સ્ત્રીની લાશના બ્લાઉસમાંથી મળી એક કાપલી:બહાર આવી 50 મહિલાઓને ભરખી જનારા સાયકો કિલરની સ્ટોરી, તાડીની દુકાનેથી શિકાર પસંદ કરતો

4 જાન્યુઆરી, 2021. શિયાળાની સવાર હતી. હૈદરાબાદ શહેરથી લગભગ ત્રીસ કિલોમીટર દૂર ઘાટકેસર વિસ્તારના અંકુશપુર ગામમાં એક પશુપાલક પોતાનાં પશુઓ લઇને રેલ્વેના પાટાને કિનારે કિનારે ચાલી રહ્યો હતો. અચાનક તેના પગ અટકી ગયાં. એની આંખો એક જગ્યાએ જઇને ચોંટી ગઈ. રેલવે ટ્રેકની પડખે આવેલી ઝાડીઓ પાસે એક મહિલાનો મૃતદેહ પડ્યો હતો. નજીકમાં કેટલીક બંગડીઓ, કાનની બુટ્ટી અને પાણીની બોટલ વગેરે વેરવિખેર પડ્યું હતું. તે માણસ થોડો નજીક ગયો અને ત્યાં એણે જે જોયું તેનાથી એક ચીસ તેના ગળામાં થીજી ગઈ. જે સ્ત્રીનો મૃતદેહ હતો તેનો ચહેરો બળી ગયો હતો. એટલી ખરાબ રીતે બળીને વિકૃત થઈ ગયો હતો કે ચહેરા પરથી કોઈ ઓળખ કરવી અશક્ય હતી. સામાન્ય માણસ જુએ તો ભયથી ફાટી પડે એવું આ દૃશ્ય જોઇને પશુપાલક સીધો પોલીસને સમાચાર પહોંચાડવા દોડ્યો. ચહેરો બાળી નાખેલી મહિલાની લાશ કોની હતી? આ સમાચાર ઘાટકેસર પોલીસ સુધી પહોંચ્યા. ફટાફટ પોલીસનો કાફલો ઘટનાસ્થળે પહોંચી ગયો, પરંતુ મહિલાનું નામ કે સરનામું શોધી શક્યા નહીં. પોલીસ પાસે હવે ત્રણ પ્રશ્નો હતા: આ મહિલા કોણ હતી? તે શહેરથી આટલે દૂર આ નિર્જન જગ્યા પર કેવી રીતે પહોંચી? અને જેણે તેને મારી નાખી તેણે તેનો ચહેરો બાળી નાખવાની તસ્દી કેમ લીધી? રસપ્રદ વાત એ હતી કે આ કિસ્સો લૂંટનો નહોતો, કારણ કે તે મહિલાનાં ઘરેણાં અને સામાન બધો જ અકબંધ હતો. ત્રીજા પ્રશ્નનો જવાબ સૌથી ભયાનક હતો: ખૂની ઇચ્છતો ન હતો કે તે મૃત શરીરનું નામ કોઇને ખબર પડે, કારણ કે નામ મળતાં જ ખબર પડી જાય કે તે છેલ્લે કોની સાથે જોવા મળી હતી. સ્ત્રીઓની જ હત્યા કરતા સાયકો કિલરની શૉકિંગ સ્ટોરી આજના ‘ખાખી કવર’માં વાત કરીએ હૈદરાબાદના એવી સિરિયલ હત્યાઓની જેમાં એક મહિલાની હત્યા પરથી અનેક સ્ત્રીઓની કરપીણ હત્યાઓનું રહસ્ય ખૂલ્યું. હત્યારાની વિકૃત વાસનાને કારણે આ કેસને ‘જેક ધ રિપર ઑફ ઇન્ડિયા’નું ટેગ પણ મળી ગયું હતું. મૃતક મહિલાના બ્લાઉઝમાંથી એક ફોલ્ડ કરેલી સ્લિપ મળી પોસ્ટમોર્ટમ દરમિયાન જ્યારે મહિલાના મૃતદેહનાં કપડાં કાઢવામાં આવ્યાં, ત્યારે તેના બ્લાઉઝની અંદરથી એક ગડી કરેલો કાગળ મળી આવ્યો. તેના પર એક મોબાઇલ ફોન નંબર લખેલો હતો, પરંતુ તે નંબર અધૂરો હતો. કેટલાક અંકો ચેકી નાખવામાં આવ્યા હતા. પોલીસે