ગુજરાતમાં પકડાયેલી 4 બાંગ્લાદેશી યુવતીઓના શોકિંગ કિસ્સા:જુમ્મી અય્યુબ ઋતુ પટેલ બની ગઇ, કિન્નર ભેગી રહી, ડાન્સ બાર અને ઇમિટેશનના કારખાનામાં કર્યું કામ

કાયદેસરના વિઝા કે પાસપોર્ટ વગર, નકલી નામ, ધર્મ અને ઓળખ ધારણ કરીને એજન્ટોના જોખમી નેટવર્કના સહારે આંતરરાષ્ટ્રીય બોર્ડર પાર કરવી કેટલી સહેલી છે? ગુજરાત પોલીસના 'ઓપરેશન ડેલ્ટા હન્ટ' હેઠળ હાલમાં રાજ્યભરમાંથી સેંકડો બાંગ્લાદેશી ઘૂસણખોરોને ઝડપી પાડવામાં આવ્યા છે. દિવ્ય ભાસ્કરના સ્પેશિયલ રિપોર્ટમાં ગઇકાલે તમે વાંચ્યું કે કેવી રીતે બાગ્લાદેશ અને ભારતના એજન્ટોની ગોઠવણથી ઘૂસણખોરો છેક ગુજરાત સુધી આવી પહોંચે છે. અહીંયા આવીને અલગ-અલગ રાજ્યોમાં કેવા કામ-ધંધા કરે છે અને અહીંની કમાણી કઈ ત્રણ મોડસ ઓપરેન્ડીથી વતન મોકલે છે. (પાર્ટ-1 રિપોર્ટ વાંચવા માટે અહીં ક્લિક કરો.) બાંગ્લાદેશના અંતરિયાળ ગામડાઓથી નીકળીને ગુજરાત સુધી પહોંચેલી 4 અલગ-અલગ યુવતીઓની કહાની કોઈ સસ્પેન્સ થ્રિલર ફિલ્મ જેવી જ ચોંકાવનારી છે. ક્યારેક 'ઋતુ પટેલ' જેવા ગુજરાતી નામ ધારણ કરીને, તો ક્યારેક અહીંના લોકો સાથે નિકાહ પઢીને બાંગ્લાદેશી યુવતીઓ શરણ લે છે. એક યુવતી એવી છે જેણે ઘૂસણખોરી માટે કિન્નરોના ટોળાનો પણ સહારો લીધો. બાંગ્લાદેશી યુવતીઓ ડાન્સ બારથી માંડીને ઇમિટેશન જ્વેલરીના કારખાનામાં કામ કરતી હતી અને આખરે પોલીસની રેડમાં પકડાઈ ગઈ. આજે વાંચો બાંગ્લાદેશની જુમ્મી, રુઝીના અખ્તર, અફસાના ખાતૂન, રૂપાલી ખાતૂને પોલીસ સામે કરેલી ખતરનાક કબૂલાતના કિસ્સા. કિસ્સો- 1 ડાન્સ બારમાં કામ કર્યું, બાંગ્લાદેશ જઈને ફરી પાછી આવી બાંગ્લાદેશની 22 વર્ષની એક યુવતી... નામ એનું જુમ્મી. ભારત-બાંગ્લાદેશ બોર્ડરથી અડીને આવેલા જેસોર જિલ્લાના રાયપુર ગામની રહેવાસી. આ ગામથી ઇન્ટરનેશનલ બોર્ડર માંડ 40 કિલોમીટર દૂર થાય. જુમ્મીના મનમાં ટૂંકા રસ્તે અને ગમે તે ભોગે વધુ પૈસા કમાવવાની લાલચ હતી. આવા ઈરાદાઓને હકીકતમાં બદલવાની શરૂઆત વર્ષ 2013માં થઈ, આ સમયે તેની મુલાકાત રત્ના નામના એક એજન્ટ સાથે થઈ અને ભારતમાં ગેરકાયદેસર રીતે ઘૂસણખોરી કરવાનો પ્લાન ઘડાયો. એક રાત્રે રત્ના સાથે જુમ્મી ઘરેથી ભાગી નીકળી. રાયપુરથી પગપાળા નજીકમાં આવેલી બેનાપોલ બોર્ડર સુધી પહોંચ્યા અને પછી ભારતીય સુરક્ષા એજન્સીઓની નજર ચૂકવીને બન્નેએ બોર્ડર પાર કરી લીધી. કોઈ પાસપોર્ટ નહીં, કોઈ વિઝા નહીં. સરહદ પાર કરીને તેઓ સીધા પશ્ચિમ બંગાળના કોલકાતામાં આવેલા હાવડા