મેસ્સી બોલ્યો- અમને કંઈ પણ થાળીમાં પીરસીને મળ્યું નથી:FIFA વર્લ્ડ કપમાં આર્જેન્ટિનાને રેફરી તરફથી ફેવર મળવાના આરોપોનો જવાબ આપ્યો

આર્જેન્ટિનાના કેપ્ટન લિયોનેલ મેસ્સીએ તે દાવાઓને નકારી કાઢ્યા છે, જેમાં કહેવામાં આવ્યું હતું કે 2026 ફીફા વર્લ્ડ કપમાં તેમની ટીમને રેફરી તરફથી ફેવર મળ્યો છે. મેસ્સીએ કહ્યું કે વર્તમાન ચેમ્પિયન ટીમે પોતાની મહેનત અને ઝુઝારૂપણાથી સતત બીજી વખત ફાઇનલમાં સ્થાન બનાવ્યું છે. ધ એસોસિએટેડ પ્રેસ અનુસાર, ઇંગ્લેન્ડ સામે સેમિફાઇનલમાં 2-1થી જીત મેળવ્યા બાદ મેસ્સીએ કહ્યું- ભલે કોઈને પસંદ હોય કે ન હોય, અમે છેલ્લા ચાર વર્ષથી શ્રેષ્ઠ રહ્યા છીએ. અમે સાબિત કર્યું છે કે અમારી સફળતા કોઈ સંયોગ નથી અને અમને કંઈ પણ મફતમાં મળ્યું નથી. એટલાન્ટામાં બુધવારે રમાયેલી સેમિફાઇનલમાં ઇંગ્લેન્ડે 55મી મિનિટે એન્થોની ગોર્ડનના ગોલથી લીડ મેળવી હતી. જોકે, ઇંગ્લેન્ડના ડિફેન્સિવ વલણનો ફાયદો ઉઠાવતા આર્જેન્ટિના માટે એન્ઝો ફર્નાન્ડિઝ અને લાઉટારો માર્ટિનેઝે મોડા ગોલ કરીને ટીમને જીત અપાવી. ટુર્નામેન્ટ દરમિયાન આર્જેન્ટિનાની મેચોમાં રેફરીના નિર્ણયો પર સવાલો ઉઠ્યા હતા. સ્વિટ્ઝર્લેન્ડ સામેની ક્વાર્ટર ફાઇનલમાં બ્રિલ એમ્બોલોને રેડ કાર્ડ મળવા પર સ્વિસ કોચ મુરાત યાકિને કહ્યું હતું કે, "અમને એક એવા નિયમની સજા મળી જે સંપૂર્ણપણે અસ્વીકાર્ય છે. આ હાર ખૂબ જ પીડાદાયક છે." ઇજિપ્ત ફૂટબોલ એસોસિએશને પણ રાઉન્ડ ઑફ 16ની મેચમાં વિવાદાસ્પદ નિર્ણયો પર નારાજગી વ્યક્ત કરી હતી. ઇજિપ્તનો આરોપ હતો કે મુસ્તફા ઝિકોનો ગોલ VAR રિવ્યૂમાં ખોટી રીતે રદ કર્યો હતો અને મોહમ્મદ સલાહને પાડી દેવા છતાં પેનલ્ટી આપી નહોતી. આર્જેન્ટિના હવે રવિવારે ન્યૂ જર્સીમાં યોજાનારી ફાઇનલમાં સ્પેનનો સામનો કરશે. જ્યારે, શનિવારે મિયામીમાં ત્રીજા સ્થાન માટે ફ્રાન્સ અને ઇંગ્લેન્ડ વચ્ચે મુકાબલો થશે. આ પહેલા આર્જેન્ટિનાએ કેપ વર્ડે, ઇજિપ્ત અને સ્વિટ્ઝર્લેન્ડ સામેના કડક મુકાબલા બાદ જીત મેળવી હતી. ઇંગ્લેન્ડને હરાવીને આર્જેન્ટિના ફૂટબોલ વર્લ્ડકપ ફાઇનલમાં ડિફેન્ડિંગ ચેમ્પિયન આર્જેન્ટિના સતત બીજી વખત ફૂટબોલ વર્લ્ડ કપની ફાઇનલમાં પહોંચી ગયું છે. લિયોનેલ મેસ્સીની ટીમે બુધવારે રાત્રે બીજી સેમિફાઇનલમાં ઇંગ્લેન્ડને 2-1થી હરાવ્યું. ટીમ 85 મિનિટ સુધી 0-1થી પાછળ હતી. તે પછી છેલ્લા 7 મિનિટમાં બે ગોલ કરીને જીત મેળવી. ફાઇનલમાં તેનો મુકાબલો 19 જુલાઈએ સ્પેન સામે થશે. એટલાન્ટામાં એન્થોની ગોર્ડનના 55મી મિનિટના ગોલથી ઇંગ્લેન્ડ ફાઇનલ તરફ આગળ વધતું દેખાઈ રહ્યું હતું. પરંતુ લિયોનેલ મેસ્સીની ટીમે છેલ્લી