પહેલા ચેકી નાખેલી જગ્યામાં '0', પછી '1', પછી '2' ઉમેર્યા અને વન બાય વન નંબરો પર ફોન કરતા રહ્યા. અનેક પ્રયાસો પછી એક ફોન લાગ્યો, જેમાં પોલીસને લાગ્યું કે આ માણસ કંઇક જાણે છે. બીજી બાજુ, હૈદરાબાદના યુસુફગુડા વિસ્તારનો એક કડિયાકામ કરતો તથા કન્સ્ટ્રક્શન સાઇટ્સ પર માણસો સપ્લાય કરવાનું કામ કરતો હતો. પોલીસને લાગ્યું કે આ જ આપણો ખૂની છે, તેને દબોચી લઇએ એટલે કેસ સોલ્વ. મહિલાએ એક ફોન નંબર કાપલીમાં લખ્યો અને… પોલીસે તે માણસનું લોકેશન ટ્રેસ કરીને પિનપોઇન્ટ કર્યો અને ઉપાડીને પોલીસ સ્ટેશન લાવ્યા. પરંતુ પૂછપરછ શરૂ થતાં જ ક્લિયર થઈ ગયું કે તે ખૂની નથી. કડિયાકામ કરતા માણસે પોલીસને કહ્યું કે થોડા દિવસ પહેલાં એક મહિલા તેની પાસે કામ માગવા આવી હતી. કડિયાએ કહ્યું કે તે મહિલાને ફોન કરશે. મહિલાએ તેનો નંબર એક કાપલી પર લખ્યો અને તે જતી રહી. યાને કે મૃતક મહિલાના બ્લાઉસમાંથી મળેલી કાપલીમાં લખેલો આ નંબર ખૂનીનો નહોતો, બલકે એક મહિલાની પેટિયું રળવાની આશાનો હતો. પોલીસ હવે ફરી પાછી જ્યાંથી શરૂ કર્યું હતું ત્યાં આવી ગઈ. પરંતુ આ કડિયાએ પોલીસને એક એવી વાત કરી જેનાથી આખી તપાસનો દિશા જ બદલાઈ ગઈ. તેણે પોલીસને કહ્યું કે, એ સ્ત્રી તો ઘણા દિવસથી ગાયબ છે. તેની તપાસ કરી, પણ તે ક્યાંય મળી જ નહીં. પોલીસે ચેક કર્યું તો તે મહિલાના ગાયબ થયાની ફરિયાદ પણ હૈદરાબાદના જ્યુબિલી હિલ્સ પોલીસ સ્ટેશનમાં નોંધાયેલી હતી. સુપરસ્ટાર્સના એરિયામાં ધમધમતી તાડીની દુકાનો જ્યુબિલી હિલ્સ હૈદરાબાદનો પૉશ એરિયા છે. ચિરંજીવી, પ્રભાસ, અલ્લુ અર્જુન, નાગાર્જુન, વિજય દેવરકોંડા, જુનિયર NTR જેવા અનેક સુપરસ્ટાર્સ આ જ એરિયામાં રહે છે. તેની બાજુમાં આવેલો યુસુફગુડા અત્યંત ગીચ કમર્શિયલ એરિયા છે. ત્યાં IT પ્રોફેશનલ્સથી લઇને છૂટક મજૂરી કરતા લોકો સુધી અનેક પ્રકારના લોકો રહે છે અને કામ કરે છે. તેના અમુક ચાર રસ્તા પર વહેલી સવારે રોજમદારી કરીને છૂટક મજૂરી કરતા શ્રમિકો કામ શોધવા માટે ઉભા રહે છે. સાંજ પડ્યે આ વિસ્તારની અમુક ચોક્કસ પ્રકારની દુકાનોમાં આ જ શ્રમિકોની લાઇનો લાગેલી હોય છે. આ દુકાનોમાં તાડી મળે છે. તાડના ઝાડનો માદક રસ એટલે તાડી. સસ્તા ભાવે મળતો આ દેશી શરાબ આખો દિવસ શરીર તૂટી જાય એવી મજૂરી કરીને આવેલા શ્રમિક સ્ત્રી-પુરુષો પીને પોતાના શરીરનો થાક અને જીવનનાં દુઃખ ભૂલવાનો પ્રયાસ કરે છે. આથી રોજ સાંજ પડ્યે આવી તાડીની દુકાનો પર સ્ત્રી-પુરુષોની લાઇનો લાગતી હોય છે. એક મહિલા તાડી પીવા આવી અને ગાયબ થઈ ગઈ કવાલા વેંકટમ્મા નામની લગભગ 50 વર્ષની સ્ત્રી પણ તાડી લેવા આવેલા શ્રમિકોમાં સામેલ હતી. 30 ડિસેમ્બર, 2020ના રોજ સવારે તે ઘરેથી નીકળીને યુસુફગુડામાં એ જ તાડીની દુકાને ગઈ. ત્યાંથી પછી તે ક્યાં ગયા તે કોઈને ખબર નહોતી. બે દિવસ પછી કોવિડ-19ના ઓછાયા વચ્ચે 1 જાન્યુઆરી, 2021ના રોજ જ્યારે શહેરમાં નવા વર્ષની ઉજવણી થઈ રહી હતી, ત્યારે તેનો પતિ કવલા અંતૈયા જ્યુબિલી હિલ્સ પોલીસ સ્ટેશનમાં પોતાની પત્ની ગાયબ થઈ ગયાની ફરિયાદ નોંધાવવા બેઠો હતો. થોડા દિવસની અંદર આ જ પોલીસ સ્ટેશનમાં ગાયબ થયેલી બીજી સ્ત્રીનું નામ નોંધાયું. એક અજાણી લાશ, એક મિસિંગ રિપોર્ટ, એક નાનકડી કાપલી તપાસમાં એક વિચિત્ર અવરોધ પણ હતો. હૈદરાબાદ અને તેની આસપાસના વિસ્તારો ત્રણ અલગ અલગ પોલીસ કમિશનરેટમાં વહેંચાયેલા છે. જ્યુબિલી હિલ્સ હૈદરાબાદ શહેર પોલીસના નિયંત્રણ હેઠળ છે, IT વિસ્તાર સાયબરાબાદ નજીક છે, અને ઘાટકેસરનો પૂર્વ ભાગ રાચાકોંડા નજીક છે. આનો અર્થ એ થયો કે રાચાકોંડામાં એક અજાણી લાશ હતી, અને શહેરની બીજી બાજુ હૈદરાબાદ પોલીસ રજિસ્ટરમાં એક નામ હતું, પરંતુ કોઈને તેના વિશે ખબર નહોતી. એક્ચ્યુઅલી, આ બંને એક જ મહિલાની અલગ અલગ સ્ટોરી હતી, અને તે બંનેને જોડતો પુલ તે કાપલી હતી. ગાયબ થયેલી મહિલા કવાલા વેંકટમ્માના પરિવારને બોલાવવામાં આવ્યો અને તે બળી ગયેલા ચહેરાવાળા મૃતદેહ પાસે મળી આવેલી વસ્તુઓની ઓળખ કરવામાં આવી. હવે રેલવે ટ્રેક પાસેથી મળેલી અને ચહેરો બાળી મુકાયેલી લાશને નામ મળી ચૂક્યું હતું, પરંતુ આવું અત્યંત વિકૃત કારસ્તાન કોણે કર્યું તે હત્યારો હજુયે પોલીસથી ભાગતો ફરતો હતો. 500 CCTV કેમેરા, એક માસ્ક અને એક સિગારેટ ઇન્વેસ્ટિગેશનનો પહેલો પોઇન્ટ એ જ તાડીની દુકાન હતો. દુકાનની નજીક લગાવેલાં સીસીટીવી કેમેરાના કલાકોના ફૂટેજની તપાસ કરવામાં આવી. એક ફ્રેમમાં તે મહિલા જોવા મળી, પરંતુ તેની સાથે પણ બીજું કોઈ હતું. તે જ સમયે માસ્ક વડે ચહેરો ઢાંકેલો એક ઠીંગણો માણસ પણ દુકાનમાં હાજર હતો. આ કોવિડનો સમય હતો. આખો દેશ અને દુનિયા માસ્ક પહેરીને ફરતી હતી, એટલે કોઈ શખ્સ માસ્ક પાછળ પોતાનો ચહેરો ઢાંકીને ફરતો હોય તેમાં કોઇને કશું અજુગતું લાગ્યું નહીં. CCTV ફૂટેજમાં દેખાતું હતું કે વેંકટમ્મા તે દિવસે આ માણસ સાથે જ દુકાનમાંથી નીકળી હતી. પુરુષ સાથે જતી સ્ત્રી