રેલવે સ્ટેશને પહોંચ્યા. ગેરકાયદેસર રીતે ભારતની જમીન પર પગ મૂકી ચૂકેલી જુમ્મી પર કોઈને શંકા પણ ન ગઈ. હાવડા સ્ટેશનથી એજન્ટ રત્ના તેને ટ્રેન મારફતે માયાનગરી મુંબઈ લઈ ગઈ. રત્નાએ અગાઉથી જ ઘણુ સેટિંગ કરી રાખ્યું હતું. એટલે મુંબઈના કલ્યાણ વિસ્તારમાં એક રૂમ રાખીને જુમ્મી માટે નવું ઠેકાણું બનાવી આપ્યું. ઝડપી પૈસા કમાવવા માટે તેણે કલ્યાણ વિસ્તારના જ એક ડાન્સ બારમાં ડાન્સર તરીકે કામ કરવાનું શરૂ કરી દીધું. પોલીસની નજરોથી બચીને ડાન્સ બારમાં તેણે સતત ચાર વર્ષ સુધી કામ કર્યું અને સારા એવા રૂપિયા ભેગા કરી લીધા. વર્ષ 2017માં જુમ્મીને વતન યાદ આવ્યું. જેમ ચાર વર્ષે પહેલાં ગેરકાયદેસર રીતે ભારતમાં પ્રવેશી હતી એવી જ રીતે મુંબઈ છોડીને પાછી બાંગ્લાદેશ જતી રહી. જો કે વતન પહોંચ્યા બાદ પણ ત્યાં તેનું મન ન લાગ્યું. બાંગ્લાદેશના નાના એવા ગામ રાયપુરમાં જુમ્મી માત્ર દસ દિવસ રોકાઈ. ભારતમાં સરળતાથી મળતા પૈસાની લત તેને ફરી ખેંચી લાવી. ચાર વર્ષ પહેલાં થયેલી ઘટનાનું ફરી એકવાર પુર્નાવર્તન થયું. જો કે જુમ્મીએ આ વખતે રત્નાને બદલે નવો એજન્ટ પકડ્યો. બીજી વાર બેનાપોલ બોર્ડર નજીકથી ગેરકાયદેસર રીતે ભારતમાં ઘૂસણખોરી કરી. બોર્ડર પાર કરીને તે કોલકાતા પહોંચી. એજન્ટ બદલાયો એટલે ભારતમાં કામકાજ અને રહેવાનું સ્થળ પણ બદલાઈ ગયું. બીજી વાર ઘૂસણખોરી કરીને આવેલી જુમ્મીએ મુંબઈ જવાનું ટાળ્યું અને કોલકાતાથી સીધી અમદાવાદ આવી પહોંચી. નરોડા વિસ્તારમાં આવેલી 'ગેલેક્સી' નામની જગ્યાએ રહેવા લાગી. અહીં પણ તે અલગ-અલગ લગ્નપ્રસંગો અને ફંક્શન્સમાં ડાન્સર તરીકે કામ કર્યું અને પોલીસથી છુપાઈને કમાણી કરતી રહી. ત્યારબાદ, વર્ષ 2022માં તેણે પોતાનું લોકેશન બદલ્યું અને રાજકોટ પહોંચી. એક દાયકા સુધી ભારતમાં રહેવાના કારણે જુમ્મી અહીંના રીત-રિવાજ અને સામાજિક ધોરણે પણ ઘણી જાણકારી બની ગઈ હતી. એટલે પોતાની અસલી ઓળખ સંપૂર્ણપણે છુપાવવા માટે અય્યુબભાઈ બિસ્વાસની આ દીકરીએ 'ઋતુ પટેલ' એવું નકલી ભારતીય નામ ધારણ કરી લીધું. એટલું જ નહીં, નામ અને શહેર બદલાની સાથે તેણે કામ પણ બદલી નાખ્યું. તે રાજકોટના કાલાવડ રોડ પર આવેલી આદિત્ય-79 આવાસ યોજનામાં ભાડેથી રહેવા લાગી અને ઈમિટેશન જ્વેલરીના મજૂરી કામમાં જોડાઈ ગઈ, જેથી કોઈને તેના વિદેશી હોવાની શંકા ન જાય. પરંતુ લગભગ 13 વર્ષ સુધી ભારતમાં ઘૂસણખોરી બાદ સંતાઇને રહેનારી જુમ્મી ઉર્ફે ઋતુ પટેલ આખરે પોલીસના હાથે ઝડપાઈ ગઈ. ધરપકડ સમયે તેની પાસેથી કાયદેસરનો પાસપોર્ટ કે વિઝા મળી આવ્યા નહોતા. પરંતુ પુરાવા તરીકે બાંગ્લાદેશની જેસોર મ્યુનિસિપાલિટીનું સિટિઝનશિપ સર્ટિફિકેટ હતું. પોલીસે આ સર્ટિફિકેટ વેરિફાય કર્યું અને આ મહિલા બાંગ્લાદેશી હોવાની ખરાઈ થઈ. કિસ્સો- 2 13 વર્ષની ઉંમરે લગ્ન, ફેસબુક ફ્રેન્ડે બોર્ડર ક્રોસ કરાવી બાંગ્લાદેશના હીડિયા ગામમાં અફસાના ખાતૂન ઉર્ફે સુમી નામની એક છોકરી રહેતી હતી. સાત ચોપડી ભણી અને પછી શાળાએ જવાનું બંધ કરી દીધું. તેના પિતા અને મોટો ભાઈ રિયાઝ શેખ ફર્નિચરનો ધંધો કરતા હતા. આશરે 13 વર્ષની ઉંમરે અફસાનાના લગ્ન નજીકમાં જ આવેલા નવાલી ગામના હિદાયત સરદાર સાથે થયા, જેનાથી તેને એક દીકરી પણ થઈ. પરંતુ ચાર જ વર્ષમાં અફસાનાના છૂટાછેડા થઈ ગયા. અફસાના પિતાના ઘરે આવીને રહેવા લાગી. થોડા સમય પછી અફસાનાએ પોતાના જ પિતાની ફર્નિચરની દુકાનમાં કામ કરતા બાંગ્લાદેશી રાશિદ શેખ સાથે બીજા લગ્ન કર્યા, જેનાથી તેને એક દીકરો થયો. જો કે આ લગ્નજીવનમાં પણ મોટો વળાંક આવવાનો બાકી હતો. ગયા વર્ષે ફેસબુક પર તેનો કોન્ટેક્ટ બાંગ્લાદેશી મિત્ર સોબુજ સાથે થયો. અફસાનાના મનમાં ભારત આવીને ગમે તે ભોગે પૈસા કમાવવાની લાલસા જાગી. સોબુજે તેને ગેરકાયદેસર રીતે ભારતમાં ઘુસાડવા માટે એક આખું નેટવર્ક ગોઠવી આપ્યું. તેણે પોતાના બંને બાળકોને બાંગ્લાદેશમાં પોતાની માતા સાજેદા બેગમ પાસે છોડી લીધા. પતિને પણ છોડી દીધો અને એજન્ટ સાથે નીકળી પડી. એજન્ટ સોબુજ તેને બાંગ્લાદેશથી સરહદ પાર કરાવીને ગુપ્ત રીતે કોલકાતા લઈ આવ્યો. ત્યાંથી બીજા એજન્ટોને સોંપી દીધી. નવો એજન્ટ તેને સીધા બેંગલુરુ શહેરમાં લઈ ગયા, જ્યાં તે પાંચ-છ દિવસ છુપાઈને રહી. અફસાનાની આ ગેરકાયદેસર સફર પાછળ આંતરરાજ્ય માનવ તસ્કરી અને એજન્ટોનું મોટું નેટવર્ક સક્રિય હતું. બેંગલુરુથી એક એજન્ટે મુંબઈના રાહુલ નામના એજન્ટનો સંપર્ક કર્યો અને તેના માધ્યમથી અફસાના મુંબઈ આવી પહોંચી, જ્યાં તે મજૂરી કામ કરવા લાગી. મુંબઈમાં થોડો સમય રહ્યા પછી અફસાનાએ કોઈક રીતે સુરતના ઓલપાડમાં રહેતા રોહિત નામના અન્ય એક એજન્ટનો સંપર્ક સાધ્યો. રોહિત તેને સુરત ઓલપાડ લઈ ગયો, જ્યાં તે નવ મહિના સુધી ઓળખ છુપાવીને રહી અને મજૂરી કામ કરતી રહી. આ નેટવર્કની ચેઇન અહીં જ અટકી નહોતી. રોહિતે રાજકોટના રણભાઈનો સંપર્ક કરીને અફસાનાને રાજકોટ મોકલી આપી. રાજકોટ આવ્યા બાદ અફસાના એક ઓરડી રાખીને છૂપી રીતે રહેવા લાગી. જો કે, લાંબો સમય કાયદાની નજરોથી