યુસુફ પઠાણને પ્લોટ આપવાની દરખાસ્ત સ્ટેન્ડિંગ કમિટીમાં મંજૂર:વડોદરા મનપામાં બેઠક પહેલાં જ 'પ્લોટ ચોર ભાજપ'ના બેનર સાથે કોંગ્રેસનો વિરોધ, કહ્યું- 15 કરોડનો પ્લોટ ફ્રીમાં આપ્યો

વડોદરામાં પૂર્વ ક્રિકેટર અને સાંસદ યુસુફ પઠાણે જે પ્લોટ ઉપર દબાણ કર્યું હતું તે જમીન હવે સરકાર દ્વારા ભેટમાં આપવાનો નિર્ણય કરવામાં આવ્યો હતો, ત્યારે યુસુફ પઠાણને 978 ચોમી પૈકી 500 ચોમી પ્લોટ ભેટમાં અને બાકીનો પ્લોટ 55 ટકામાં રાહતદરે આપવાની દરખાસ્ત વડોદરા મનપાની સ્ટેન્ડિંગ કમિટીની બેઠકમાં મંજૂર કરવામાં આવી છે. જોકે, સ્ટેન્ડિંગ કમિટીની બેઠક શરૂ થાય તે પહેલાં જ કોંગ્રેસ દ્વારા વિરોધ પ્રદર્શન કરવામાં આવ્યું હતું. કોંગ્રેસ દ્વારા વોટ ચોર ભાજપ, પ્લોટ ચોર ભાજપ, એક વોટની કિંમત 15 કરોડના પોસ્ટર સાથે વિરોધ કરવામાં આવ્યો હતો. આ ઉપરાંત કોંગ્રેસ દ્વારા 'VMCના જમાઈ યુસુફ પઠાણ' અને 'યુસુફ પઠાણ ક્યાં મળશે બીજેપીના દફરતમાં'ના નારા લગાવવામાં આવ્યા હતા. કોંગ્રેસ દ્વારા સ્ટેન્ડિંગ કમિટીના સભાખંડ બહાર બેસીને નારેબાજી કરવામાં આવી હતી. તેમજ સ્ટેન્ડિંગ કમિટીના ચેરમેન જ્યારે બેઠકમાં પહોંચ્યા ત્યારે તેમને ઘેરવાનો પણ પ્રયાસ કરવામાં આવ્યો હતો. આ ઉપરાંત અન્ય સભ્યો પાછલા બારણેથી સભાખંડમાં જતા 'પાછલા બારણે કોણ જાય, ભાજપના ચોર જાય'ના કોંગ્રેસે નારા લગાવ્યા હતા. સરકારી પ્લોટોમાં નાગરિક પાસેથી ₹5થી ₹10 હજાર ભાડું વસૂલે છે: ઋત્વિજ જોષી કોંગ્રેસ શહેર પ્રમુખ ઋત્વિજ જોષીએ જણાવ્યું હતું કે, 978 ચોરસ મીટરનો સરકારની માલિકીનો પ્લોટ ભાજપના નેતાઓએ યુસુફ પઠાણને આપી દીધો. કેમ ભાઈ સરકારી જમાઈ છે? જે સરકારી પ્લોટોમાં વડોદરાનો નાગરિક કોઈ પ્રવૃત્તિ કરે તો એનું ₹5થી ₹10 હજાર ભાડું વસૂલે છે. 14 વર્ષથી યુસુફ પઠાણનો કબજો હતો. 14 વર્ષની તમે ગણતરી કરો તો 8 કરોડ કરતા વધારે રકમ યુસુફ પઠાણ પાસેથી લેવી પડે. 