળ્યું. તેઓ આજે જાતે ઊભા પણ થઇ શકે છે અને હરી ફરી પણ શકે છે. કંપનીના ડાયરેક્ટર અવધેશ દુબેએ દિવ્ય ભાસ્કરને કહ્યું, અમારી આ દવાને અમે ખૂબ જ રિસર્ચ કરીને અને વિવિધ કોન્સેપ્ટને ધ્યાને રાખીને તૈયાર કરી છે. હાલ બજારમાં જે પ્રોડક્ટ છે એ મોટા ભાગે માત્ર પેઇન કિલર જ હોય છે. અમારો કોન્સેપ્ટ માત્ર મહિલાઓને પીરિયડ્સમાં થતાં દુખાવાને જ ઓછો કરવાનો નહીં તેની સાથે સાથે આ દરમિયાન થતાં તેમના પ્રોબ્લેમને પણ દૂર કરવાનો છે. પેટન્ટ અને FSSAI સહિતના જરૂરી ક્વોલિટી સર્ટિફિકેટ્સ મેળવી ચૂકેલી આ ગુજરાતી પ્રોડક્ટ હવે ગ્લોબલ માર્કેટમાં ધૂમ મચાવવા તૈયાર છે. જોકે, કંપનીનો આ દાવો પીરિયડ્સની પીડામાંથી મહિલાઓને મુક્તિ અપાવવામાં કેટલો કારગત નીવડે છે તે તો આગામી સમયમાં જ ખબર પડશે. નોંધ- આ રિપોર્ટમાં રજૂ કરવામાં આવેલી ક્લિનિકલ ટ્રાયલ્સ, પરિણામો અને પ્રોડક્ટ સંબંધિત તમામ વિગતો કંપનીના મેનેજિંગ ડાયરેક્ટર અને ડાયરેક્ટર દ્વારા આપવામાં આવેલા ઇન્ટરવ્યૂ પર આધારિત છે. દિવ્ય ભાસ્કર આ દાવાઓની તબીબી કે કાયદાકીય રીતે પુષ્ટિ કરતું નથી. આ રિપોર્ટ માત્ર માહિતી આપવાના હેતુથી પબ્લિશ કરાયો છે. આ માહિતીને તબીબી સલાહ કે સારવાર તરીકે ગણવી નહીં. કોઇપણ દવાનો ઉપયોગ કરતા પહેલાં ડૉક્ટરની સલાહ અચૂક લેવી.