ઝનૂની વસીમે પ્રાચીનું ગળું દાબી દીધું:બ્રેકઅપ પછી પણ વસીમ પીછો છોડતો નહોતો; એ રાત્રે 3 વાગ્યે બાઈક પર પીછો કર્યો ને પ્રાચીની એક ભૂલ નડી ગઈ

ગુજરાત ક્રાઇમ ફાઇલ્સના પહેલા એપિસોડમાં તમે જાણ્યું કે 25 વર્ષની પ્રાચી મૌર્યએ ડ્રામા આર્ટિસ્ટ તરીકે એપ્લોઝ સ્ટુડિયોમાં કામ શરૂ કર્યું હતું. પંદરેક દિવસ બાદ તે 17 લોકોના ગ્રુપ સાથે ખંભાતમાં સ્પીચલેસ નામનો શો કરવા ગઇ હતી. શો પૂરો કર્યા બાદ તે મોડી રાત્રે વડોદરા પાછી આવી હતી. અહીં તેને સ્ટુડિયોથી ઘર સુધી મુકવા માટે અંકિત નામનો એક યુવાન તેની સાથે ગયો હતો. જો કે પ્રાચી પોતાના ઘરે પહોંચી નહોતી. બીજા દિવસે સવારે નંદ સોસાયટી પાસે તેની લાશ મળી આવી હતી. લાશને જોતાં એટલું સ્પષ્ટ થઇ ગયું હતું કે પ્રાચીની હત્યા થઇ છે. હત્યા કોણે અને શા માટે કરી હતી? આ સવાલ પરથી પડદો ઊંચકાશે આજના એપિસોડમાં.... પ્રાચીની હત્યાના તાર 2015ના ભૂતકાળ સાથે જોડાયેલા છે. પ્રાચી એન્જિનિયરિંગના 5માં સેમેસ્ટરમાં અભ્યાસ કરતી હતી ત્યારે તેને ત્રીજા સેમેસ્ટરમાં અભ્યાસ કરતાં વસીમ મલેક નામના યુવાન સાથે પ્રેમ થઇ ગયો હતો. વસીમ પ્રાચીના ઘરે તેની પાસે ટ્યૂશન લેવા પણ જતો હતો. આમ બન્ને એકબીજાની વધુ નજીક આવ્યા હતા. બન્નેના પ્રેમ સંબંધની પ્રાચીના ઘરે પણ જાણ હતી. ખુદ પ્રાચીએ તેની બહેન સચીને કહ્યું હતું કે અમારે પ્રેમ સંબંધ છે. જો કે થોડા વર્ષો પછી તેમનું બ્રેકઅપ થઇ ગયું હતું. બ્રેકઅપ થયા બાદ પણ વસીમે પ્રાચીનો પીછો નહોતો છોડ્યો. તે પ્રાચીને સતત ફોન કરતો હતો. જેથી કંટાળીને પ્રાચીએ નવો મોબાઇલ અને સીમ કાર્ડ લીધા હતા. એકવખત સચીની હાજરીમાં પ્રાચી પર વસીમનો ફોન આવ્યો હતો. તેણે પ્રાચીને પરાણે મળવા બોલાવી હતી અને કહ્યું હતું કે તું મળવા નહીં આવે તો હું મરી જઇશ. જેના પછી પ્રાચી તેને મળવા ગઇ હતી ત્યારે વસીમે તેને ચપ્પુ બતાવીને ધમકી આપી હતી. પ્રાચીએ આ વાત સચીને કહી હતી પણ મમ્મી કે બીજા કોઇને વાત ન કરવાનું કહ્યું હતું. વસીમ ઘણીવાર પ્રાચીને હેરાન પરેશાન કરતો રહેતો. પ્રાચી અને તેનું ગ્રુપ જ્યારે ખંભાતથી ડ્રામા શો કરીને વડોદરા પરત ફરી રહ્યું હતું ત્યારે પણ વસીમ પ્રાચીનો સંપર્ક કરવાની કોશિષ કરતો હતો. બસ આ એ જ રાત હતી જે પ્રાચીના જીવનની અંતિમ રાત બની રહેવાની હતી. તારીખઃ 24 એપ્રિલ, 2019 સમયઃ રાત્રે 12 વાગ્યા આસપાસ વસીમે પોતાના પિતાના મોબાઇલમાંથી પ્રાચી સાથે ખંભાત ગયેલા ગ્રુપના સભ્ય વત્સલ ધમાણીના મોબાઇલ પર ફોન કર્યો હતો. બન્ને વચ્ચે અંદાજે ચાલીસેક સેકન્ડ વાતચીત થઇ હતી. વસીમઃ તમે ખંભાતથી નીકળી ગયા છો? વત્સલઃ હા, અમે નીકળી ગયા છીએ પણ તમે કોણ બોલો છો? વસીમઃ હું વસીમ બોલું છું અને પ્રાચીનો કોન્ટેક્ટ કરવાની કોશિષ કરી રહ્યો છું પણ તેનો કોન્ટેક્ટ નથી થતો. આના પછી વત્સલે પ્રાચીને કહ્યું હતું કે વસીમનો ફોન છે અને તે તારી સાથે વાત કરવા માગે છે પણ પ્રાચીએ ના પાડી દીધી હતી. વત્સલઃ પ્રાચી વાત કરવા નથી માંગતી. વસીમઃ તમને વડોદરા આવતા કેટલીવાર લાગશે? વત્સલઃ અંદાજે સવાથી દોઢ કલાક લાગશે. વત્સલ પાસેથી વડોદરા પહોંચવાનો સમય જાણી લીધા બાદ વસીમ પ્રાચીને મળવા અધીરો બન્યો હતો. રાત્રે એકાદ વાગ્યે વસીમ એક ખાનગી બેન્કના ATM પર ગયો હતો અને ત્યાંથી 600 રૂપિયા ઉપાડ્યા હતા. આ વખતે ત્યાં મનોજ શિંદે નામનો સિક્યોરિટી ગાર્ડ હાજર હતો. વસીમે કાર્ડ સ્વાઇપ કરતી વખતે તેને પૂછ્યું હતું કે મશીનમાં 100 રૂપિયાની નોટ છે કે કેમ? જેથી મનોજ શિંદેએ હા પાડી હતી. ATMમાંથી રૂપિયા ઉપાડતી વખતે વસીમે 1-2 વખત બહાર નજર કરી હતી. જેથી સિક્યોરિટી ગાર્ડે તેને પૂછ્યું હતું કે તમે નાઇટ શિફ્ટમાં જાઓ છો? ત્યારે વસીમે તેને એવું કહ્યું હતું કે મારે પૈસા ઉપાડીને પપ્પાને આપવાના છે અને કાલે સવારે મારે કોલેજ જવાનું છે. અત્યારે હું મારા મિત્રને લેવા આવ્યો છું. હકીકતમાં વસીમ પ્રાચી સ્ટુડિયો પર ક્યારે પાછી આવે છે તેની રાહ જોતો હતો. ATMમાંથી રૂપિયા ઉપાડીને વસીમ બહાર ગયો અને બેંકની સામે પાર્ક કરેલી પોતાની બાઇક પર બેઠો હતો. થોડીવાર પછી તે ચીકુવાડી 3 રસ્તા પાસે જઇને બેઠો હતો. અહીંથી એપ્લોઝ સ્ટુડિયો એકદમ નજીક હતો. અંદાજે દોઢેક વાગ્યાના અરસામાં એક ટેમ્પો ટ્રાવેલર્સ ચીકુવાડીની અંદર ગઇ હતી. જેને જોતાં જ વસીમને ખ્યાલ આવી ગયો કે પ્રાચી આમાં જ હશે એટલે 2-3 મિનિટ બાદ વસીમ પણ તેની પાછળ પાછળ ગયો હતો. તેણે ત્યાં જઇને ખાતરી કરી લીધી કે પ્રાચી આ વાહનમાં જ છે કે નહીં? જેના