Search

    Language Settings
    Select Website Language

    GDPR Compliance

    We use cookies to ensure you get the best experience on our website. By continuing to use our site, you accept our use of cookies, Privacy Policy, and Terms of Service.

    BijnorNews
    Bijnor news

    આજે 9મો રાષ્ટ્રીય નેચરોપેથી દિવસ:દવા વગરની કુદરતી ઉપચાર પદ્ધતિ, પાંચ મહાભૂતોના સંતુલનથી નિરોગી રહેવા માટેની ડો. હેતલે ટીપ્સ જણાવી

    7 hours ago

    ભારત એ પ્રકૃતિની પૂજા કરનારો દેશ છે અને પ્રકૃતિ એ દરેક રોગની દવા છે તેવું પણ માનવામાં આવે છે અને તેથી જ ભારતમાં પ્રાકૃતિક ચિકિત્સા એટલે કે નેચરોપેથીને પ્રાધાન્ય આપવામાં આવી રહ્યું છે. દર વર્ષે 18 નવેમ્બરે રાષ્ટ્રીય નેચરોપેથી દિવસની ઉત્સાહભેર ઉજવણી કરવામાં આવે છે. ભારત સરકારના આયુષ મંત્રાલયે 18 નવેમ્બર, 2018ના રોજ આ દિવસની જાહેરાત કરી હતી, કારણ કે આ જ દિવસે વર્ષ 1945માં રાષ્ટ્રપિતા મહાત્મા ગાંધી ઓલ ઈન્ડિયા નેચર ક્યોર ફાઉન્ડેશન ટ્રસ્ટના આજીવન અધ્યક્ષ બન્યા હતા. ગાંધીજી કુદરતી ઉપચારના પ્રખર હિમાયતી હતા અને તેમણે પોતાના જીવનમાં આ પદ્ધતિના સિદ્ધાંતોને અપનાવ્યા હતા. આ વર્ષની થીમ પ્રાકૃતિક ચિકિત્સા, સ્વસ્થ ભારત આ વર્ષે 9મા રાષ્ટ્રીય નેચરોપેથી દિવસની ઉજવણી કરવામાં આવી રહી છે, જેની મુખ્ય થીમ પ્રાકૃતિક ચિકિત્સા, સ્વસ્થ ભારત રાખવામાં આવી છે. આ થીમનો મુખ્ય ઉદ્દેશ્ય દેશના દરેક નાગરિકને કુદરતી જીવનશૈલી અપનાવીને રોગમુક્ત અને તંદુરસ્ત ભારતનું નિર્માણ કરવા માટે પ્રેરિત કરવાનો છે. આ રાષ્ટ્રીય કક્ષાની મુખ્ય ઉજવણી કર્ણાટકના નાગમંગલા સ્થિત સેન્ટ્રલ રિસર્ચ ઇન્સ્ટિટ્યૂટ ઓફ યોગા એન્ડ નેચરોપેથી (CRIYN) ખાતે આયોજિત કરવામાં આવી છે, ઉપરાંત પુણે સ્થિત નેશનલ ઇન્સ્ટિટ્યૂટ ઓફ નેચરોપેથી (NIN) સહિત દેશભરની સંસ્થાઓમાં વિવિધ જનજાગૃતિ શિબિરો, સેમિનાર અને પ્રાકૃતિક આહાર મેળાઓનું આયોજન કરવામાં આવે છે. નેચરોપેથી એટલે શું? વડોદરાના જાણીતા નેચરોપેથી તબીબ ડો. હેતલ પાઠકે જણાવ્યું હતું કે, નેચરોપેથી એટલે કે પ્રાકૃતિક ચિકિત્સા એ સારવારની એક એવી પ્રાચીન