માંગરોળ-કેશોદ પંથકમાં 40 ઇંચ વરસાદથી જળબંબાકાર, ડ્રોન વીડિયો:વેરાવળ-પોરબંદર હાઇવેનો કોઝવે તૂટતા 18 ST અટવાઈ, 900 મુસાફરો ફસાયા'તા; નદીઓ ગાંડીતૂર, ઉભા પાક તણાયા

જૂનાગઢ જિલ્લાના માંગરોળ અને કેશોદ પંથકમાં કુદરતે રૌદ્ર સ્વરૂપ ધારણ કર્યું છે. છેલ્લા 3 દિવસથી સતત ધોધમાર વરસેલા વરસાદને કારણે સમગ્ર પંથક જળબંબાકાર થયું છે અને સ્થાનિક જનજીવન પર તેની વ્યાપક અને ગંભીર અસરો જોવા મળી રહી છે. વરસાદે વિરામ લીધા બાદ પણ પૂરના ધસમસતા પાણી હજુ સુધી ઓસર્યા નથી, જેના કારણે ગ્રામ્ય વિસ્તારો સહિતના અનેક રસ્તાઓ બંધ થઈ ગયા છે અને વાહનવ્યવહાર સંપૂર્ણપણે ખોરવાઈ ગયો છે. પંથકની નદીઓ ગાંડીતૂર બનીને વહી રહી છે, જેના કારણે ખેતરો બેટમાં ફેરવાઈ ગયા છે અને ખેડૂતોનો ઊભો પાક સંપૂર્ણપણે તણાઈ જતાં ભારે નુકસાન થયું છે. ખેતરોમાં પાણી ફરી વળતા ખેડૂતોને આર્થિક નુકસાન વેઠવાનો વારો આવ્યો છે અને સમગ્ર પંથકમાં ચિંતાજનક માહોલ વ્યાપી ગયો છે. રાતે 18 એસટી બસો અટવાઈ પડી, 900 મુસાફરો હતા ઇન્ચાર્જ પ્રાંત અધિકારી કિશન ગળસરે જણાવ્યું હતું કે, રસ્તાઓ બંધ થવાને કારણે દ્વારકાથી કોડીનાર તરફ જઈ રહેલી આશરે 18 જેટલી એસટી બસો માર્ગમાં જ અટવાઈ પડી હતી, જેમાં અંદાજે 900 જેટલા મુસાફરો સવાર હતા. આ તમામ અટવાયેલા 900 મુસાફરોને તંત્ર દ્વારા મક્તુમપુર સાયક્લોન શેલ્ટર ખાતે સુરક્ષિત આશ્રય આપી રાત્રિ રોકાણ કરાવવામાં આવ્યું હતું અને તેમના માટે ચા-પાણી તેમજ ગરમ નાસ્તાની યોગ્ય વ્યવસ્થા પૂરી પાડવામાં આવી હતી. વેરાવળ-પોરબંદર હાઇવેનો કોઝવે તૂટી ગયો, વાહનવ્યવહાર ઠપ્પ ​માંગરોળના સ્થાનિક રહીશ ભગવાનજીભાઈ મોરીએ પૂર અંગે વિગતો આપતા જણાવ્યું હતું કે, માંગરોળ તાલુકાની નોળી નદીમાં છેલ્લા 24 કલાક દરમિયાન પડેલા અતિશય અને મુશળધાર વરસાદને કારણે અત્યંત ભયાનક ઘોડાપૂર આવ્યું છે. આ પૂરના પ્રચંડ પ્રવાહના લીધે વેરાવળ-પોરબંદર હાઇવે પર આવેલો એક મોટો કોઝવે એટલે કે બેરેજ આશરે 25થી 30 ફૂટ જેટલો વ્યાપક પ્રમાણમાં તૂટી પડ્યો છે. અને હાલમાં આ વ્યસ્ત હાઇવે પરનો વાહનવ્યવહાર સંપૂર્ણપણે ઠપ્પ થઈ ગયો છે અને અનેક વાહનો