પછી વસીમ પાછો આવીને ચીકુવાડી 3 રસ્તા પાસે ઊભો રહી ગયો હતો. થોડી જ વારમાં પ્રાચી અને અંકિત પોતાના વ્હીકલ પર ત્યાંથી નીકળ્યા હતા. આ સમયે વસીમે પ્રાચીને ઇશારો કરીને ઊભી રાખી હતી. પ્રાચીઃ વસીમ, આટલી રાત્રે તું અહીંયા શું કરે છે? અંકિત મને ઘરે છોડવા આવે છે, તું તારા ઘરે જતો રહે. પ્રાચીએ વસીમને આવું કહેતાં અંકિતે તેને પૂછ્યું હતું કે આ કોણ છે? તો પ્રાચીએ તેને કહ્યું હતું મારે એક્સ બોયફ્રેન્ડ છે અને થોડો બેવકૂફ છે. વસીમ સાથે વાતચીત કર્યા બાદ પ્રાચી એક્ટિવા ચાલુ કરીને ઝડપથી ચકલી સર્કલ તરફ જતી રહી હતી એટલે અંકિત પણ તેની પાછળ નીકળી ગયો. બન્ને ત્યાંથી નીકળી જતાં વસીમે તેમનો પીછો શરૂ કર્યો હતો. આ તરફ પ્રાચી અને અંકિત જાણી ગયા હતા કે વસીમ તેમનો પીછો કરે છે. જેથી પ્રાચીએ અંકિતને એવું કહ્યું હતું કે આપણે એક ગલીમાં જતાં રહીએ. આના પછી બન્ને માધવબાગવાળી ગલીમાં ગયા હતા. અહીં પહોંચ્યા ત્યારે વસીમ તેમની પાછળ આવી ગયો હતો અને બન્નેથી 20-30 મીટર દૂર ઊભો હતો. આ સમયે પ્રાચીએ વસીમને 2 વાર ફોન કર્યા હતા પણ વસીમે રિસીવ કર્યા નહોતા. વસીમ સામે જ ઊભો હોવાથી અંકિત અને પ્રાચીએ બાંકડા પર બેસવાનું નક્કી કર્યું હતું. બન્ને જેવા બાંકડા પર બેઠા કે વસીમ તેમની પાસે આવ્યો હતો અને મોબાઇલ કાઢીને ફ્લેશ લાઇટ ચાલુ કરી દીધી હતી એટલે અંકિતને લાગ્યું કે તે ફોટો કે વીડિયો લઇ રહ્યો છે. પરિસ્થિતિ પામી ગયેલા અંકિતે પ્રાચીને કહ્યું હતું કે આપણે ઘરે જતાં રહીએ એટલે તેઓ ત્યાંથી મોલવાળી ગલીમાં ગયા હતા. જેવા બન્ને નંદ સોસાયટીના વળાંક પાસે પહોંચ્યા કે પાછળથી આવેલા વસીમે પોતાની બાઇક બન્નેના વ્હીકલ આગળ ઊભી રાખી દીધી અને તેમનો રસ્તો રોકી લીધો. વસીમના આવા અણધાર્યા વર્તનથી ડઘાઇ ગયેલા અંકિતે પ્રાચીને કહ્યું કે હું તને ઘરે મૂકી જઉં છું પણ પ્રાચીએ તેને ના પાડી અને જણાવ્યું કે આ મારી પર્સનલ મેટર છે. હું જોઇ લઇશ, તુ જતો રહે. જેથી અંકિત ત્યાંથી નીકળી ગયો હતો. અંકિત ઘરે તો પહોંચી ગયો પણ તેને પ્રાચીની ચિંતા હતી એટલે તેણે રાત્રે પ્રાચીને ફોન લગાવ્યો હતો પણ ફોન લાગતો નહોતો. જેથી તેણે વોટ્સએપ પર એવરીથિંગ ઇઝ ફાઇન? એવો મેસેજ કર્યો હતો પણ પ્રાચીએ કોઇ જવાબ આપ્યો નહોતો પછી અંકિત સૂઇ ગયો હતો. આ તરફ પ્રાચીએ અંકિતને મોકલી દીધા બાદ વસીમને કહ્યું હતું કે આપણું બ્રેકઅપ થઇ ગયું છે. હવે કેમ મને પરેશાન કરે છે? આટલું કહેતાં જ તેની અને વસીમ વચ્ચે ઝઘડો થયો હતો. પ્રાચીએ વસીમને 2 લાફા મારી દીધા હતા. જેના કારણે વસીમ સમસમી ગયો હતો. તેણે પ્રાચીનું ગળું દબાવી દીધું. પ્રાચીએ પ્રતિકાર કર્યો અને તેમની વચ્ચે ઝપાઝપી થઇ. જેમાં પ્રાચીના નખ વસીમને વાગ્યા હતા. જેવી પ્રાચી ગોળ ફરી કે તેનું ગળું વસીમની કોણી વચ્ચે દબાયું હતું. બન્ને રોડ પર નીચે પડતાં છૂટવા માટે પ્રાચીએ ધમપછાડા કર્યા હતા. જેમાં તેનું ગળું વધારે દબાઇ ગયું હતું. પ્રાચી રોડ પર જ પડીને અર્ધબેભાન જેવી થઇ ગઇ હતી. આ દરમિયાન એક બાઇક ચાલક ત્યાંથી પસાર થયો હતો. જેને જોઇને વસીમે પ્રાચીને રોડની સાઇડમાં હડસેલી દીધી હતી અને પોતે ઊભો થઇને મોબાઇલ પર વાતચીત કરતો હોય તેવો ડોળ કરવા લાગ્યો હતો. બાઇકચાલક જતો રહેતા વસીમે પ્રાચીનું ગળું દબાવી દીધું હતું અને ત્યાંથી બાઇક લઇને ભાગી ગયો હતો. રસ્તામાં તેને યાદ આવ્યું કે પ્રાચીનો મોબાઇલ લેવાનો રહી ગયો છે એટલે તે પાછો આવ્યો હતો અને ત્રીજીવાર પ્રાચીનું ગળું દબાવી મોબાઇલ લઇને ભાગી ગયો હતો. તે ગેંડા સર્કલ પાસે પહોંચ્યો કે તેને યાદ આવ્યું કે પ્રાચી પાસે તો 2 મોબાઇલ હતા. પોતે એક જ મોબાઇલ લીધો છે જેથી તે પાછો આવ્યો હતો. આ સમયે પ્રાચી જીવતી હતી અને પીડાથી કણસી રહી હતી પણ વસીમ પર ઝનૂન સવાર હતું. તેણે પ્રાચીનો બીજો મોબાઇલ લઇ લીધો અને પ્રાચીના જ દુપટ્ટાથી તેને ગળેટૂંપો આપી દીધો. હવે પ્રાચીમાં કોઇ પ્રતિકાર કરવાની ક્ષમતા નહોતી. ગળેટૂંપો આપવાના કારણે તે તરફડીને મૃત્યુ પામી. જેના પછી વસીમે તેની લાશ ઢસડીને રોડની સાઇડ પર સપ્તપર્ણીના ઝાડ અને દીવાલની વચ્ચે ફેંકી દીધી હતી. પ્રાચીની હત્યા કર્યા બાદ વસીમને શું કરવું અને શું ન કરવું તે સૂઝતું નહોતું. તે પ્રાચીના બન્ને મોબાઇલ અને એક્ટિવાની ચાવી પોતાની સાથે લઇને ભાગી ગયો હતો. આ તરફ મોડી રાત સુધી વસીમ ઘરે ન પહોંચતાં તેના પિતા પણ ચિંતામાં હતા. તેણે વસીમને રાત્રે 2:19 વાગ્યે તું ક્યાં છો? તેવો મેસેજ કર્યો હતો. વસીમને કોઇ જવાબ ન દેતા