ઘડીએ મેચનો પાસો પલટી નાખ્યો. મેસ્સીના પાસ પર એન્ઝો ફર્નાન્ડેઝે 25 યાર્ડથી શાનદાર ગોલ કરીને સ્કોર 1-1 કરી દીધો. પછી ઇન્જરી ટાઈમના બીજા મિનિટમાં મેસ્સીના સચોટ ક્રોસ પર સબસ્ટિટ્યુટ લૌટારો માર્ટિનેઝે હેડરથી ગોલ કરીને જીત અપાવી. જીત બાદ આર્જેન્ટિનાના ખેલાડીઓએ મેદાન પર 'Las Malvinas son Argentinas' (ફોકલેન્ડ/માલ્વિનાસ આર્જેન્ટિનાના છે) લખેલું બેનર લહેરાવ્યું હતું. આના પર વિવાદ થયો અને બંને દેશોના ચાહકો સામસામે આવી ગયા. ફોકલેન્ડ એટલાન્ટિક મહાસાગરમાં આવેલો એક ટાપુ છે, જેના પર બંને દેશો પોતાનો દાવો કરે છે. 2 એપ્રિલ 1982ના રોજ આર્જેન્ટિનાએ ફોકલેન્ડ પર કબજો કરી લીધો. પછી બ્રિટને 74 દિવસ ચાલેલા યુદ્ધ પછી ટાપુઓ પર ફરીથી કબજો મેળવી લીધો. 1816માં સ્પેનથી આઝાદ થયા પછી ફોકલેન્ડ આર્જેન્ટિનાનો હતો. આર્જેન્ટિના સાતમી વખત ફાઇનલમાં પહોંચ્યું છે આ આર્જેન્ટિનાનો સાતમો વર્લ્ડ કપ ફાઇનલ હશે. ટીમ આ પહેલા 1930, 1978, 1986, 1990, 2014 અને 2022માં ફાઇનલ રમી ચૂકી છે. આર્જેન્ટિના 1978, 1986 અને 2022માં વર્લ્ડ કપ જીતી ચૂક્યું છે. હવે તેની પાસે સતત બીજી વાર અને કુલ ચોથો ખિતાબ જીતવાની તક છે. પ્રથમ હાફ- ફૂટબોલ ઓછું, લડાઈ વધુ મેચની શરૂઆતથી જ સ્પષ્ટ થઈ ગયું હતું કે મુકાબલો માત્ર ફૂટબોલનો નથી. ત્રીજી જ મિનિટમાં ઇંગ્લેન્ડના ઇલિયટ એન્ડરસન પર ટેકલ કર્યા બાદ બંને ટીમના ખેલાડીઓ સામસામે આવી ગયા. રેફરી ઇસ્માઇલ એલફાથને વચ્ચે પડવું પડ્યું. આખા પ્રથમ હાફમાં ઘણી વખત ખેલાડીઓ ભીડાયા અને ફાઉલની ભરમાર રહી. 33મી મિનિટે ઇંગ્લેન્ડને પહેલી તક મળી. ડેક્લન રાઇસની ફ્રી-કિક પર જ્હોન સ્ટોન્સે હેડર માર્યો, પરંતુ બોલ નેટને અડીને બહાર નીકળી ગયો. આર્જેન્ટિના તરફથી એન્ઝો ફર્નાન્ડેઝે 38મી મિનિટે બોક્સની બહારથી શોટ માર્યો, જે ગોલપોસ્ટની ઉપરથી નીકળી ગયો. 37મી મિનિટે લિયોનેલ મેસ્સી આગળ વધ્યો, પરંતુ ઇલિયટ એન્ડરસને તેને રોકવા માટે ફાઉલ કર્યું. આના પર એન્ડરસનને યલો કાર્ડ મળ્યું. 42મી મિનિટે જુડ બેલિંગહામની જર્સી ખેંચવા બદલ આર્જેન્ટિનાના લિસાન્ડ્રો માર્ટિનેઝને પણ કાર્ડ બતાવવામાં આવ્યું. હાફ ટાઈમની સીટી વાગ્યા પછી પણ બંને ટીમના ખેલાડીઓ રેફરી સાથે દલીલ કરતા રહ્યા અને મેસ્સી સૌથી છેલ્લે મેદાનમાંથી બહાર ગયો. બીજા હાફની શરૂઆતમાં ઇંગ્લેન્ડનો ગોલ બ્રેક પછી આર્જેન્ટિનાએ ઝડપી શરૂઆત કરી. જુલિયન અલ્વારેઝે 48મી મિનિટે પહેલો ઓન-ટાર્ગેટ શોટ માર્યો, જેને જોર્ડન પિકફોર્ડે શાનદાર રીતે રોકી દીધો. 