અટવાઈ પડ્યા છે. જોકે પરિસ્થિતિની ગંભીરતાને જોતા સરકારી તંત્રએ રસ્તાને યુદ્ધના ધોરણે રીપેર કરવાની કામગીરી પૂરજોશમાં શરૂ કરી દીધી છે અને તંત્ર તરફથી એવું આશ્વાસન આપવામાં આવ્યું છે કે ટૂંક સમયમાં જ આ રસ્તો ફરીથી વાહનવ્યવહાર માટે સત્તાવાર રીતે ખુલ્લો કરી દેવામાં આવશે. 'લાંગડી નદી અને મધુવંતી નદીમાં પૂર આવ્યુ ને અહિંયા પાણી ફરી વળ્યું' કેશોદના જોનપુર ગામના માજી સરપંચ દેવદાનભાઈ પીઠીયાએ જણાવ્યું હતું કે, જોનપુર ગામથી આગળ જવા માટેના જે મહત્વના ગ્રામ્ય વિસ્તારો છે, જેમાં ખાસ કરીને મુળિયાસા, બામણાસા, બાલાગામ અને સરોડ સહિતના ઘેડ વિસ્તારના ગામોનો સમાવેશ થાય છે, ત્યાં જવા માટેનો મુખ્ય રસ્તો હાલ જોનપુર ગામ પાસેથી જ સંપૂર્ણપણે બ્લોક થઈ ગયો છે. આ વિસ્તારમાં આટલી મોટી માત્રામાં પાણી ભરાવા પાછળનું મુખ્ય કારણ એ છે કે ઉપરવાસમાં આવેલા મેંદરડા તાલુકા, સાસણ અને વંથલી બાજુના વિસ્તારોમાં આ વખતે આશરે 10થી 12 ઇંચ જેટલો ભારે વરસાદ ખાબક્યો છે. વધુમાં કહ્યું કે, આ ઉપરવાસના ભારે વરસાદનું પાણી વહીને આવવાના કારણે જ લાંગડી નદી અને મધુવંતી નદીમાં પૂર આવ્યું છે અને તેના પાણી આ નીચાણવાળા વિસ્તારોમાં ફરી વળ્યા છે. આ નદીઓના પૂરના લીધે અહીં અવારનવાર 3થી 4 ફૂટ જેટલા પાણી રસ્તાઓ પર ભરાઈ જાય છે, જેના લીધે અવરજવર બંધ થઈ જાય છે. 'યોગ્ય ઉંચો પુલ બનાવા અનેક વખત રજૂઆત કરી હતી' ખેતીવાડી અંગે વાત કરતા પીઠીયાએ ઉમેર્યું કે, હાલ આ વિસ્તારમાં મુખ્યત્વે મગફળીનું વાવેતર કરવામાં આવ્યું છે, જેમાં આ વરસાદી પાણી ખેતી માટે અમુક અંશે નુકસાનકારક છે તો અમુક અંશે લાભદાયી પણ નીવડી શકે છે, જો કે આ સ્થિતિમાં ખેતીને નુકસાન કરતાં લાભ વધુ થવાની શક્યતા દેખાઈ રહી છે. આ માર્ગ પર યોગ્ય ઉંચો પુલ બનાવવામાં આવે તે માટે માર્ગ અને મકાન વિભાગને અનેક વખત લેખિત તેમજ મૌખિક રજૂઆતો કરવામાં આવી હોવા છતાં આજદિન સુધી વહીવટી તંત્ર તરફથી આ સમસ્યાનું કોઈ કાયમી નિરાકરણ લાવવામાં આવ્યું નથી. 