15 કરોડનો પ્લોટ ફ્રીમાં આપી દીધો આ તો ઉપરથી ફ્રીમાં આપી દીધો કારણ કે એનો એક વોટ છે, એટલે 15 કરોડનો પ્લોટ ફ્રીમાં આપી દીધો. સરકારી જમાઈ છે ભાઈ? આ કઈ મ્યુનિસિપલ કમિશનર કે ભાજપના નેતાઓના ખિસ્સાના રૂપિયા છે? પેલા કોર્પોરેટર ક્યાં ગયા જે પોતાની જાતને 'મામા' કહે છે. તેમણે આખા વડોદરાને 'મામા' બનાવ્યું. તમણે યુ-ટર્ન માર્યો. પહેલાં જ્યારે યુસુફ પઠાણ TMCમાં હતા, ત્યારે એ 'મામા' એવું બોલ્યા કે લેન્ડ ગ્રેબિંગનો કેસ દાખલ કરો અને હવે એ 'મામા' દેખાતા નથી. વડોદરામાં હિન્દુ ધર્મના કોઈ ક્રિકેટર દેખાયા નહીં હું પૂછવા માગું છું ભાજપના નેતાઓને, શહેરના ભાજપ પ્રમુખને, ગુજરાતના ભાજપ પ્રમુખને અને મુખ્યમંત્રી, ગૃહમંત્રીને કે તમે ચૂંટણીમાં હિન્દુત્વની વાતો કરો છો તો તમને વડોદરામાં હિન્દુ ધર્મના કોઈ ક્રિકેટર દેખાયા નહીં. મોટા મોટા ક્રિકેટરો અંશુમન ગાયકવાડથી માંડીને ઘણા બધા ક્રિકેટરો આ વડોદરા શહેરમાં છે, જેણે વડોદરાનું નામ રોશન કર્યું. હાર્દિક પંડ્યા હોય, હમણાં તો પેલા રાધા યાદવ છે, એમણે તો ખાલી એકેડેમી ખોલવા માટે પ્લોટ માગ્યો તો પણ ના આપ્યો. કોર્પોરેશનમાં માત્ર મીટિંગ, ઈટિંગ અને ચીટિંગ ક્રિકેટ તો કોઈ સરકારી રમત નથી. આપણા ખો-ખોના વડોદરાના રમતવીર જેમને અર્જુન એવોર્ડ મળ્યો એવા જે સુધીર પરબને એમને ના આપ્યો. હાર્દિક પંડ્યા છે ક્રિકેટમાં. પણ આ લોકોએ પોતાનો રાજકીય ઉલ્લુ સીધો કરવા માટે ભાજપે આ કર્યું છે. નોટ ચોર, વોટ ચોર, પ્લોટ ચોર ભાજપ. કોર્પોરેશનમાં માત્ર મીટિંગ, ઈટિંગ અને ચીટિંગ કરે છે. 20 કરોડનો પ્લોટ 5 કરોડમાં આપવાની પેરવી વડોદરાના તાંદલજામાં ટીપી 22 હેઠળનો પ્લોટ નંબર 90માં વર્ષ 2012થી યુસુફ પઠાણે દબાણ કર્યું હતું. આ પ્લોટ અંગેની માંગણી તેઓ દ્વારા કરવામાં આવી હતી પરંતુ વર્ષ 2014માં રાજ્ય સરકારે આ પ્લોટ ન આપી શકાય તેવો હુકમ દર્શાવ્યો હતો. જો કે હવે આ પ્લોટ પૈકી 500 ચોરસ મીટર પ્લોટ ભેટમાં આપવા તેમજ બાકીની પ્લોટ 55 ટકા કિંમત વસૂલી આપવા અંગેની દરખાસ્ત રજુ કરવામાં આવી હતી. જે અંગે વિરોધ પ્રદર્શન જોવા મળ્યું હતું. આ અંગે લડત આપી રહેલા શૈલેષ અમીને સવાલો ઊભા કર્યા હતા અને જણાવ્યું હતું કે, જો સરકારે પ્લોટ આપવો જ હતો તો જ્યારે