3 દાયકા સુધી જમીનમાં ધરબાયેલું રહ્યું રહસ્ય:એક ફોન ને 15 દિવસ સુધી પોલીસે આકાશ પાતાળ એક કર્યા, ખાળકૂવામાંથી યુવતીની લાશ નહીં ફક્ત અવશેષો મળ્યા

34 વર્ષ જૂનો કેસ. ન કોઇ કાગળ, ન કોઇ ફરિયાદ, ન કોઇ પુરાવા. પોલીસ પાસે માત્ર માહિતી હતી અને તે પણ અપૂરતી. છતાં પોલીસે 15 દિવસની મહેનત કરીને વર્ષોથી જમીનમાં ધરબાયેલા એ કેસને ઉકેલી નાખ્યો. ગુજરાત ક્રાઇમ ફાઇલ્સમાં આજે વાત પત્ની, દેહ વેપાર, બંધ મકાન અને ખાળકૂવાને સાંકળતા એક થ્રિલર ખુલાસાની. માર્ચ મહિનાના બીજા અઠવાડિયામાં અમદાવાદ ક્રાઇમ બ્રાન્ચના PI એ.પી.જેબલિયાની ટીમને એક બાતમી મળી. બાતમીદાર: સાહેબ વર્ષો પહેલાં એક મર્ડર થયું હતું. પોલીસ: કોનું મર્ડર? બાતમીદાર: એક યુવતીની હત્યા કરીને વટવાના કુતુબનગરના કોઇ મકાનમાં લાશ દાટી છે. બાતમી લઇને પોલીસકર્મી PI જેબલિયા પાસે આવ્યા હતા. તેણે PIને કહ્યું કે સાહેબ 33-34 વર્ષ પહેલાં વટવાના કુતુબનગરમાં યુવતીની હત્યા કરીને લાશ દાટી દીધી હોવાની માહિતી મળી છે. PIએ તેને કહ્યું કે ખરેખર આવું કંઇ છે કે પછી કોઇએ અફવા ફેલાવી છે? પોલીસકર્મીએ ખાતરી આપી કે મારો બાતમીદાર ખોટું ન બોલે, તપાસ કરવી જોઇએ. તેનો આત્મવિશ્વાસ જોઇને PIને તેની વાત પર ભરોસો બેઠો. તેમણે ઉચ્ચ અધિકારીઓને જાણ કરી. ઉચ્ચ અધિકારીઓએ PIને કહ્યું કે વાંધો નહી, તમે કામ કરો પણ કંઇક પરિણામ સાથે આવજો. બીજા દિવસે PIએ પોતાની આખી ટીમને ઓફિસમાં બોલાવી હતી અને આ કેસમાં કામ કરવાની સૂચના આપી દીધી. જેથી 8-10 લોકોની ટીમ 2 અલગ-અલગ વાહનમાં સવાર થઇને કુતુબનગર પહોંચીને આ વિસ્તાર કેવો છે, અહીંયાના લોકો કેવા છે, અહીં કેવા પ્રકારના મકાનો છે તેની માહિતી મેળવવામાં લાગી. 2-3 દિવસ સુધી તપાસ ચાલી. વિસ્તારને સારી રીતે જાણી લીધા બાદ પોલીસે પોતાનું અસલી કામ શરૂ કર્યું હતું. એક PSI અને અલગ અલગ પોલીસકર્મીઓએ કુતુબનગરમાં રહેતા કેટલાક લોકોની પૂછપરછ શરૂ કરી. અહીં કેટલા મકાન છે, તેમાં કોણ કોણ રહે છે, કયા મકાન બંધ છે, કયા મકાનમાંથી કોણ ગાયબ છે, કોઇ શંકાસ્પદ વ્યક્તિ છે કે નહીં? આ બધા બાબતોની ઝીણવટભરી તપાસ થઇ રહી હતી. બીજીતરફ બાતમીદાર પાસેથી પણ પોલીસ માહિતી મેળવતી હતી કે કયા મકાનમાં હત્યા કરીને લાશ દાટી દેવાઇ છે કેમ કે કુતુબનગરમાં તો ઘણા મકાન હતા. થોડા દિવસોની પૂછપરછ અને તપાસ બાદ પોલીસને 10 નંબરનું મકાન શંકાસ્પદ લાગ્યું કેમ કે એ ઘણા વર્ષોથી બંધ હતું. ત્યાં કોઇ આવીને દર અઠવાડિયે દીવો કરી જતું હોવાની અફવા આસપાસના લોકોએ ફેલાવી હતી. પોલીસે મકાન આસપાસ રહેતા લોકોને પૂછ્યું તો જાણવા મળ્યું કે વર્ષો પહેલાં અહીં કોઇ મહિલા રહેતી હતી. તેણે આ મકાન અન્ય કોઇને વેચી દીધું હતું. બીજી તરફ બાતમીદાર તરફથી પણ 10 નંબરના મકાનમાં લાશ દાટી હોવાની જાણકારી મળી હતી એટલે PI જેબલિયા એ મકાન પર પહોંચ્યા હતા. તેમણે પોતાની અનુભવી નજરોથી તાગ મેળવી લીધો કે જે બાતમી મળી છે તેમાં ક્યાંક તો સત્ય છૂપાયેલું છે. તેમણે ઉચ્ચ અધિકારીઓને મળી જરૂરી તમામ પરવાનગીઓ લઇ લીધી અને મેજિસ્ટ્રેટની હાજરીમાં લાશ શોધવાનું નક્કી કર્યું. 28 માર્ચ, શનિવાર સવારે 8 વાગ્યે ક્રાઇમ બ્રાન્ચની ઓફિસેથી PI જેબલિયા, એક PSI અને 10 લોકોની ટીમ બે વાહનોમાં રવાના થઇ. ખોદકામ માટે 8 જેટલા શ્રમિકોને પાવડો, ત્રિકમ, જેસીબી સાથે બોલાવી લીધા હતા. લગભગ સવારે 8:45 વાગ્યે પોલીસ, શ્રમિકો અને મેજિસ્ટ્રેટ આ મકાન પર પહોંચ્યા હતા. પોલીસે શ્રમિકોને કહ્યું કે મકાનમાં લાશ દાટેલી હોઇ શકે છે. જેથી ધ્યાન રાખીને ખોદવું અને કોઇ અવશેષ મળે તો જાણ કરવી. સવારે 9 વાગ્યાથી શ્રમિકોએ મકાનમાં ખોદકામ શરૂ કર્યું. પોલીસની હાજરી હતી એટલે કુતુબનગરમાં લોકોને જાણ થઇ ગઇ. જેથી શું ઘટના છે તે જોવા માટે મોટી સંખ્યામાં લોકો પહોંચી ગયા. બહાર લોકો ટોળે વળ્યાં હતા. પોલીસે બધાને ત્યાંથી દૂર કર્યા. 5 થી 7 ફૂટ ઊંડું ખોદાયા બાદ FSLની ટીમ પહોંચી ગઇ હતી. માટી આવવાની શરૂ થતાં પોલીસ અને FSLની ટીમે હાથમાં મોજા પહેરીને માટીની તપાસ શરૂ કરી હતી. લાશ વર્ષો જૂની હોવાની વાત હતી એટલે પોલીસને ખ્યાલ હતો કે ફક્ત અવશેષો જ મળશે. પોલીસ બંધ મકાનમાં લાશ શોધી રહી હોવાની વાત વાયુ વેગે પ્રસરી ગઇ અને મીડિયાકર્મીઓ સ્થળ પર પહોંચ્યા. હજુ તો લાશ મળી નહોતી તેવામાં મીડિયાકર્મીઓ આવી જતાં PI જેબલિયા ચિંતામાં મૂકાયા હતા. લાશ ન મળે તો શું જવાબ આપવો તે પ્રશ્ન તેમને કોરી ખાતો હતો. ગરમીનો સમય હતો. બપોર પડતાં જ શ્રમિકો પણ થાકી ગયા હતા. તેમને થોડો સમય આરામ અપાયો. તેમના માટે પોલીસે સ્થળ પર જ જમવાનું મંગાવી લીધું હતું. PI પર લાશ શોધવાનું પ્રેશર પણ વધી ગયું. જે પોલીસકર્મીએ બાતમી આપી હતી તેને PIએ પોતાની પાસે બોલાવ્યો અને કહ્યું- હવે તો રિઝલ્ટ જોઇશે જ. જેથી તેણે બાતમીદારને ફોન કર્યો ત્યારે બાતમીદારે કહ્યું, સાહેબ લાશ મળશે જ. તમે મહેનત ચાલુ રાખો, હું મારી રીતે બીજી વિગતો મેળવું છું. એકાદ કલાકના બ્રેક બાદ જેસીબી અને અન્ય મશીનથી ખોદકામ ફરી શરૂ કર્યું. ખોદકામ ચાલતું હતું ત્યાં વર્ષો અગાઉ ખાળકૂવો બનાવાયો હતો. સિમેન્ટ અને માટીનું ચણતર હતું. મશીન વડે ખોદવામાં આવતું હતું અને શ્રમિકો ખોદકામ કરેલી માટી ઉપર લાવીને ઢગલો કરતા હતા. આ ઢગલામાં પોલીસ અને FSLની ટીમ સતત અવશેષો શોધવાનો