અને વૈજ્ઞાનિક પદ્ધતિ છે, જેમાં કોઈપણ પ્રકારની દવાઓ કે શસ્ત્રક્રિયા વિના માત્ર કુદરતના પાંચ મહાભૂતો પૃથ્વી, જળ, અગ્નિ, વાયુ અને આકાશના સંતુલન દ્વારા શરીરને સ્વસ્થ કરવામાં આવે છે. આ પદ્ધતિનો મૂળભૂત સિદ્ધાંત એ છે કે માનવ શરીરમાં પોતાની જાતે જ રોગો સામે લડવાની અને સ્વસ્થ થવાની અદભુત ક્ષમતા રહેલી છે. જ્યારે શરીરમાં વિજાતીય દ્રવ્યો એટલે કે ઝેરી તત્વો જમા થાય છે, ત્યારે રોગો ઉદ્ભવે છે. નેચરોપેથીમાં ડાયટ થેરેપી, ઉપવાસ, મડ થેરેપી, જળ ચિકિત્સા, સનબાથ, માલિશ અને યોગ જેવી સરળ પદ્ધતિઓનો ઉપયોગ કરીને શરીરનું શુદ્ધિકરણ કરવામાં આવે છે. આધુનિક સમયમાં નેચરોપેથી આ રીતે ઉપયોગી આધુનિક સમયની ભાગદોડભરી જીવનશૈલી, અનિયમિત ખાનપાન અને માનસિક તણાવને કારણે થતા ડાયાબિટીસ, બ્લડ પ્રેશર, સ્થૂળતા અને અનિદ્રા જેવા જીવનશૈલી સંબંધિત રોગોના નિવારણ માટે નેચરોપેથી અત્યંત અસરકારક અને આડઅસર રહિત વિકલ્પ સાબિત થઈ રહી છે. પ્રાકૃતિક સારવાર એ લાંબા સમય સુધી નિરોગી રાખતી સારવાર છે. ડો. હેતલ પાઠકે જણાવ્યું હતું કે, જેમ શરદી, ખાંસી કે ડાયેરિયા થાય છે તે સારી બાબત કહી શકાય. કારણ કે તે શરીરનો કચરો બહાર કાઢવા માટેની પ્રક્રિયા છે. આ પ્રકારના રોગ સામે પ્રાકૃતિક રીતે જ સારવાર કરાવવી જોઈએ જેમ કે ઘરગથ્થુ ઉપચાર થકી સારવાર કરીએ તો શરીરનું શુદ્ધિકરણ પણ થશે અને રોગમાંથી મુક્તિ પણ મળશે. શરીરને પાંચ તત્વો સાથે જોડેલું રાખવું અને કઈ ન કરવું એ પણ એક સારવાર જ છે. ક્યારેક ક્યારેક શરીરને આરામ આપવો ખુબ જરૂરી બને છે. 'સ્ક્રીન ટાઈમ ઘટાડવો ખુબ જરૂરી છે' તેને ઉમેર્યું હતું કે, હાલમાં દરકે વર્ગ સ્ક્રીન એડિક્ટ થઇ ગયો છે. ત્યારે સ્ક્રીન ટાઈમ ઘટાડવો ખુબ જરૂરી છે. આસપાસની પ્રકૃતિને મ્હાલવાના બદલે હાલમાં લોકો પોતાના મોબાઈલમાં જ વ્યસ્ત જોવા મળે છે. જેમ કે, પ્રવાસ કરતા હોઈએ ત્યારે આસપાસની લીલોતરી કે આસપાસની ચીજવસ્તુઓને માણવી એ પણ એક પ્રાકૃતિક સારવાર છે જે મનને પ્રફુલ્લિત રાખે છે. 