બચવું શક્ય નહોતું. તારીખ 13 મે 2025ના રોજ પોલીસની ટીમે ત્યાં ઓચિંતો દરોડો પાડ્યા અને અફસાનાને કસ્ટડીમાં લીધી. શરૂઆતની પૂછપરછમાં તે ખૂબ જ ગભરાઈ ગઈ અને કોઈ સાચો જવાબ આપી શકી નહીં. પરંતુ આખરે સઘન પૂછપરછ દરમિયાન તેણે ઘૂસણખોરીથી માંડીને ભારતના જે-જે શહેરોમાં રહી એ વિશે ઓનરેકોર્ડ નિવેદન આપ્યા, જેનાથી એજન્ટો કઇ હદે સક્રિય છે એ વાતનો પર્દાફાશ થયો. અફસાના પાસેથી ભારતમાં રહેવાના કોઈ ડોક્યુમેન્ટ ન મળ્યા. પરંતુ બાંગ્લાદેશનો બર્થ સર્ટિફિકેટ અને એક મોબાઈલ ફોન મળી આવ્યો. કિસ્સો-3 બોર્ડર ક્રોસ કરવા કિન્નરોના ટોળાનો સહારો લીધો બાંગ્લાદેશના હકીમપુરથી શરૂ થતી આ કહાની રૂપાલી ખાતૂનની છે. તેના પિતા નુરુલ હક સરદાર બાંગ્લાદેશમાં ખેતીકામ કરે છે, જ્યારે તેની માતા ઝોરાના બેગમનું ગયા વર્ષે મૃત્યુ થઈ ચૂક્યું છે. બાંગ્લાદેશમાં તેના પાંચ ભાઈઓ તથા તેના બે દીકરા છે. આવો પરિવાર હોવા છતાં પણ રૂપિયાની લાલચ રૂપાલીને ભારત ખેંચી લાવી. આ પ્રકરણની શરૂઆત આશરે 8 વર્ષ પહેલાં થઈ. રૂપાલી તેના કાકીના દીકરા અને તેની પત્ની સાથે બાંગ્લાદેશના હકીમપુરથી નીકળી. સુરક્ષાદળોની નજરે ચડ્યા વગર તેઓએ પશ્ચિમ બંગાળના માલસંદ વિસ્તારમાં પ્રવેશવા માટે જંગલના રસ્તાનો ઉપયોગ કર્યો અને સીધા સિયાલદહ પહોંચ્યા. ત્યાંથી બસ પકડીને હાવડા આવ્યા અને હાવડાથી ટ્રેન બદલીને સીધા ગુજરાતના રાજકોટ આવી પહોંચ્યા. અહીં ચાર મહિના સુધી ગેરકાયદેસર રીતે વસવાટ કર્યા બાદ તેઓ પાછા બાંગ્લાદેશ ભાગી ગયા હતા. પરંતુ ભારતની રહેણીકહેણી રૂપાલીને ફરી ખેંચી લાવી. બાંગ્લાદેશમાં માત્ર 5 મહિના રોકાયા બાદ, તેણે ઈકબાલ નામના એક એજન્ટનો સંપર્ક કર્યો. ઈકબાલને 7 હજાર રૂપિયા આપ્યા. તેણે ફરી એકવાર જંગલના રસ્તાનો ઉપયોગ કરીને ભારતમાં ઘૂસણખોરી કરી. આ વખતે તે સીધી રાજકોટ આવી અને અહીં મજૂરી કામ કરવા લાગી. આ ગેરકાયદેસર કમાણીના નાણાં બાંગ્લાદેશ મોકલવા માટે પણ ભારતના કાયદાની આંખમાં ધૂળ નાખતું એક આખું નેટવર્ક સક્રિય હતું. રૂપાલી પોતાની કમાણીના પૈસા રાજુ નામના એક એજન્ટને મોકલતી હતી, જે સ્ટેટ બેંક ઓફ ઈન્ડિયાનો એકાઉન્ટ હોલ્ડર હતો. રાજુ પોતાનું 7% કમિશન ફી કાપીને આ ગેરકાયદેસર નાણાં બાંગ્લાદેશમાં રૂપાલીના પરિવાર સુધી પહોંચાડવાની ગેરંટી આપતો હતો. રૂપાલી ખાતૂન આંતરરાષ્ટ્રીય સરહદ અને કાયદાને કેટલી હદે સામાન્ય ગણતી હતી, તેનો અંદાજ એ વાત પરથી લગાવી શકાય કે તેણે ભારતમાં અવરજવર કરવા માટે એજન્ટોને 3 થી 