પ્રયત્ન કરતી હતી. ક્યાંક માટીમાં કંઇક કડક વસ્તુ દેખાય તો તેને ધોઇને સાફ કરીને તપાસ થતી. પોલીસને હાડકાંના કેટલાક નાના કટકા મળતા હતા. જોકે ખાળકૂવો હોવાથી વર્ષો અગાઉ નોન વેજ ખાઇને ત્યાં નાખી દીધું હોવાની શંકા હતી પરંતુ જે પણ અવશેષો મળતા તેને FSLની ટીમ ઝીપ બેગમાં મૂકીને રવાના કરતી હતી. લગભગ 4 વાગ્યા સુધી ખોદકામ ચાલ્યું છતાં કંઇ હાથે ન લાગતા પોલીસકર્મીઓ પણ એકબીજાની સામે જોઇને નિરાશ થતા હતા. PI જેબલિયા પર પ્રેશર તો હતું સાથે તેમને એક વિશ્વાસ પણ હતો કે કંઇક તો મળશે. તેઓ પોલીસકર્મીઓને હિંમત આપતા અને કહેતા કે કામ ચાલુ રાખો. ખાળકૂવાનો અડધો ભાગ તેની બાજુના મકાનમાં હતો. જેથી પોલીસે ત્યાં પણ ખોદકામ કરાવવાની તૈયારી કરી. પાડોશીને આ અંગે જાણ કરાઇ. પોલીસે તપાસ કરી તો તે મકાનના બાથરૂમની નીચેના ભાગે અડધો ખાળકૂવો હતો અને પાછળની તરફ ફ્લેટ આવેલા હતા. ફ્લેટની દીવાલ તરફ પણ ખોદકામ કરવું પડે તેમ હતું. જેથી PI જેબલિયા ત્યાં મળીને વાત કરીને આવ્યા અને ફ્લેટના રહીશો ખોદકામ માટે સહમત થયા હતા. સાંજના 6 વાગ્યા સુધીમાં લગભગ 15 ફૂટ જેટલું ખોદકામ થઇ ગયું હતું પણ કંઇ મળ્યું નહોતું એટલે બધા એકતરફ બેસી ગયા હતા અને મશીનથી ખોદકામ ચાલુ હતું. 6:15 વાગ્યાની આસપાસ શ્રમિકો ખોદકામ કરેલી માટી ઉપર ઠાલવતા હતા ને માનવ શરીરના મોટા અવશેષો મળ્યાં. એક શ્રમિકે કહ્યું સાહેબ અહીં કંઇક છે, જુઓ. તરત જ PI જેબલિયા અને ટીમના સભ્યોએ પહોંચીને જોયું તો માનવ શરીરના મોટા હાડકાં હતા. પોલીસે શ્રમિકોને કહ્યું હવે ઝડપથી ખોદો. શ્રમિકોમાં થોડો ઉત્સાહ આવ્યો અને ઝડપભેર કામ આગળ વધાર્યું. જેમ-જેમ ઊંડું ખોદતા ગયા તેમ તેમ ખોપડી, હાથના હાડકાં, પગના હાડકાં મળવા લાગ્યા. સવારથી કલાકોની મહેનત બાદ કંઇક નક્કર પરિણામ મળતાં ટીમના મોઢેથી થાક દૂર થઇ ગયો. લગભગ રાતના 8 વાગ્યા સુધીમાં તો 20 ફૂટથી વધુ ખોદીને અંદરથી માનવ શરીરના મોટાભાગના અવશેષો બહાર કાઢી લેવાયા હતા. PI જેબલિયાએ ઉચ્ચ અધિકારીઓને ફોન કરીને માનવ અવશેષો મળ્યાંની જાણ કરી હતી. પોલીસને જે-જે અવશેષો મળ્યાં હતા તેને માનવ શરીરના આકારમાં ગોઠવ્યા. ફોરેન્સિક તપાસ માટે આ અવશેષો FSLમાં મોકલવાના હતા એટલે વીડિયોગ્રાફી સાથે પંચનામું કરીને અવશેષો મોકલી આપ્યા. લાશના અવશેષો મળી ગયા એટલે એક ચેલેન્જ તો પૂરી થઇ પણ સામે બીજી ચેલેન્જ આવીને ઊભી રહી. આ તમામ એવા સવાલો હતા જેના પર પોલીસની તપાસ આગળ વધવાની હતી.કોઇ ફિલ્મી સ્ક્રીપ્ટને ટક્કર મારે તેવા ખુલાસા આ કેસમાં આગળ થવાના હતા. આ ખુલાસા શું હતા તે જાણવા માટે જુઓ ગુજરાત ક્રાઇમ ફાઇલ્સનો બીજો એપિસોડ.