વાત કેમ નહોતી કરતી? પોલીસના કહેવા પ્રમાણે બંને જણાં યુસુફગુડાથી એક ઓટો-રિક્ષામાં ચઢ્યાં હતાં. તપાસની વિગતોમાં અમીરપેટ મેટ્રો સ્ટેશનના કેમેરાનો પણ ઉલ્લેખ છે, જ્યાં બંને ઉપ્પલ જતી ટ્રેનમાં ચઢતાં જોવા મળ્યાં હતાં. આ ફૂટેજમાં કંઈક વિચિત્ર વાત બહાર આવી: તેઓ આખી મુસાફરી દરમિયાન એકબીજા સાથે કશી જ વાત કરતાં નહોતાં. તેઓ અજાણ્યાઓની જેમ સાથે ચાલતાં હતાં. ફક્ત એક ક્ષણ માટે જ્યારે વેંકટમ્મા ટિકિટ સ્કેનર પર હતી, ત્યારે તેણે પેલા માસ્કવાળા માણસ સાથે થોડા શબ્દોની આપ-લે કરી, અને પછી તે બંને ફરીથી અજાણ્યા બની ગયાં. શું તે ઇરાદાપૂર્વક આવું કરી રહ્યો હતો જેથી કોઈને લાગે કે તેઓ સાથે નથી? પોલીસે તાડીની દુકાનથી અંકુશપુરના ટ્રેક સુધીના રૂટ પર લગભગ 500 કેમેરાના ફૂટેજની તપાસ કરી. લગભગ દરેક ફૂટેજમાં એક જ લોચો હતો. તે માણસ દેખાતો હતો, પણ તે કેમેરાથી બચતો રહ્યો, અને જ્યાં તે કેમેરાથી બચી શક્યો નહીં, ત્યાં તેનો ચહેરો માસ્ક પાછળ હતો. વક્રતાની વાત એ હતી કે તે માણસ અઢળક ફૂટેજમાં દેખાતો હતો, છતાં માસ્ક પાછળ હોવાને કારણે તેને ઓળખી શકાય તેમ નહોતો. સિગારેટ પીવા માટે માણસે માસ્ક હટાવ્યો ને દેખાયો એક ચહેરો અને પછી નસીબ બદલાયું. યુસુફગુડામાં એક ટિફિન સેન્ટરની બહાર કેમેરા ફૂટેજમાં એ જ માણસ ઊભો હતો. તેને સિગારેટ પીવી પડી હતી. નેચરલી, માસ્ક સાથે તો સિગારેટ પી ન શકાય, એટલે થોડી મિનિટો માટે તેણે પોતાનું માસ્ક ઉતાર્યું. બસ, એ જ ક્ષણે કેમેરામાં તેનો આખો ચહેરો કેપ્ચર થઈ ગયો. પોલીસ પાસે હવે એક ચહેરો હતો. તેનો ફોટો ત્રણેય એરિયાની કમિશનરેટને મોકલી દેવામાં આવ્યો. આશા હતી કે કોઈને તે તેમના રેકોર્ડમાં મળશે. અને થયું પણ એવું જ. હૈદરાબાદ ટાસ્ક ફોર્સના એક અધિકારીએ તેને તરત જ ઓળખી લીધોઃ અરે, આ તો મૈના રામુલુ છે! કોણ હતો મૈના રામુલુ? મૈના રામુલુ તેલંગણાના સંગારેડ્ડી જિલ્લાના કાંડી મંડળના અરુતલા ગામનો વતની હતો. તે વ્યવસાયે સ્ટોન કટરનું એટલે કે પથ્થર કાપવાનું કામ કરતો હતો. પોલીસ રેકોર્ડ પ્રમાણે તેનાં સંખ્યાબંધ નામો હતાંઃ મૈના રામુલુ, મૈનમ રામુલુ, બોટ્ટુ રામુલુ, રવિ અને તલારી સૈલુ. નામ બદલવાની આ આદત તેને વર્ષો સુધી તપાસથી બચવામાં મદદ કરતી હતી. તપાસની વિગતો અનુસાર તેના હાથ પર કોબ્રાનું એક ટેટૂ હતું, જે સંખ્યાબંધ નામો પાછળ રહેલા એક જ માણસની ઓળખ બન્યું. તાડીની દુકાનેથી સ્ત્રીઓને પકડીને શિકાર બનાવતો