55મી મિનિટે મેચનો પહેલો ગોલ ઇંગ્લેન્ડે કર્યો. હેરી કેનના લાંબા પાસ પર આર્જેન્ટિનાનો ડિફેન્સ સંપૂર્ણપણે ક્લિયરન્સ કરી શક્યો નહીં. ડેક્લન રાઇસે બોલ મોર્ગન રોજર્સને આપ્યો. રોજર્સે જમણી બાજુથી સચોટ ક્રોસ નાખ્યો, જેના પર એન્થોની ગોર્ડને બોક્સમાંથી સરળ ફિનિશ કર્યું. આ ટુર્નામેન્ટમાં ગોર્ડનનો પહેલો ગોલ હતો અને ઇંગ્લેન્ડ 1-0થી આગળ થઈ ગયું. અંગ્રેજોને હાર ન પચી, આર્જેન્ટિના સાથે કર્યો ટપલી દાવ રેફરીએ મેચ પત્યા બાદ સીટી વગાડી તે સાથે જ ઇંગ્લેન્ડનું વર્લ્ડ કપ જીતવાનું સપનું તૂટી ગયું હતું. મેચ હાર્યા બાદ ઇંગ્લેન્ડનો સ્ટાર મિડફિલ્ડર જુડ બેલિંગહામ પિચ પર એકલો ઊભો હતો અને મેચના પરિણામ વિશે વિચારીને અત્યંત નિરાશ દેખાતો હતો. આ વર્લ્ડ કપમાં 6 ગોલ કરનાર આ ખેલાડી માટે આ ઝટકો ઘણો મોટો હતો. બેલિંગહામને આ સ્થિતિમાં જોઈને આર્જેન્ટિનાના એક ખેલાડીએ રમતગમતની ભાવના બતાવીને સૌથી પહેલા તેની પાસે જઈને તેને સાંત્વના આપી હતી. થોડી જ વારમાં આર્જેન્ટિનાનો ખેલાડી વેલેન્ટિન બાર્કો પોતાના સાથી ખેલાડીઓ સાથે જીતની ઉજવણી કરતો અને એકબીજાને ગળે મળતો બેલિંગહામની નજીક પહોંચ્યો. આ દરમિયાન બાર્કોએ બેલિંગહામને ઉદ્દેશીને કંઈક કમેન્ટ કરી હતી. બાર્કોની વાત સાંભળીને ઇંગ્લેન્ડનો આ મિડફિલ્ડર પોતાનો ગુસ્સો કાબૂમાં રાખી શક્યો નહીં. તેને આ વાત એટલી ખરાબ લાગી કે તેણે ગુસ્સામાં આવીને તરત જ બાર્કોના માથા પર ટપલી મારી. આ પછી આર્જેન્ટિનાના ખેલાડી બાર્કોએ પણ વળતો પ્રહાર કર્યો અને બેલિંગહામને પાછળ ધકેલી દીધો. મેદાન પર સ્થિતિ ગંભીર બનતી જોઈને બંને ટીમના બીજા ખેલાડીઓ અને સપોર્ટ સ્ટાફ તરત જ વચ્ચે આવી ગયા હતા અને મામલો વધુ બગડે તે પહેલાં જ બંનેને અલગ કરીને શાંત પાડ્યા હતા. મેચની બબાલના 4 PHOTOs 'ફોકલેન્ડ' બેનર વિવાદ? મેદાન પરની હિંસા સિવાય આ મેચ એક મોટા રાજકીય વિવાદનું કેન્દ્ર બની છે. મેચ પૂરી થયા બાદ આર્જેન્ટિનાના ચાહકો અને સપોર્ટ સ્ટાફ દ્વારા સ્ટેડિયમમાં એક વિવાદાસ્પદ બેનર પ્રદર્શિત કરવામાં આવ્યું હતું, જેના પર લખ્યું હતું: "Las Malvinas son Argentinas" (માલવિનાસ/ફોકલેન્ડ આર્જેન્ટિનાનું છે). આર્જેન્ટિના જેને 'માલવિનાસ' કહે છે, તેને યુકે (ઇંગ્લેન્ડ) 'ફોકલેન્ડ આઇલેન્ડ' (Falklands) તરીકે ઓળખે છે. 1982માં આ ટાપુઓ પર નિયંત્રણ મેળવવા માટે બંને દેશો વચ્ચે ભીષણ યુદ્ધ થયું હતું, જેમાં બ્રિટનનો વિજય થયો હતો. ફિફા (FIFA)ના કડક નિયમો અનુસાર, ફૂટબોલના મેદાન પર કોઈ પણ પ્રકારના રાજકીય, ધાર્મિક કે વ્યક્તિગત સંદેશાઓ પ્રદર્શિત કરવા પર સખત પ્રતિબંધ છે. ઇંગ્લેન્ડ સામેની મેચમાં આર્જેન્ટિના તરફથી કરાયેલા આ રાજકીય પ્રદર્શને સ્પોર્ટ્સમેનસ્પિરિટ પર સવાલો ઉભા કર્યા છે.