4 વખત 6000થી 7000 ચૂકવ્યા હતા. એટલું જ નહીં, છેલ્લી વખત બોર્ડર ક્રોસ કરવા માટે તેણે સુરક્ષા એજન્સીઓને ભ્રમિત કરવાના ઈરાદાથી કિન્નરના ટોળાનો સહારો લીધો હતો અને તેમની સાથે ભળીને બોર્ડર પાર કરી ગઈ હતી. તે છેલ્લા 5 વર્ષથી રાજકોટમાં ગેરકાયદેસર રીતે રહેતી હતી. પરંતુ આખરે તે પકડાઈ ગઈ. ધરપકડ દરમિયાન તેની પાસેથી ભારતનો કોઈ માન્ય દસ્તાવેજ મળ્યો નથી. પુરાવા તરીકે માત્ર 'ગવર્મેન્ટ ઓફ પીપલ્સ રિપબ્લિક ઓફ બાંગ્લાદેશ' નું નેશનલ આઈડી કાર્ડ જ મળ્યું. કિસ્સો- 4 બ્યૂટીપાર્લરમાં કામની લાલચે આવી, મજૂરી કરવી પડી બાંગ્લાદેશની રાજધાની ઢાકાની નજીક નારાયણગંજ જિલ્લો આવેલો છે. જેને ભારતના પૂર્વોત્તરના રાજ્ય ત્રિપુરાની બોર્ડર અડે. નારાયણગંજ જિલ્લાના કમરંગીરચરમાં રુઝીના અખ્તાર નામની એક યુવતી રહેતી હતી. તેની ઉંમર માંડ 26 વર્ષ. મોહમ્મદ અસ્કાર અલીની આ દીકરીએ જે રીતે ભારતમાં ઘૂસણખોરી કરી એ ઘટનાક્રમ પણ ગજબનાક છે. આશરે ચાર વર્ષ પહેલાં એટલે કે 2022ની આસપાસ રુઝીનાની મુલાકાત હુસેન નામના એક એજન્ટ સાથે થઈ. હુસેને તેને કહ્યું કે ભારતમાં જઇશ તો ત્યાં તને બ્યૂટીપાર્લરનું કામ મળશે. આ સિવાયના કામમાં પણ સારી એવી કમાણી થશે. એજન્ટ હુસેનની વાત સાંભળીને રુઝીનાના મનમાં પણ ઘણી લાલચ જાગી. ઝડપથી કમાણી કરી લેવાના ઈરાદા સાથે એજન્ટ સાથે મળીને બોર્ડર પાર કરવાનો એક આખો પ્લાન તૈયાર કરવામાં આવ્યો. પાસપોર્ટ, વિઝા વગર રુઝીનાએ એજન્ટ હુસેનની મદદથી બોર્ડર પાર કરી લીધી. તે સૌથી પહેલાં પશ્ચિમ બંગાળના કોલકાતા શહેરમાં આવી પહોંચી. પરંતુ ત્યાંથી તેણે અન્ય ઘૂસણખોરો કરતા અલગ રૂટ પકડ્યો. રુઝીના કોલકાતાથી ટ્રેન પકડીને સીધી આસામના ગુવાહાટી શહેરમાં પહોંચી ગઈ. ગુવાહાટીમાં થોડો સમય વિતાવ્યા બાદ તે ફરીથી ટ્રેન મારફતે પૂર્વ ભારતથી છેક પશ્ચિમ ભારતના ડાયમંડ સિટી એવા સુરત શહેરમાં આવી પહોંચી. સુરતના ભાગાતળાવ વિસ્તારમાં આવેલી નલબંધી ગલીની 'અલ-ખેર રેસિડેન્સી'માં તેણે પોતાનું નવું ઠેકાણું બનાવ્યું. અહીં રહીને તેણે મજૂરી કામ શરૂ કર્યું. થોડા સમય સુધી સુરતમાં રોકાયા પછી તે રાજકોટ પહોંચી ગઈ અને ત્યાં પણ મજૂરી કામ કરવા લાગી. જો કે થોડા સમય પહેલાં તે રાજકોટ પોલીસના હાથે ઝડપાઈ ગઈ. ધરપકડ સમયે કાયદેસર રીતે ભારતમાં રહેવા માટેનો એક પણ દસ્તાવેજ તેની પાસે ન હોતો. પુરાવા તરીકે તેની પાસે માત્ર બાંગ્લાદેશનું બર્થ સર્ટિફિકેટ હતું, જેનાથી પુરવાર થયું કે તે ભારતની નાગરિક નથી.