તેઓ ક્રિકેટ રમતા હતા અને તેઓએ માંગણી કરી હતી ત્યારે કેમ ન આપ્યો? સરકાર યુસુફ પઠાણ પર હવે આટલી ઓળઘોળ કેમ થઈ ગઈ છે? આ પણ વાંચો: ભાજપનું વોશિંગ મશીન, યુસુફે જૂનમાં TMC છોડી, ઓગસ્ટમાં ગુજરાત સરકારે મંજૂરી આપી માત્ર યુસુફ પઠાણને ફાયદો કરાવવા જ આ નિર્ણય લેવાયો! આ અંગેનો પરિપત્ર કર્યો છે અને મહાનગરપાલિકાને મોકલ્યો છે. આ પરિપત્રમાં એવો ઉલ્લેખ કરવામાં આવ્યો છે કે, આ દરખાસ્ત પૂર્વ દૃષ્ટાંત તરીકે લઈ શકાશે નહીં. એટલે કે હવે પછી આ મુજબ નિર્ણય આ કિસ્સાને ટાંકીને લઈ શકશે નહીં જેનો સીધો મતલબ થાય છે કે, માત્ર યુસુફ પઠાણને ફાયદો કરાવવા જ આ નિર્ણય લેવાયો છે. જેમાં સમાનતાના નિયમનો ભંગ જોવા મળી રહ્યો છે. મહાનગરપાલિકાના સ્ટેન્ડિંગ કમિટીના ચેરમેન વર્ષાબેન વ્યાસે જણાવ્યું હતું કે, હાલમાં સરકાર દ્વારા પરિપત્ર કરવામાં આવ્યો છે જેના આધારે મહાનગરપાલિકા કાર્યવાહી કરી રહી છે. આ પણ વાંચો: પૂર્વ ક્રિકેટર-MP યુસુફે દીદીની 'મમતા' છોડતા 15 કરોડનો ફાયદો દબાણનો મુદ્દો ભાજપના જ પૂર્વ કાઉન્સિલરે ઉઠાવ્યો હતો યુસુફ પઠાણ દ્વારા મહાનગરપાલિકાની માલિકીના પ્લોટ ઉપર દબાણ કરવામાં આવ્યું છે આ મુદ્દો ભાજપના જ પૂર્વ કાઉન્સિલર વિજય પવાર દ્વારા ઉઠાવવામાં આવ્યો હતો. આ બાદ સમગ્ર વિવાદ હાઈકોર્ટમાં પહોંચ્યો હતો જેમાં પણ યુસુફ પઠાણને ફટકાર મળી હતી. જો કે તે બાદ યુસુફ પઠાણે હાઈકોર્ટમાંથી અપીલ પરત ખેંચી લીધી હતી. હવે રાજ્ય સરકાર દ્વારા આ પ્લોટ ભેટમાં આપવા અંગેનો નિર્ણય કરવામાં આવ્યો છે. જાણકારો એમ પણ માની રહ્યા છે કે મમતાના ગઢમાં ઘૂસી તેને તોડવા માટેનું આ ઇનામ હોઈ શકે છે. ત્યારે આ અંગે આજે શું નિર્ણય થાય છે તેના ઉપર સૌની મીટ મંડાઈ છે. જમીન વિવાદમાં ક્યારે શું થયું? 3 માર્ચ, 2012 : યુસુફ પઠાણે પ્લોટ માગ્યો યુસુફ પઠાણે મ્યુ.કમિશનરને પત્ર લખી પોતાના બંગલાની બાજુના 978 ચો. મીટરના પ્લોટની ફાળવણી કરવા માગ કરી હતી.30 માર્ચ અને 8 જૂન, 2012ના રોજ સભામાં પ્લોટની ફાળવણીની દરખાસ્ત આગળ વધારાઈ હતી. પ્લોટની જાહેર હરાજી વિના 99 વર્ષના ભાડાપટે ફાળવણી કરવાની પ્રક્રિયા હાથ ધરાઈ હતી. 