Search

    Language Settings
    Select Website Language

    GDPR Compliance

    We use cookies to ensure you get the best experience on our website. By continuing to use our site, you accept our use of cookies, Privacy Policy, and Terms of Service.

    BijnorNews
    Bijnor news

    રાજકોટની સિટીબસ સેવામાં ગંભીર બેદરકારી:મનપા દ્વારા ચાલુવર્ષે અત્યાર સુધીમાં રૂ. 4.57 કરોડનો દંડ ફટકારાયો, ચેકીંગ એજન્સીને પણ બ્લેકલિસ્ટ કરાઈ

    7 hours ago

    રાજકોટ મનપા સંચાલિત સિટી અને બીઆરટીએસ બસ સેવામાં એજન્સીઓની ગંભીર બેદરકારી સામે આવી છે. વિપક્ષી નેતા દીપ્તિબેન સોલંકીના પ્રશ્નના સત્તાવાર જવાબ મુજબ, વર્ષ 2026માં બસ સંચાલન અને મેનપાવર પૂરું પાડતી એજન્સીઓને નિયમભંગ બદલ રૂ. 4.57 કરોડથી વધુનો દંડ ફટકારાયો છે. જેમાં બસોની અપૂરતી સફાઈ, સ્ટોપ પર બસ ન રોકવી, મોબાઇલનો ઉપયોગ, બેફામ ડ્રાઇવિંગ, ટિકિટ ન આપવી અને ગેરવર્તન જેવી ખામીઓ સામેલ છે. ઉપરાંત, વાહનોમાંથી અનધિકૃત જીપીએસ મળી આવતા ટિકિટ ચેકિંગ કરતી એજન્સી શ્રીનાથજી એન્ટરપ્રાઇઝને બ્લેકલિસ્ટ કરવામાં આવી છે. બીજી તરફ, તંત્ર દ્વારા આગામી સમયમાં 100 નવી ઇલેક્ટ્રિક બસ ઉમેરવાનું આયોજન છે. દંડની આંકડાકીય વિગતો મુજબ જાન્યુઆરીથી 12 નવેમ્બર 2026 સુધીમાં 100 ઇલેક્ટ્રિક બસનું સંચાલન કરતી મે. વિશ્વમ સિટી બસ ઓપરેશન પ્રા.લી.ને રૂ. 2,19,50,576નો દંડ ફટકારવામાં આવ્યો છે. જ્યારે 100 સીએનજી બસ અને કંડક્ટર સહિતનું સંચાલન કરતી મારુતિ ટ્રાવેલ્સને રૂ. 1,48,98,401નો દંડ થયો છે. તેવી જ રીતે 50 ઇલેક્ટ્રિક બસ ચલાવતી મે. નારાયણ સિટી બસ ઓપરેશન પ્રા.લી.ને રૂ. 66,37,500, ઇલેક્ટ્રિક બસમાં મેનપાવર પૂરું પાડતી અલ્ટ્રા મોડર્ન એજન્સીને રૂ. 17,58,000 અને જે.કે. સિક્યુરિટી એન્ડ કન્સલ્ટન્સીને રૂ. 4,58,600નો દંડ કરવામાં આવ્યો છે. દંડના મુખ્ય કારણોમાં બસોની અપૂરતી સફાઈ, લાઇટ અને મીટરમાં ખામી, ડ્રાઇવર દ્વારા મોબાઇલ ફોનનો ઉપયોગ, નિયત સ્ટોપ પર બસ ન રોકવી, બસ બ્રેકડાઉન થવી, નિર્ધારિત સંખ્યા કરતાં ઓછી બસ દોડાવવી, ડ્રાઇવરની એકથી વધુ શિફ્ટમાં કામગીરી, સમયસર બસ શરૂ ન કરવી, સીટબેલ્ટ ન પહેરવો, બેફામ ડ્રાઇવિંગ, મુસાફરો અને સ્ટાફ સાથે