'દર વર્ષે ચોમાસામાં અહીં વારંવાર પાણી ભરાઈ છે' ​જોનપુર ગામના સ્થાનિક કાળાભાઈ સોલંકીએ જણાવ્યું હતું કે, જોનપુરથી મુળિયાસા અને બામણાસા થઈને ઘેડ વિસ્તાર તરફ જતો આ મુખ્ય રસ્તો છે, જે આગળ જતાં સીધો પોરબંદર અને માધવપુર સુધી કનેક્ટ થાય છે. આટલો મહત્વનો કનેક્ટિંગ માર્ગ હોવા છતાં દર વર્ષે ચોમાસાની વરસાદી સિઝનમાં અહીં વારંવાર પાણી ભરાઈ જવાની એક ગંભીર સમસ્યા સર્જાય છે. આ વિસ્તારમાં પૂરની સ્થિતિનું મુખ્ય કારણ એ છે કે ઉપરવાસમાં આવેલા સતાધાર, મેંદરડા તેમજ વિસાવદર પંથકનો ભારે વરસાદ થાય ત્યારે તે બધું જ પાણી વહીને આ એક જ જગ્યાએ ભેગું થાય છે અને આ વ્યાપક પાણીની આવકને કારણે આજુબાજુના તમામ રસ્તાઓ સંપર્ક વિહોણા અને બ્લોક થઈ જાય છે. છેલ્લા 3 દિવસથી રસ્તાઓ સંપૂર્ણ બંધ હોવાના કારણે સ્થાનિક લોકો ભારે મુશ્કેલીનો સામનો કરી રહ્યા છે. પૂરના પાણી વચ્ચે દર્દીને હોસ્પિટલ પહોંચાડવાની તકલીફ, સ્કૂલો બંધ જેમાં ખાસ કરીને જો કોઈ વ્યક્તિ અચાનક ગંભીર બીમાર પડે અથવા તો કોઈ સગર્ભા મહિલાની ડિલિવરીનો સમય નજીક હોય, તો તેમને પૂરના પાણી વચ્ચે હોસ્પિટલ પહોંચાડવામાં અત્યંત કપરી પરિસ્થિતિ અને જીવનું જોખમ સર્જાય છે. આ પૂરના પાણી રસ્તા પર ફરી વળવાના કારણે બાળકો માટે સ્કૂલો પણ બંધ થઈ જાય છે જેનાથી તેમનો અભ્યાસ લાંબા સમય સુધી બગડે છે. આ વિકટ સમસ્યાના કાયમી અને કાયમી નિરાકરણ માટે તેમણે સરકાર અને વહીવટી તંત્ર સમક્ષ મજબૂત માંગણી કરતા જણાવ્યું હતું કે આ ઘેડ વિસ્તારના માર્ગ પર આશરે 200થી 300 ફૂટ જેટલો રોડ ઊંચો કરવામાં આવે અને ત્યાં એક મોટો તથા મજબૂત બ્રિજ બનાવવામાં આવે, જેથી કરીને ચોમાસા દરમિયાન ગમે તેટલો વરસાદ પડે તો પણ વાહનવ્યવહાર ખોરવાય નહીં અને સ્થાનિક લોકોને આવી હાલાકીનો સામનો ન કરવો પડે. અત્યંત ભારે વરસાદ બાદ નોલી નદી ગાંડીતૂર બની ​જૂનાગઢ જિલ્લા પંચાયતના ઉપપ્રમુખ જેઠાભાઈ ચુડાસમાએ જણાવ્યું હતું કે, માંગરોળ તાલુકામાં 1 જુલાઈથી જ ધીમે-ધીમે વરસાદની શરૂઆત થઈ ગઈ હતી. ત્યારબાદ ત્રીજી તારીખે આ પંથકમાં મેઘરાજાએ રૌદ્ર સ્વરૂપ ધારણ કર્યું અને એકસાથે સતત 18થી 20 ઇંચ જેટલો મુશળધાર ભારે વરસાદ ખાબક્યો હતો. આ ઉપરાંત ઉપરવાસમાં આવેલા કેશોદ પંથકમાં પણ અત્યંત ભારે વરસાદ હોવાને કારણે અહીંની