9 જૂન, 2014: સરકારે દરખાસ્ત નામંજૂર કરી રાજ્ય સરકારે જાહેર હરાજી વિના પ્લોટની ફાળવણીની દરખાસ્તને મંજૂરી આપી ન હતી. 6 જૂન, 2024: મામલો કોર્ટમાં પહોંચ્યો પાલિકાએ પ્લોટની ફાળવણીની દરખાસ્ત નામંજૂર થયેલી હોવાનો ઉલ્લેખ કરી કથિત દબાણ દૂર કરવા તાત્કાલિક કાર્યવાહી કરવાનો આદેશ આપ્યો હતો. યુસુફ પઠાણે આ નિર્ણયને હાઈકોર્ટમાં પડકાર્યો હતો. 21 ઑગસ્ટ, 2025ના રોજ ગુજરાત હાઇકોર્ટે યુસુફ પઠાણની અરજી ફગાવી દીધી હતી. 4 ફેબ્રુઆરી, 2026: સિંગલ જજના ચુકાદા સામે અપીલ સિંગલ જજના ચુકાદાને પડકારવા યુસુફ પઠાણે હાઈકોર્ટની ડિવિઝન બેન્ચ સમક્ષ અપીલ દાખલ કરી હતી. 8 જૂન, 2026ના રોજ હાઇકોર્ટે જમીનની કાયદેસરની ફાળવણી થઈ ન હોય અને રકમ ચૂકવાઈ ન હોય તો સરકારી જમીન પર કબજો કેવી રીતે મેળવ્યો? કોર્ટે પાલિકાના અધિકારીઓની ભૂમિકા અંગે સવાલ ઉઠાવ્યા હતા. 15 જૂન, 2026: સમય માગવાની કાર્યવાહી પઠાણના વકીલે આંતરરાષ્ટ્રીય ક્રિકેટરોને જમીન ફાળવણી અંગેની રાજ્ય સરકારની નીતિનો આધાર લઈને રજૂઆત આગળ વધારવા સમય માગ્યો હતો. 18 જૂન, 2026: પાલિકાએ પ્લોટની હરાજીની તૈયારી કરી પાલિકાએ શહેરના 7 પ્લોટની હરાજી માટેની દરખાસ્ત સ્થાયી સમિતિમાં મૂકી હતી. તેમાં તાંદલજાનો 978 ચો.મીટરનો પ્લોટ પણ સામેલ હતો. આ પ્લોટ માટે અંદાજિત અપસેટ વેલ્યૂ પ્રતિ ચો. મીટર 2.10 લાખ દર્શાવાઈ હતી. આ પ્રમાણે કુલ કિંમત આશરે 20.53 કરોડ થતી હતી. 13 ઓગસ્ટ, 2026: સરકારનો ઠરાવ રાજ્ય શહેરના વિકાસ મંત્રાલયે ગિફ્ટમાં જમીન આપવા ઠરાવ કર્યો. 31 ઓગસ્ટ, 2026: યુસુફ પઠાણે હાઈકોર્ટમાંથી અપીલ પાછી ખેંચી આ કેસનો સૌથી મહત્ત્વનો વળાંક 31 ઑગસ્ટ, 2026ના રોજ આવ્યો હતો. જેમાં યુસુફ પઠાણે કોર્ટમાં કરેલી અપીલ પાછી ખેંચી હતી. પઠાણે 2012માં પ્લોટ માગ્યો હતો, ઓગસ્ટ-2026માં હાઇકોર્ટમાંથી અપીલ પાછી ખેંચી હતી. 20 ઓક્ટોબર, 2026: સ્ટેન્ડિગ કમિટીને દરખાસ્ત વડોદરા મ્યુનિસિપલ કમિશનરે પ્લોટ ફાળવવવા માટે સ્ટેન્ડિગ કમિટીને દરખાસ્ત મોકલી.