હેવાન પોલીસના જણાવ્યા મુજબ તેની મોડસ ઓપરેન્ડી મોટે ભાગે સમાન હતી. તે કામ કરવા માટે ચોક્કસ વિસ્તારમાં જતો, અને કામ વચ્ચે તે ખાલી પ્લોટ, અધૂરી ઇમારતો અથવા રેલ્વે ટ્રેકના ખૂણા જેવાં એકાંત સ્થળો શોધતો, ભટકતો. તે આ સ્થળો યાદ રાખતો. પછી તે તાડીની દુકાનો અને દારૂના બાર પર એકલી સ્ત્રીઓને શોધતો, તેમને મફત દારૂ અથવા સેક્સ બદલ પૈસાની લાલચ આપતો, અને તેમને પહેલેથી પસંદ કરેલાં એકાંત સ્થળોએ લઈ જતો. ત્યાં તેમની સાથે તે સેક્સ માણતો અને તેમના પર જાતીય ક્રૂરતા પણ આચરતો. તેમના પર બેફામ ક્રૂરતા આચર્યા પછી સાડી વગેરે કાપડથી તે સ્ત્રીનું ગળું દબાવીને તેને મારી નાખતો. એ પછી તે સ્ત્રી પાસે જે કંઈ નાની-મોટી રકમ, મોબાઇલ ફોન, પહેરેલા દાગીના વગેરે કાઢીને ત્યાંથી અંધારામાં ઓગળી જતો. ‘દારૂના નશામાં મારાથી હત્યાઓ થઈ ગઈ હશે!’ સૌથી શોકિંગ વાત એ હતી કે મૈના રામુલુ ઓલરેડી સજા પામેલો સિરિયલ કિલર હતો. સૌથી પહેલી હત્યા એણે છેક 2003માં કરી હતી. ત્યારે તે પકડાયો નહોતો. ત્યારબાદ વર્ષો સુધી હૈદરાબાદની આસપાસ મહિલાઓના મૃતદેહ મળી આવતા રહ્યા. તપાસ ચાલતી રહી છે. પરંતુ પોલીસ તેના સુધી પહોંચે ત્યાં સુધીમાં 2009નું વર્ષ આવી ગયું. ઓક્ટોબર 2009માં સાયબરાબાદ પોલીસે તેને શહેરની એક તાડીની દુકાનમાંથી પકડી પાડ્યો. તેની પાસેથી ચાંદીની પાયલ, બંગડી, વીંટી, એક નોકિયા ફોન અને બે મોટરસાયકલ સુદ્ધાં મળી આવી. તેનો ભોગ બનેલી તમામ વ્યક્તિઓ સ્ત્રીઓ હતી. સાત સ્ત્રીઓની હત્યા 2009માં પકડાયો ત્યાં સુધીમાં તે કરી ચૂક્યો હતો. પોલીસના ઇન્ટરોગેશનમાં એણે કહ્યું કે, ‘સાહેબ, મને આ હત્યાઓ વિશે કશું જ યાદ નથી, કારણ કે મેં તો તાડી અને દારૂના નશામાં આ હત્યાઓ કરી હશે.’ સ્ત્રીઓની હત્યા કરવાની એકેય તક છોડી નહીં પછીના બે વર્ષ અંદર-બહાર રહ્યો તેમાં હત્યાઓની સંખ્યા વધીને નવ થઈ ગઈ! 21 ફેબ્રુઆરી, 2011ના રોજ રંગારેડ્ડી ડિસ્ટ્રિક્ટ કોર્ટે આ કિલરને આજીવન કેદની સજા અને ૫૦૦ રૂપિયાનો દંડ ફટકાર્યો. તેને હૈદરાબાદની ચેરલાપલ્લી સેન્ટ્રલ જેલમાં મોકલી દેવાયો. આ સાયકો કિલરની સ્ટોરી અહીં જ પૂરી થવી જોઇતી હતી, રાઇટ? પરંતુ એવું થયું નહીં. બલકે આ તો ફક્ત શરૂઆત હતી. મેન્ટલ હોસ્પિટલની બારીની ગ્રિલ તોડીને ભાગ્યો કિલર જેલમાં સજા ભોગવી રહ્યો હતો ત્યારે રામુલુ અચાનક વિચિત્ર વર્તન કરવા લાગ્યો. પરિસ્થિતિ વધુ વણસી ત્યારે તેને એરાગડ્ડા મેન્ટલ હોસ્પિટલના જેલ યુનિટમાં દાખલ કરવામાં આવ્યો. પોલીસના જણાવ્યા અનુસાર તેને 1 ડિસેમ્બર, 2011 ના રોજ ત્યાં દાખલ કરવામાં આવ્યો હતો અને તે જ મહિને તે હોસ્પિટલની બારીની ગ્રિલ કાપીને પાંચ અન્ય કેદીઓ સાથે ભાગી ગયો! ભાગીને ફરી પાંચ સ્ત્રીઓની હત્યા કરી નાખી! આજીવન કેદની સજા પામેલો માણસ હવે છુટ્ટો હતો. બહાર આવીને તેણે જરાય સમય ગુમાવ્યા વિના એ જ કામ કર્યું જે તે વર્ષોથી કરતો હતો. તાડીની દુકાનોએ આંટાફેરા કરવાનું શરૂ કર્યું, એકલી સ્ત્રીઓને ફસાવીને નિર્જન જગ્યાએ લઈ જતો, ત્યાં તેમની સાથે હેવાનની જેમ વાસના સંતોષ્યા બાદ તેમને ગળે ટૂંપો દઇને મારી નાખતો. બે વર્ષ સુધી તે આ સિલસિલો ચલાવતો રહ્યો. જેટલો સમય તે ભાગેડુ રહ્યો ત્યાં સુધીમાં તો એણે અલગ અલગ ગામોમાં વધુ પાંચ હત્યાઓ કરી નાખી હતી! મે 2013 માં તે પકડાયો, પણ હત્યાના નહીં, ચોરીના આરોપમાં! આ વખતે તેનું નામ ‘તલારી સૈલુ’ હતું. અપીલ, મુક્તિ અને પછી એ જ રક્તપાત હવે આ લોહિયાળ સ્ટોરીનો એ ભાગ આવે છે જે સૌથી વધુ પ્રશ્નો ઉભા કરે છે. પોલીસના જણાવ્યા અનુસાર તેલંગાણા હાઈકોર્ટમાં અપીલ કર્યા પછી રામુલુને 3 ઓક્ટોબર, 2018 ના રોજ જેલમાંથી મુક્ત કરવામાં આવ્યો હતો. પોલીસનો આરોપ છે કે કાનૂની પ્રક્રિયા દ્વારા મુક્ત કરાયેલા આ વ્યક્તિએ ફરીથી એ જ રસ્તો અપનાવ્યો. માર્ચ 2019 માં હૈદરાબાદના આઉટર રિંગ રોડ નજીક ઉપપરપલ્લીમાં એક મહિલાનો સડેલો મૃતદેહ મળી આવ્યો હતો. આ કેસ શમીરપેટ પોલીસ સ્ટેશનમાં નોંધવામાં આવ્યો હતો. તે જ સમયે પટણચેરુ પોલીસ સ્ટેશન વિસ્તારમાં બીજી એક મહિલાની હત્યા કરવામાં આવી હતી. જે સ્ત્રીને આ માણસ મળ્યો, તેને કાળ ભરખી ગયો પોલીસના જણાવ્યા અનુસાર જુલાઈ 2020 માં તે ફરીથી જેલમાંથી બહાર આવી ગયો. થોડા મહિના પછી 10 ડિસેમ્બર, 2020 ના રોજ બાલા નગરમાં એક તાડીની દુકાનમાંથી આશરે 35 થી 40 વર્ષની એક અજાણી મહિલા તેની સાથે ગઈ હતી. રામુલુ તેને સિદ્દીપેટ જિલ્લાના મુલુગુ પોલીસ સ્ટેશન વિસ્તારમાં લઈ ગયો અને ત્યાં તેની હત્યા કરી નાખી. મહિલાની ઓળખ આજ સુધી જાહેર થઈ નથી. વીસ દિવસ પછી 30 ડિસેમ્બરના રોજ કવલા વેંકટમ્મા નામની 50 વર્ષની સ્ત્રી યુસુફગુડામાં તાડીની દુકાને ગઈ અને ત્યાં આ સાયકો કિલર તેને ભેટી ગયો. તે તેનો છેલ્લો શિકાર બની. 