નોલી નદી ગાંડીતૂર બની હતી અને તેમાં પૂરની ગંભીર તેમજ ચિંતાજનક સ્થિતિ સર્જાઈ હતી. ઉભા પાક, લોકોના ઘરો અને પશુધનને પૂરમાં મોટું નુકસાન જેઠાભાઈએ પૂરથી થયેલા નુકસાન અંગે ઊંડી ચિંતા વ્યક્ત કરતા કહ્યું કે, નીચાણવાળા વિસ્તારોમાં ખેડૂતોના ઘરોમાં પૂરના પાણી ઘૂસી જતાં ઘરમાં રહેલી તમામ ઘરવખરી અને કિંમતી માલસામાન પાણીમાં પલળીને નાશ પામ્યા છે. પરિસ્થિતિ એટલી વિકટ અને રસ્તાઓ બંધ છે કે હજુ સુધી વહીવટી તંત્રના અધિકારીઓ પૂર પ્રભાવિત છેવાડાના વિસ્તારો સુધી સંપૂર્ણપણે પહોંચી શક્યા નથી. આવી સ્થિતિમાં પૂરથી પ્રભાવિત બનેલા આસપાસના લોકો માટે હાલ પૂરતી ખાવા-પીવાની અને અન્ય પ્રાથમિક જરૂરિયાતો તેમજ ફૂડ પેકેટ્સની ગોઠવણ ગામના સ્થાનિક સેવાભાવી લોકો દ્વારા જ કરવામાં આવી છે. 'નોલી અને લાંગડી ભેગી થાય છે ત્યારે ભયાનક સ્વરૂપ ધારણ કરે છે' વધુમાં ચુડાસમાએ નદીઓના સંગમ અંગે જણાવ્યું કે, અહીંથી આશરે 1થી 1.5 કિલોમીટર દૂર લાંગડી નદી આવેલી છે, અને જ્યારે આ બંને નદીઓ એટલે કે નોલી અને લાંગડી ભેગી થાય છે, ત્યારે તે અત્યંત ભયાનક સ્વરૂપ ધારણ કરે છે. આ સંગમ વિસ્તારની આજુબાજુમાં જે ભારે નુકસાન થયું છે તેનો સાચો અંદાજ લગાવવો પણ હાલ મુશ્કેલ છે, કારણ કે હજુ સુધી ત્યાં કોઈ સરકારી સર્વે ટીમ પહોંચી શકી નથી. 'પૂરના ધસમસતા પાણી અને બંધ રસ્તાઓના કારણે NDRF ટીમ પણ ના પહોંચી' પરિસ્થિતિ અંગે વહીવટી સ્તરે કરાયેલી કામગીરી વિશે વાત કરતા તેમણે જણાવ્યું કે, ગઈકાલે(4 જુલાઈ) રાત્રે જ તેમણે સ્થાનિક ધારાસભ્ય ભગવાનજી કરગઠિયા, પૂર્વ મંત્રી રાજેશભાઈ ચુડાસમા, મામલતદાર, ડેપ્યુટી કલેક્ટર તેમજ કલેક્ટર સાહેબ સાથે સીધો ટેલિફોનિક સંપર્ક કરીને પરિસ્થિતિની ગંભીરતાથી માહિતગાર કર્યા હતા, જો કે રાત્રિના સમયે પૂરના ધસમસતા પાણી અને બંધ રસ્તાઓના કારણે NDRFની ટીમ પણ સમયસર ત્યાં પહોંચી શકે તેમ નહોતી. બે દિવસમાં 40 ઈંચ વરસાદ, જે સમગ્ર સીઝનનો 100 ટકા જેટલો ​માંગરોળ પંથકમાં થયેલા વરસાદ અંગે કેશોદના ઇન્ચાર્જ પ્રાંત અધિકારી કિશન ગળસરે જણાવ્યું હતું કે, છેલ્લા બે દિવસથી માંગરોળ પંથકમાં સતત આકાશી આફત