‘મફતની મલાઈ બંધ થતાં ખાખીનો આતંક શરૂ’:‘સુરતમાં ચા-નાસ્તો ન આપતા કસ્ટડીમાં લઈ વેપારીને 350થી વધુ ડંડા માર્યા’; સાણંદ પોલીસ મથકમાં આરોપીને ઝાડ સાથે બાંધી માર્યો

સુરતના લીંબાયત વિસ્તારમાં કાયદો અને વ્યવસ્થાના રક્ષકો જ ભક્ષક બન્યા હોવાની એક અત્યંત ચોંકાવનારી અને માનવતાને શર્મસાર કરતી ઘટના સામે આવી છે. લીંબાયત પોલીસ સ્ટેશનના પીએસઆઈ જાડેજા અને ડી-સ્ટાફના માણસો સામે એક સ્થાનિક હોટલ વેપારીએ ગંભીર આક્ષેપો કરતી અરજી સુરત પોલીસ કમિશનરને કરી છે. વેપારીનો આક્ષેપ છે કે રોજ-રોજ મફતમાં ચા, માવો અને નાસ્તો આપવાની ના પાડતા પોલીસે કાયદાનો દુરુપયોગ કરી તેને રાત્રિના સમયે દુકાનેથી ઉઠાવી લીધો હતો અને જાતિસૂચક અપશબ્દો કહી પોલીસ સ્ટેશનમાં લઈ જઈ બેરહેમીપૂર્વક થર્ડ ડિગ્રી ટોર્ચર આપ્યું હતું. આ સમગ્ર મામલો મીડિયામાં ઉજાગર થતાં અને સીસીટીવી ફૂટેજ સામે આવતા જ ઉચ્ચ પોલીસ અધિકારીઓ એક્શનમાં આવ્યા છે અને ડીસીપી ડૉ. કાનન દેસાઈએ તાત્કાલિક અસરથી આ મામલે કડક તપાસના આદેશ આપ્યા છે. અમદાવાદ જિલ્લાના સાણંદ પોલીસ સ્ટેશનમાં કાયદા રક્ષકો દ્વારા જ કાયદો હાથમાં લઈને આરોપીઓને તાલિબાની સજા આપવામાં આવી હોવાની ચોંકાવનારી ઘટના સામે આવી છે. પોલીસે છેડતીના ગુનામાં પકડેલા બે આરોપીને પોલીસ સ્ટેશનના કમ્પાઉન્ડમાં જ ઝાડ સાથે બાંધીને બેરહેમપણે મારમાર્યો હતો. આરોપીઓને બાંધી રાખ્યા હોવાનો ફોટો સોશિયલ મીડિયા પર વાઇરલ થતાં ચકચાર મચી ગઈ છે. આ મામલે સાણંદ પોલીસ સ્ટેશનના પીઆઈએ ભાસ્કર સાથેની વાતચીતમાં વિવાદાસ્પદ નિવેદન આપતા જણાવ્યું હતું કે, આરોપીઓને 'પનીશમેન્ટ' આપી છે. ઉલ્લેખનીય છે કે, સુપ્રિમ કોર્ટના આદેશ સાથે હાલમાં રાજ્યના DGPએ પણ પરિપત્ર કરી આરોપીઓના સરઘસ કાઢવા, માર મારવા પર સ્પષ્ટ પ્રતિબંધ મુક્યો છે, છતાં અધિકારીએ આ આદેશને ઘોળીને પી રહ્યાં છે. મફતની મલાઈ બંધ થતાં જ ખાખીનો આતંક શરૂ થયો ભોગ બનનાર વેપારી મનોજ બાબુરામ સરોજે પોલીસ કમિશનરને આપેલી અરજીમાં હકીકત જણાવી છે. તેઓ છેલ્લા 5 વર્ષથી લીંબાયત વિસ્તારમાં 'યાદવ ટી-સેન્ટર' નામની હોટલ ચલાવી પોતાના પરિવારનું ગુજરાન ચલાવે છે. મનોજનો આક્ષેપ છે કે લીંબાયત પોલીસ સ્ટેશનના પીસીઆર વાન, ડી-સ્ટાફ અને અન્ય પોલીસકર્મીઓ અવારનવાર તેમની દુકાને આવી મફતમાં ચા, પાણી, નાસ્તો