46 વર્ષના કિલર પર 16 હત્યાનો કેસ જ્યારે આખો દેશ પ્રજાસત્તાક દિવસની ઉજવણી કરી રહ્યો હતો, ત્યારે હૈદરાબાદના કમિશનર ટાસ્ક ફોર્સ (નોર્થ ઝોન) અને રાચકોંડા પોલીસની સંયુક્ત ટીમે વેંકટમ્માના મૃતદેહ મળ્યાના 22 દિવસ પછી મૈના રામુલુની ધરપકડ કરી. તે જ દિવસે તત્કાલીન હૈદરાબાદ પોલીસ કમિશનર અંજની કુમારે એક પ્રેસ કોન્ફરન્સ કરીને જણાવ્યું કે 45 વર્ષીય રામુલુ સામે 21 કેસ નોંધાયા છે, તેમાં 16 તો હત્યાઓ સામેલ છે! 4 ઘરફોડ ચોરી અને 1 પોલીસ કસ્ટડીમાંથી ભાગી જવાનો કેસ. પત્ની છોડીને ભાગી ગઈ, તો મહિલાઓની હત્યાઓ કરવા માંડ્યો પોલીસને અને સામાન્ય લોકોને પણ એ જાણવામાં સૌથી વધુ રસ હતો કે આ માણસ વિકૃત સિરિયલ કિલર બન્યો શા માટે? અને તે આ જ રીતે સ્ત્રીઓની જ હત્યા શા માટે કરતો હતો? રામુલુએ અલગ અલગ પ્રસંગોએ અલગ અલગ સ્ટેટમેન્ટ આપ્યાં હતાં. ક્યારેક તેણે કહ્યું કે બધું દારૂના નશામાં થયું, ક્યારેક તેણે કહ્યું કે તેણે ઘરેણાં અને પૈસા માટે હત્યા કરી. પરંતુ પોલીસની સૌથી મજબૂત થિયરી તેના અંગત જીવન સાથે સંબંધિત હતી. 1996માં જ્યારે રામુલુ લગભગ 21 વર્ષનો હતો, ત્યારે તેની સંમતિ વિના તેનાં લગ્ન કરાવી દેવામાં આવ્યાં હતાં. થોડા સમય પછી તેની પત્ની બીજા પુરુષ સાથે ભાગી ગઈ. આનાથી તેના મનમાં સ્ત્રીઓ પ્રત્યે ઊંડી નફરત જાગી, ખાસ કરીને જે સ્ત્રીઓ કુંવારી, સ્વતંત્ર અથવા દારૂ અને તાડીમાં સામેલ હતી. પોલીસનો દાવો છે કે 2003 સુધીમાં તેની આ હતાશા, ધૂંધવાટ તેને સ્ત્રીઓની હત્યાઓ કરવા તરફ દોરી ગઈ. પરંતુ પૂછપરછ દરમિયાન એક પ્રશ્ન ઊભો થયો જેનો રામુલુ જવાબ આપી શક્યો નહીં. પોલીસે પૂછ્યું: જો તારી પત્નીનું ભાગી જવું એ હત્યાઓનું કારણ હતું, તો તેં તારી પત્નીને જ શોધીને તેની હત્યા શા માટે કરી? જે તારા ગુસ્સાનું કારણ હતી, તેને બદલે અન્ય નિર્દોષ સ્ત્રીઓને શા માટે શિકાર બનાવી? રામુલુ પાસે તેનો કોઈ જવાબ નહોતો. આ હત્યારાએ 50 સ્ત્રીઓની હત્યા કરી હતી? પોલીસની સત્તાવાર ગણતરી 16 સ્ત્રીઓની હત્યા પર અટકે છે. પરંતુ આ ગણતરી પોલીસ દ્વારા ઉમેરવામાં આવેલા કેસોની સંખ્યા અથવા રામુલુએ કબૂલાત કરેલી હદ સુધી મર્યાદિત છે. ઘણા કિસ્સાઓમાં મૃત્યુ પામેલી મહિલાઓની ઓળખ થઈ શકી નથી અને કેટલાક કેસ કદી ઉકેલાયા નહીં અથવા તો પોલીસના ચોપડે બિનવારસી લાશ તરીકે નોંધાયા હતા. આથી તેની ક્યારેય ચાર્જશીટ પણ દાખલ ન થઈ. આ સિરિયલ કિલિંગના ઇન્વેસ્ટિગેશનમાં સામેલ કેટલાક અધિકારીઓને શંકા છે કે રામુલુએ મોતને ઘાટ ઉતારેલી સ્ત્રીઓની ખરેખર સંખ્યા 50 જેટલી હોઈ શકે છે! ‘મેં જેની હત્યાની કબૂલાત નથી કરી એવી બાકીની મહિલાઓનું શું કરશો?’ ઇન્ટરોગેશન દરમિયાન રામુલુએ એક ઇન્વેસ્ટિગેટિંગ ઑફિસરને કહ્યું હતું, ‘મેં જે કબૂલાત કરી હતી તેના માટે તમે મને ધરપકડ કરી, પણ બાકીના લોકોનું તમે શું કરશો?’ આ ‘બાકીના’ શબ્દનો અર્થ ભયાનક છે. બાકીના લોકો એટલે જેમનાં નામ કોઈપણ રિપોર્ટમાં નોંધાયેલા નથી. તેની હત્યાઓની સંખ્યા અને પેટર્નને કારણે રામુલુને ‘ભારતનો જેક ધ રિપર’ કહેવામાં આવ્યો, જે 1880ના દાયકામાં લંડનની શેરીઓમાં ફરતી ગણિકાઓને પકડીને તેમની હત્યાઓ કરતો હતો. અલબત્ત, લંડનનો તે સિરિયલ કિલર ક્યારેય પકડાયો નહીં, જ્યારે રામુલુ બબ્બે વાર પોલીસના સકંજામાં આવી ગયો હતો. ડઝનબંધ હત્યાઓ છતાં એકેય કેસમાં ફાંસી નહીં! રામુલુની ધરપકડ બાદ દરેક કેસ અલગથી ચલાવવામાં આવ્યો અને તેના અલગ-અલગ ચુકાદા આપવામાં આવ્યા. એપ્રિલ 2024 માં તેને સાંગારેડ્ડી જિલ્લાના પટણચેરુ વિસ્તારમાં 2019 માં થયેલી હત્યા માટે આજીવન કેદની સજા ફટકારવામાં આવી. આ ચુકાદો સર્કમસ્ટેન્શિયલ એવિડન્સ એટલે કે પરિસ્થિતિગત પુરાવા પર આધારિત હતો, અર્થાત્ તેના કોઈ સાક્ષી સાક્ષી નહોતા. 2025માં કોર્ટે તેને કવલા વેંકટમ્માની હત્યામાં પણ દોષિત ઠેરવ્યો હતો. આ વર્ષે તેને બીજી બે હત્યાઓ માટે પણ આજીવન કેદની સજા ફટકારવામાં આવી. તેમાં 35 વર્ષની પલ્લાપુ લાવણ્યા ઉર્ફે મંજુલા નામની સ્ત્રી સામેલ હતી. મંજુલા પર રામુલુએ જાતીય હુમલો કર્યો, જેનો તેણે પ્રતિકાર કર્યો હતો. આનાથી ગુસ્સે ભરાયેલા રામુલુએ મોટો પથ્થર તેના માથા પર ટીચીને તેની હત્યા કરી નાખી અને તેનો ફોન વગેરે ચોરી લીધાં હતાં. આ વિકૃત સાયકો કિલર અત્યારે હૈદરાબાદની ચેરલાપલ્લી સેન્ટ્રલ જેલમાં પોતાની પહેલી આજીવન કેદની સજા ભોગવી રહ્યો છે. આવા કેટલા સિરિયલ કિલર આપણી વચ્ચે ફરતા હશે? મૈના રામુલુની વાર્તા ફક્ત એક સાયકો સિરિયલ કિલરની જ સ્ટોરી નથી. બલકે તે આપણી પોલીસ સિસ્ટમ પર પણ ગંભીર પ્રશ્નો ઉભા કરે છે. એક જ રાજ્યના અલગ અલગ પોલીસ વિભાગ વચ્ચેનું કમ્યુનિકેશન કેવી રીતે કેસને ગૂંચવી નાખે છે અને તેનો લાભ લઇને આવા હત્યારા બિનધાસ્ત હત્યાઓ કરતા ફરે છે. અને હજી જે 36 જેટલી સ્ત્રીઓ કાયમ માટે ગાયબ થઈ ગઈ છે અને તેમની કોઈ ઓળખ થઈ નથી તેમનું શું? આ તો એક મહિલાના બ્લાઉઝમાં ફોલ્ડ કરેલી નાનકડી કાપલીનો છેડો શોધતાં આ શેતાન પકડાયો, પરંતુ સમાજમાં આવા કેટલા ખૂની છુટ્ટા ફરતા હશે તે વિચારીને જ ધ્રુજારી છૂટી જાય છે.