ફરીથી 2:21 વાગ્યે ઘરે આવી જા તેવો મેસેજ કર્યો હતો. જેના પછી 3:25 વાગ્યે બેટા, તું ક્યાં છો, કોઇ રિપ્લાય નથી આપતો, શું થયું છે? મને બહુ ટેન્શન થઇ રહ્યું છે તેવો મેસેજ કર્યો હતો. વસીમે કોઇપણ મેસેજનો જવાબ નહોતો દીધો. જો કે વસીમને તેના પિતા સાથે મોબાઇલ પર વહેલી સવારે 4-16 વાગ્યે અને 4-51 વાગ્યે એમ 2 વાર વાતચીત થઇ હતી. વસીમ આ ઘટનાસ્થળથી અંદાજે 8 કિલોમીટર દૂર ગોરવામાં આવેલી ફાતિમા રેસિડેન્સીમાં રહેતો હતો. તે પોતાના ઘરે ગયો હતો અને તેના પિતા સિકંદર મલેકને બધી વાત કરી હતી. આના પછી તે ભરૂચ ભાગી જવા માટે ઘરેથી નીકળી ગયો હતો અને વડોદરાથી ભરૂચની ટિકિટ પણ લઇ લીધી હતી. સવારે જ્યારે પ્રાચીની લાશ અંગે પોલીસને જાણ થઇ અને પોલીસે અંકિતની પૂછપરછ કરી. જેમાં અંકિતે રાત્રે બનેલો આખો ઘટનાક્રમ કહ્યો. જેથી પોલીસે અંકિતને પૂછ્યું હતું કે તુ વસીમને ઓળખી શકે? અંકિતે હા પાડતાં જ ઇન્સ્ટાગ્રામમાં તેનું નામ લખ્યું હતું અને જે ફોટો આવ્યા હતા તેમાંથી અંકિતે વસીમને ઓળખી લીધો હતો. જેના પછી પોલીસે અલગ અલગ 16 ટીમ બનાવી હતી. નેત્રંગથી લઇને કચ્છ સુધી તપાસ કરીને હત્યાના 9 કલાક બાદ વડોદરા રેલવે સ્ટેશનથી વસીમને ઝડપી લીધો હતો. પોલીસને વસીમ પાસેથી પ્રાચીના 2 મોબાઇલ અને એક્ટિવાની ચાવી મળી આવી હતી. વસીમે ચાલાકી વાપરીને પ્રાચીના મોબાઇલમાંથી કોલ રેકોર્ડિંગ ડિલીટ કરી દીધું હતું પણ તેણે કરેલા ગુનાનો પર્દાફાશ થઇ ચૂક્યો હતો. પોલીસને વસીમના શરીર પરથી પ્રાચી સાથે થયેલી ઝપાઝપી દરમિયાન પડેલા ઉઝરડાના નિશાન મળ્યાં હતા. પોલીસે ફ્લેટ, બેંક, મોલ અને હોટલના સીસીટીવી ફૂટેજ ચેક કરીને કોર્ટ સમક્ષ રજૂ કર્યાં હતા સાથે જ એપ્લોઝ સ્ટુડિયોથી પ્રાચીના ઘર સુધી રસ્તા પર જે-જે સ્થળો આવતા હતા તેનો નકશો રજૂ કર્યો હતો. કોર્ટમાં 33 સાક્ષી અને 100 જેટલા દસ્તાવેજો રજૂ થયા હતા. બનાવને નજરે જોનારો એક પણ સાક્ષી નહોતો પણ વસીમે પિતાને કરેલા ફોન, તેનું લોકેશન, ATMના સીસીટીવી ફૂટેજ સહિતના પુરાવાના આધારે કોર્ટે વસીમને પ્રાચીની હત્યા કરવા બદલ દોષિત ઠેરવીને આજીવન કેદની સજા ફટકારી હતી. 'આ મારી પર્સનલ મેટર છે, તુ જા', પ્રાચીએ મિત્રને ઘરે મોકલવાની ભૂલ કરી, વાંચો પાર્ટ-1