ગેરવર્તન, યુનિફોર્મ અને ઓળખકાર્ડનો અભાવ, ટિકિટ ન આપવી, કંડક્ટરની ગેરહાજરી તેમજ ટિકિટ મશીનને નુકસાન જેવી બાબતોનો સમાવેશ થાય છે. ટિકિટ ચેકિંગની જવાબદારી સંભાળતી એજન્સી શ્રીનાથજી એન્ટરપ્રાઇઝ સામે વારંવારની બેદરકારી બદલ બ્લેકલિસ્ટ કરવાની કડક કાર્યવાહી પણ કરવામાં આવી છે. સત્તાવાર જવાબમાં ખુલ્યું છે કે આ એજન્સી દ્વારા પૂરા પાડવામાં આવતા વાહનોમાંથી અનધિકૃત જીપીએસ મળી આવ્યું હતું, જેના કારણે કંડક્ટરને પણ વાહનનું લાઇવ લોકેશન મળી જતું હતું. અગાઉ મનપા દ્વારા દંડનીય કાર્યવાહી અને પગલાંની વિગતો અખબારી યાદી દ્વારા નિયમિત જાહેર કરાતી હતી, પરંતુ હવે તે પ્રક્રિયા બંધ થતાં વહીવટી પારદર્શકતા સામે સવાલો ઊભા થયા છે. માત્ર દંડ કરવાને બદલે સેવાની ગુણવત્તા સુધારવા નક્કર દેખરેખ અને કડક અમલવારી જરૂરી હોવાની લાગણી નાગરિકો અને કોર્પોરેટરોમાં પ્રવર્તી રહી છે. જોકે તંત્ર દ્વારા પરિવહન સેવાને વધુ સુવિધાજનક બનાવવા માટે વિવિધ પહેલ પણ આગળ ધપાવવામાં આવી રહી છે. આગામી સમયમાં પીએમ ઇ-બસ સેવા પ્રોજેક્ટ હેઠળ 100 નવી ઇલેક્ટ્રિક બસ ઉમેરવાનું આયોજન છે. હાલમાં 60 વર્ષથી વધુ વયના વરિષ્ઠ નાગરિકો અને દિવ્યાંગોને ફ્રી બસ પાસ, વિદ્યાર્થીઓ અને બાંધકામ શ્રમિકો માટે વિશેષ યોજના, મહિલાઓ માટે ચાર પિંક બસ, રવિવારે મહિલાઓને 50 ટકા દરે ટિકિટ તથા વુમન ડે, રક્ષાબંધન અને ભાઈબીજે ફ્રી મુસાફરીનો લાભ અપાય છે. ઉપરાંત રૂ. 35માં આખો દિવસ મુસાફરી, વોટ્સએપ આધારિત ઓનલાઇન ટિકિટિંગ, દર શનિ-રવિ સવારે 9 વાગ્યે ત્રિકોણબાગથી રાજકોટ દર્શન બસ અને સ્ટાફને નિયમિત તાલીમ આપી સમયપત્રકના ચુસ્ત પાલન માટે તંત્ર દ્વારા પ્રયાસો કરવામાં આવી રહ્યા છે.
    Click here to Read More
    Previous Article
    'છોકરાઓને બહાર મોકલ, નહીંતર પતાવી દઈશું':મિત્ર સાથેના ઝઘડાનો ખાર રાખી ગણપતનગરમાં 4 શખસ બેફામ, જૂની અદાવતમાં ફળના વેપારીની 2 બાઇક સળગાવી
    Next Article
    વાપી ખંડણી કેસના આરોપીને SOG PI એ પગમાં ગોળી ધરબી:DNA ટેસ્ટ બાદ પરત ફરતા પોલીસ પર હુમલો, 2 પોલીસકર્મી ઇજાગ્રસ્ત, વલસાડ સિવિલ ખસેડાયો

    Related Gujarat Updates:

    Are you sure? You want to delete this comment..! Remove Cancel

    Comments (0)

      Leave a comment