Search

    Language Settings
    Select Website Language

    GDPR Compliance

    We use cookies to ensure you get the best experience on our website. By continuing to use our site, you accept our use of cookies, Privacy Policy, and Terms of Service.

    BijnorNews
    Bijnor news

    સુરત જિલ્લા કલેક્ટરની સંકલન બેઠકમાં તડાફડી બોલી:અધિકારીના જવાબથી અકળાયેલા MLA વિનુ મોરડીયાએ કહ્યું-'જવાબ ઠીક નથી, રિઝલ્ટ જ જોઈએ'

    11 hours ago

    સુરત જિલ્લા કલેક્ટરના અધ્યક્ષસ્થાને શનિવારે યોજાયેલી માસિક સંકલન સમિતિની બેઠકમાં સુરતના ધારાસભ્યોએ પોતાના મતવિસ્તારના પ્રાણપ્રશ્નો મુદ્દે તંત્રને રીતસરનું ઘેર્યું હતું. આ બેઠકમાં કતારગામના ધારાસભ્ય વિનુ મોરડીયા, લિંબાયતનાં ધારાસભ્ય સંગીતા પાટીલ અને ચોર્યાસીના ધારાસભ્ય સંદીપ દેસાઈએ પાણી, ડ્રેનેજ, પ્રદૂષણ, ટ્રાફિક, સરકારી અનાજની ગુણવત્તા તેમજ બ્રિજ અને મંદિર પાસે નડતરરૂપ વીજ ટાવર-સબસ્ટેશન હટાવવાની માંગ સાથે આક્રમક રજૂઆતો કરી હતી. ખાસ કરીને એક અધિકારીના ઉડાઉ જવાબથી નારાજ થયેલા વિનુ મોરડીયાએ 'મને જવાબ ઠીક નથી લાગ્યો, રિઝલ્ટ જ જોઈએ' તેવું રોકડું પરખાવતા બેઠકમાં ગરમાવો આવી ગયો હતો. વેડ ગામનું સબસ્ટેશન, બગડેલું અનાજ અને કેબિન મુદ્દે મોરડીયા આક્રમક કતારગામના ધારાસભ્ય વિનુ મોરડીયાએ બેઠકમાં ત્રણ મુખ્ય મુદ્દા ઉઠાવ્યા હતા, જેમાં વેડ ગામમાં અંબાજી મંદિરની બાજુમાં નડતરરૂપ ટોરેન્ટ પાવરનું સબસ્ટેશન હટાવવા, લલિતા ચોકડી પરની ટ્રાફિક સમસ્યા ઉકેલવા અને નડતરરૂપ કેબિન હટાવવાની માંગ કરી હતી. આ ઉપરાંત પુરવઠા વિભાગની કામગીરી પર સવાલ ઉઠાવતા સરકારી અનાજની દુકાનો સમયસર ખુલે, લોકોને સારું અને ગુણવત્તાયુક્ત અનાજ મળે, બગડેલા અનાજનું યોગ્ય ચેકિંગ થાય તેમજ દરેક દુકાન પર મળવાપાત્ર જથ્થાના બોર્ડ લગાવવા માંગ કરી હતી. તંત્રએ દુકાનો પર બોર્ડ લાગી ગયા હોવાનો હકારાત્મક જવાબ આપ્યો હતો. કેબિન અને પડતર કામો મુદ્દે અધિકારીના જવાબથી અસંતુષ્ટ વિનુ મોરડીયાએ આક્રમક મિજાજમાં જણાવ્યું હતું કે, "મારી રજૂઆત સાથે ત્યાં એક કેબિનનો પણ મુદ્દો હતો, પરંતુ અધિકારીએ જે જવાબ આપ્યો તે મને ઠીક લાગ્યો નહીં, એટલે મેં સ્પષ્ટ કહી દીધું કે આનું રિઝલ્ટ જ જોઈએ. જોકે, કલેક્ટરે આ કામ પૂર્ણ થઈ જવાની ખાતરી આપી છે." બ્રિજના રેમ્પમાં