જેવો ભારે વરસાદ પડી રહ્યો હતો, જેમાં આગલા દિવસે 16 ઇંચ અને ત્યારબાદના બીજા જ દિવસે વધુ 22.5 ઇંચ જેટલો રેકોર્ડબ્રેક વરસાદ નોંધાયો હતો. આમ માત્ર બેથી ત્રણ દિવસના ટૂંકા ગાળામાં જ આ વિસ્તારમાં કુલ 40 ઇંચ જેટલો ભારે વરસાદ ખાબક્યો છે, જે સમગ્ર સીઝનનો 100 ટકા જેટલો વરસાદ દર્શાવે છે. આ અતિવૃષ્ટિને કારણે નદીઓ અને નાળાઓમાં પાણીના સ્તરમાં સતત ચિંતાજનક વધારો થયો હતો. નીચાણવાળા વિસ્તારોમાંથી લોકોનું સુરક્ષિત સ્થળે સ્થળાંતર ઇન્ચાર્જ પ્રાંત અધિકારીએ કહ્યું કે, પરિસ્થિતિ પર કાબૂ મેળવવા અને જાનમાલનું નુકસાન અટકાવવા માટે કલેક્ટર સાહેબના સીધા માર્ગદર્શન હેઠળ પ્રાંત અધિકારી, મામલતદાર તેમજ ચીફ ઓફિસર સહિતની સમગ્ર વહીવટી ટીમ દ્વારા 24 કલાક સતત મોનિટરિંગ કરવામાં આવી રહ્યું હતું. પૂરની સ્થિતિ સર્જાતા જ પ્રભાવિત અને નીચાણવાળા વિસ્તારોમાંથી લોકોનું સુરક્ષિત સ્થળે સ્થળાંતર કરવાની તેમજ જરૂરિયાત મુજબ તાત્કાલિક રેસ્ક્યુ ઓપરેશન હાથ ધરવાની કામગીરી વહીવટી તંત્ર દ્વારા કરવામાં આવી હતી. આ ઉપરાંત સગર્ભા મહિલાઓને કોઈ પણ પ્રકારની ઇમરજન્સી તબીબી સેવા માટે મુશ્કેલી ન નડે તે હેતુથી અગાઉથી જ ઓળખ કરીને હોસ્પિટલ ખાતે ખસેડવામાં આવી હતી. સોસાયટીઓમાં હજુ પણ પૂરના પાણી ભરાયેલા હાલની પરિસ્થિતિ અંગે વધુમાં કહ્યું કે, ગઈરાતથી જ સદનસીબે વરસાદ બંધ થઈ ગયો હોવાના કારણે હાલમાં પરિસ્થિતિ ધીમે-ધીમે સામાન્ય થઈ રહી છે. જોકે માંગરોળની બેથી ત્રણ સોસાયટીઓમાં હજુ પણ પૂરના પાણી ભરાયેલા હોવાથી ત્યાં તાત્કાલિક ધોરણે મોટા ડી-વોટરિંગ પંપ ચાલુ કરી દેવામાં આવ્યા છે, જેથી ટૂંક સમયમાં ત્યાંથી પણ પાણીનો નિકાલ થઈ જશે. આ ઉપરાંત જે બ્રિજ પર પાણી ફરી વળ્યા હતા તેને પણ અડધા કલાકની અંદર વાહનવ્યવહાર માટે પુનઃ કાર્યરત કરવાના વહીવટી પ્રયાસો ચાલુ છે. અંતમાં અધિકારી કિશન ગળસરે ઉમેર્યું કે, આટલો અભૂતપૂર્વ ભારે વરસાદ હોવા છતાં, વહીવટી તંત્રની પૂર્વ આયોજિત સતર્કતા અને ત્વરિત કામગીરીને કારણે જિલ્લામાં કોઈ પણ પ્રકારની અનિચ્છનીય ઘટના કે મોટી જાનહાનિ થવા પામી નથી અને સ્થિતિ સંપૂર્ણ નિયંત્રણ હેઠળ છે.