તેમજ માવો વગેરે લઈ જતા હતા. તેઓ નાના માણસ હોવાથી અત્યાર સુધી પોલીસના ડરથી બધું મફત આપતા હતા. પરંતુ છેલ્લા કેટલાક સમયથી પોલીસકર્મીઓ રોજનો 600થી 700નો મફત નાસ્તો લઈ જતા હોવાથી આર્થિક નુકસાન સહન ન થતાં વેપારીએ પૈસાની માંગણી કરી હતી. બસ આ જ વાતની અદાવત રાખીને પોલીસે વેપારીને ધમકી આપવાનું શરૂ કર્યું હતું. ‘રાત્રિના અંધકારમાં પોલીસ સ્ટાફે ગલીઓમાં આતંક મચાવ્યો’ ઘટનાની વિગત આપતા વેપારીએ જણાવ્યું કે, 13 જુલાઈની રાત્રે આશરે 10:30થી 11 વાગ્યાની આસપાસ તેઓ દુકાન બંધ કરી રહ્યા હતા. તેમનો નાનો છોકરો બહાર ઝાડુ મારી રહ્યો હતો અને બીજો છોકરો વાસણ સાફ કરતો હતો. તે સમયે ડી-સ્ટાફના માણસો નંબર પ્લેટ વગરની રિક્ષા અને બાઈક લઈને ધસી આવ્યા હતા અને કોઈ પણ વાંક ગુના વગર ઝાડુ મારી રહેલા છોકરાને જબરદસ્તી બાઈક પર બેસાડવા લાગ્યા હતા. જ્યારે મનોજ સરોજ હોટલની અંદરથી ગલ્લો લઈને બહાર આવ્યા અને પૂછ્યું કે, સર, શું વાત છે? કેમ છોકરાને પકડીને લઈ જઈ રહ્યા છો? ત્યારે ઉશ્કેરાયેલા પોલીસકર્મીઓએ કહ્યું કે, તને આ બધું પૂછવાનો કોઈ અધિકાર નથી, આ છોકરાને છોડો અને પેલા ગલ્લાવાળાને પકડો. ‘હોટલના ગલ્લામાંથી 10,000 લૂંટ્યા, 50,000ની લાંચ માંગી’ પોલીસે જેવો મનોજ સરોજને પકડવાનો પ્રયાસ કર્યો એટલે તેમણે પોતાની નિર્દોષતા સાબિત કરવા કહ્યું કે, મારી દુકાન બંધ છે અને મારી પાસે સીસીટીવી કેમેરાનું સબૂત પણ છે. આ સાંભળતા જ પોલીસ જવાનો બેકાબૂ બન્યા હતા અને લાકડીઓથી મનોજને માર મારવાનું શરૂ કર્યું હતું. જીવ બચાવવા માટે વેપારી ગલીમાં ભાગ્યો તો પોલીસે પાછળ દોડીને તેને રસ્તા પર પાડી દીધો હતો અને ઢસડતા ઢસડતા દુકાન પાસે લાવ્યા હતા. આ દરમિયાન પોલીસે હોટલના ગલ્લામાંથી બળજબરીપૂર્વક 10,000 રોકડા કાઢી લીધા હતા. આટલેથી ન અટકતા, કેસ ન કરવાના અવેજમાં વેપારી પાસે 50,000ની લાંચની માંગણી કરવામાં આવી હતી. આ રકમ આપવાની ના પાડતા વેપારી પર અત્યાચાર ગુજારવામાં આવ્યો હતો. ‘પુરાવાનો નાશ કરવા માટે દુકાનનું DVR જ ઉખાડી ગયા’ પોલીસ જાણી ગઈ હતી કે તેમની આ ગુનાહિત પ્રવૃત્તિ દુકાનમાં લાગેલા સીસીટીવી કેમેરામાં કેદ થઈ રહી છે. આથી પોતાની જાતને બચાવવા માટે લીંબાયત ડી-સ્ટાફના માણસો દુકાનની અંદર ઘૂસ્યા હતા અને સીસીટીવી કેમેરાનું આખું ડીવીઆર (DVR) બોક્સ જ બળજબરીપૂર્વક ઉખાડીને પોતાની સાથે લઈ ગયા હતા જેથી કોઈ સબૂત ન બચે. જોકે, આ સમગ્ર ઘટનાક્રમ આસપાસના અન્ય કેમેરામાં અને સ્થાનિક લોકોના મોબાઈલમાં કેદ થઈ ગયો હતો, જેમાં પીએસઆઈ સહિતના અન્ય પોલીસ કર્મીઓ હાથમાં ડંડા લઈ ગલીઓમાં દોડતા સાફ નજરે પડી રહ્યા છે, જે હવે પોલીસ માટે મોટું ગળાનું હાડકું સાબિત થશે. ‘ડી-સ્ટાફ રૂમમાં 250થી વધુ લાકડીના ફટકા માર્યા’ વેપારી મનોજ સરોજે પોલીસ ચોકી અને સ્ટેશનની અંદર પોતાની સાથે થયેલા ભયાનક અત્યાચારની આપવીતી વીડિયો ટ્રાન્સક્રિપ્શનમાં રડતા રડતા જણાવી છે. તેમણે કહ્યું કે, મને લીંબાયત પોલીસ સ્ટેશનના ડી-સ્ટાફ રૂમમાં લઈ જઈ ભોંયતળિયે ઊંધો સુવડાવી દેવાયો હતો. એક પોલીસકર્મી મારા એક પગ પર ચઢી ગયો, બીજો બીજા પગ પર ચઢી ગયો અને ત્રીજાએ મોઢું દબાવી રાખ્યું હતું. ત્યારબાદ ડંડા વડે મારા પગના તળિયા અને પાછળના ભાગે બેરહેમીથી માર મારવામાં આવ્યો હતો. 350થી વધુ ડંડા મને મારવામાં આવ્યા હતા. દોઢ કલાક સુધી મારી સતત પિટાઈ કરવામાં આવી હતી. હોસ્પિટલના બિછાને સારવાર હેઠળ પીડિત વેપારી આ અમાનુષી મારના કારણે વેપારી મનોજ સરોજના બંને પગમાં ગંભીર સોજા આવી ગયા છે, લોહી જામી ગયું છે અને જમણા પગે ઘૂંટણની નીચે ઊંડા ઘા પડી ગયા છે. જ્યારે હોટલના મકાન માલિકને ખબર પડી ત્યારે તેઓ પોલીસ સ્ટેશન દોડી આવ્યા હતા અને વેપારીની હાલત જોઈ ચકરાઈ ગયા હતા. વેપારીના ધબકારા વધી જતાં હોસ્પિટલ લઈ જવાની વિનંતી કરતા આખરે પોલીસે મોડી રાત્રે તેમને સ્મીમેર હોસ્પિટલમાં દાખલ કર્યા હતા. જ્યાં ડૉક્ટર સની ધારીયા પાસે વેપારીની સારવાર કરાવવામાં આવી છે અને તેનો એમ.એલ.સી. (MLC) કેસ નંબર 14827 નોંધવામાં આવ્યો છે, જે પોલીસ વિરુદ્ધ પાકો તબીબી પુરાવો છે. સીસીટીવી ફૂટેજ સોશિયલ મીડિયા પર વાઇરલ થતાં ખળભળાટ પોલીસે ભલે દુકાનનું ડીવીઆર ગેરકાયદેસર રીતે જપ્ત કરી લીધું હોય, પરંતુ ગલીમાં હાથમાં ડંડા લઈને દોડતા પોલીસકર્મીઓનો વીડિયો સોશિયલ મીડિયા પર વાઇરલ થઈ ગયો છે. આ વીડિયો ડિજિટલ પ્લેટફોર્મ પર આવતા જ સુરત પોલીસની છબી ખરડાઈ છે. સામાન્ય જનતામાં રોષ વ્યાપી ગયો છે કે જો મફત ચા-પાણી ન આપવા બદલ પોલીસ આ હદ સુધી જઈ શકતી હોય, તો સામાન્ય નાગરિકોની સુરક્ષા કોના ભરોસે? આ વીડિયો ફૂટેજ જ હવે તપાસ સમિતિ સમક્ષ પોલીસની બર્બરતાની ચાડી ખાશે. ડીસીપી ડૉ. કાનન દેસાઈએ આપ્યા કડક તપાસના આદેશ આ મામલો સુરત પોલીસ કમિશનર ઓફિસ સુધી પહોંચતા જ સમગ્ર પોલીસ વિભાગ હરકતમાં આવી ગયો છે. આ મામલાની ગંભીરતાને જોતા ઝોનના ડીસીપી ડૉ. કાનન દેસાઈએ તાત્કાલિક અસરથી તપાસના આદેશ જારી કર્યા છે. ઉચ્ચ અધિકારીઓ દ્વારા આ મામલે કાયદેસરની તપાસ શરૂ કરવામાં આવી છે અને સ્મીમેર હોસ્પિટલના મેડિકલ રિપોર્ટ્સ તેમજ વાઇરલ સીસીટીવી ફૂટેજને પુરાવા તરીકે લેવામાં આવ્યા છે. પીડિત વેપારી મનોજ કુમારે હાથ જોડીને ઉચ્ચ અધિકારીઓ પાસે માગ કરી છે કે ગુનેગાર પોલીસકર્મીઓ સામે લૂંટ, બળજબરીપૂર્વક નાણાં કઢાવવા અને કસ્ટોડિયલ ટોર્ચરનો ગુનો દાખલ કરી તેમની તાત્કાલિક ધરપકડ કરવામાં આવે અને તેમને ન્યાય અપાવવામાં આવે. પાણીપુરી ખાવા ગયેલી યુવતીની છેડતી કરી હતી સાણંદના બનાવની વિગતો મુજબ, સાણંદ વિસ્તારમાં રહેતી એક યુવતી તેના ફિયાન્સ (મંગેતર) સાથે પાણીપુરી ખાવા ગઈ હતી, ત્યારે બે યુવકે તેની છેડતી કરીને હાથ પકડી લીધો હતો. આ આરોપીઓ સતત યુવતીનો પીછો કરીને તેને દબાણ કરી હેરાન-પરેશાન કરતા હતા. યુવતીની ફરિયાદના આધારે સાણંદ પોલીસે બંને આરોપીની ધરપકડ કરી હતી. સાણંદ પોલીસ સ્ટેશનના પીઆઈ બી.ટી. ગોહિલે જણાવ્યું હતું કે, આરોપીઓની પજવણીના કારણે યુવતી આપઘાત કરવા સુધી મજબૂર થઈ ગઈ હતી. વીડિયો ઉતારનારનો મોબાઈલ પોલીસે આંચકી લીધો ધરપકડ કર્યા બાદ પોલીસે બંને આરોપીઓને કાયદાકીય પ્રક્રિયાના બદલે પોલીસ સ્ટેશનની અંદર જ આવેલા એક ઝાડ સાથે બાંધી દીધા હતા અને લાકડીઓ વડે ઢોરમાર માર્યો હતો. આ ગેરકાયદેસર કૃત્ય દરમિયાન પીઆઈ પોતે પણ સાદા કપડામાં ત્યાં હાજર હતા. પોલીસ સ્ટેશનમાં ચાલી રહેલા આ આતંકનો જ્યારે એક વ્યક્તિ પોતાના મોબાઈલ કેમેરામાં વીડિયો ઉતારી રહ્યો હતો, ત્યારે પોલીસે તેનો મોબાઈલ ફોન પણ આંચકી લીધો હતો. કાયદાના રક્ષકો જ બન્યા ભક્ષકો સાણંદ પોલીસ સ્ટેશનના પીઆઈ બી.ટી. ગોહિલે જાહેરમાં સ્વીકાર્યું હતું કે છેડતીના મામલે આરોપીઓને આ પ્રકારની પનીશમેન્ટ આપવામાં આવી છે. જોકે, ન્યાયિક પ્રક્રિયા અને કોર્ટની મંજૂરી વિના પોલીસ સ્ટેશનની અંદર જ આરોપીઓને ઝાડ સાથે બાંધીને માર મારવાની આ અમાનવીય ઘટનાએ પોલીસ પ્રશાસનની કાયદો અને વ્યવસ્થા જાળવવાની પદ્ધતિ સામે ગંભીર સવાલો ઊભા કર્યા છે.