નડતરરૂપ ટાવર અને કોલેજ મુદ્દે સંગીતા પાટીલની રજૂઆત લિંબાયતનાં ધારાસભ્ય સંગીતા પાટીલે પોતાના વિસ્તારમાં નંદનવન (વંદનવન) સોસાયટી પાસે મંજૂર થયેલા બ્રિજના રેમ્પ ઉતારવાની કામગીરીમાં નડતરરૂપ બનતા વીજ ટાવરને તાત્કાલિક હટાવવા અને કોલેજ સંબંધિત પ્રશ્ન તેમજ અન્ય નાના પ્રશ્નો રજૂ કર્યા હતા. સંગીતા પાટીલે જણાવ્યું હતું કે, "દર મહિનાના શનિવારે યોજાતી સંકલનમાં અમે વિસ્તારના પ્રશ્નો મૂકીએ છીએ. મારા વિસ્તારમાં બ્રિજ અને રેમ્પ ઉતારવાની મંજૂરી મળી ગઈ છે, પરંતુ ત્યાં આવેલો ટાવર નડતરરૂપ બને છે. ગત બેઠકમાં પણ આ મુદ્દો હતો અને આજે ફરી આ મુખ્ય પ્રશ્ન રજૂ કરીને ટાવર હટાવવા ખાસ રજૂઆત કરી છે, જેના નિરાકરણની ખાતરી અપાઈ છે. પાણી, ડ્રેનેજ અને પ્રદૂષણના પ્રશ્નો ઉકેલવા સંદીપ દેસાઈની માંગ ચોર્યાસીના ધારાસભ્ય સંદીપ દેસાઈએ પોતાના મતવિસ્તારના ગ્રામ્ય અને શહેરી વિસ્તારોમાં પીવાના પાણી, ડ્રેનેજ લાઈન અને વધતા જતા પ્રદૂષણના ગંભીર મુદ્દા બેઠકમાં ઉઠાવ્યા હતા. તેમણે જણાવ્યું હતું કે,આજે મારા વિસ્તારમાં પાણી, ડ્રેનેજ અને પ્રદૂષણના જે પણ પ્રશ્નો હતા, તે તમામની રજૂઆત થઈ છે અને તંત્ર તરફથી હકારાત્મક જવાબ મળ્યો છે." કલેક્ટરની તમામ પડતર પ્રશ્નોના ઝડપી નિરાકરણની આપી ખાતરી સંકલન બેઠકમાં ત્રણેય ધારાસભ્યોએ જનતાની સુખાકારી અને અટકેલા વિકાસકામો મુદ્દે અધિકારીઓની જવાબદારી નક્કી કરવા પર ભાર મૂક્યો હતો. રેશનિંગ દુકાનો પર જથ્થાના બોર્ડ લગાવવાની કામગીરી પૂર્ણ થઈ હોવાનું તંત્રએ જણાવ્યું હતું, જ્યારે નડતરરૂપ ટાવર, સબસ્ટેશન, કેબિન દબાણ, ટ્રાફિક તેમજ પાણી-ડ્રેનેજ અને પ્રદૂષણના પ્રશ્નોનો ઝડપથી નિકાલ લાવવા જિલ્લા કલેક્ટરે સંબંધિત વિભાગોને કડક સૂચના આપી હતી.
    Click here to Read More
    Previous Article
    જૂનાગઢના વિસાવદરમાં સિંહણે ખેડૂતને ફાડી ખાધો:રબારીકા ગામમાં ખેતરમાં હુમલો કરતા મોત, વન વિભાગે પાંજરા ગોઠવ્યા
    Next Article
    અમદાવાદની કન્યા વિદ્યાલયના શિક્ષકને ડિજિટલ એરેસ્ટ કરી ₹24 લાખ પડાવાયા:ચાઈલ્ડ પોર્નોગ્રાફી અને મની લોન્ડરિંગનો ડર બતાવી ગાંધીનગરના ઘરમાં 6 દિવસ પૂરી રાખ્યા, દીકરીને શંકા જતાં ભાંડો ફૂટ્યો

    Related Gujarat Updates:

    Are you sure? You want to delete this comment..! Remove Cancel

    Comments (0)

      Leave a comment