'પ્રકૃતિ અને સંગીત એકબીજા સાથે વણાયેલા' ડો. હેતલ પાઠક જણાવે છે કે, પ્રાકૃતિક સારવારમાં હું સંગીત થેરાપી પણ કરાવું છું. પ્રકૃતિ અને સંગીત એકબીજા સાથે વણાયેલા છે. પંખીના કલરવનો અવાજ, વહેતી નદીનો ખળખળ અવાજ, હવામાં ઝૂલતા વૃક્ષોના પાંદડાઓનો અવાજ એ દરેક વ્યક્તિના મનમાં સકારાત્મક ઉર્જા પેદા કરે છે. આ તમામ એ સંગીતના જ એક પ્રકાર છે. જયારે આપણે સંગીત સાંભળીએ છે ત્યારે ઇન્દ્રિયો પ્રફુલ્લિત થઇ જાય છે અને શરીરમાંથી 'વાહ' એવો ઉદગાર નીકળી જાય છે. આ ઉદગાર એ જ પ્રાકૃતિક સારવાર છે. ક્યારેક મન ભરાઈ જાય તો સંગીત આંખોમાંથી આંસુ છલકાવી દે છે અને ક્યારેક એ જ સંગીત ચહેરા ઉપર ખુશીઓની લહેરકી રેલાવી દે છે. દરેક વ્યક્તિમાં ઈમોશન્સ રહેલા છે જે બહાર લાવવા ખુબ જરૂરી છે અને તે કામ પ્રકૃતિ બખૂબી કરે છે. વ્યક્તિના જીવનમાં રંગોનું આગવું સ્થાન 'સામાન્ય રીતે કોર્પોરેટ કલ્ચરમાં લોકો 12 થી 15 કલાક એક જ સ્થળે બેસીને ઓફિસમાં કામ કરતા હોય છે અને તે પણ માનસિક તણાવથી ભરપૂર હોય છે. ત્યારે ઓફિસમાં પણ એવું વાતાવરણ ઉભું કરી શકાય કે જેનાથી પ્રકૃતિની સમીપ રહી શકાય. જેમ કે ઓફિસની દિવાલોનો કલર હળવો ફૂલ હોય તો વાતાવરણ પણ હળવું રહે છે. જો ભડકીલો રંગ હોય તો સ્ટ્રેસ વધુ રહે છે. ઉપરાંત જયારે ફોન પર વાત કરો ત્યારે સાથે વોક પણ કરો તેનાથી તણાવ દૂર થશે. ઓફિસમાં આસપાસ સુંદર ફૂલછોડ રાખો જે મનમોહક લાગે જે કામ કરવામાં વધુ વેગ આપશે.' 'જંકફૂડથી દૂર રહો, હેલ્ધી ખોરાક લો' પાઠકે જણાવ્યું હતું કે, પ્રાકૃતિક સારવાર પણ ત્યારે જ કામ લાગે જયારે યોગ્ય ખોરાક લેવાય. હાલમાં જંકફૂડના કારણે મેદસ્વીતાથી માંડી અનેક રોગો ઘર કરી જાય છે. ત્યારે જંકફૂડથી દૂર રહેવું જોઈએ. આ ઉપરાંત તમને ભૂખ લાગે ત્યારે ચોક્કસ કરો કે ભૂખ કયા પ્રકારની છે. જેમ કે તમે ત્યારે પાણી પી લો અને તૃપ્ત થાવ તો સમજી લેજો કે તે પાણી માટેની ભૂખ હતી. શરીરને કષ્ટ થાય તેવો ખોરાક લેવાનું હંમેશા ટાળો. સાંપ્રત સમયમાં દરેક વ્યક્તિ ઈશ્વરની સમીપ જઈ રહ્યો છે પરંતુ પ્રકૃતિથી અંતર બનાવી લીધું છે ત્યારે દરેકે એ સમજવાની જરૂર છે પ્રકૃતિ એ જ ઈશ્વર છે.
    Click here to Read More
    Previous Article
    સુરત ભાજપના વોટ્સએપ ગ્રુપમાં 'તોડકાંડ'ની ચર્ચાથી હડકંપ:કોર્પોરેટર-કાર્યકર્તા વચ્ચે 19 લાખના કથિત સેટલમેન્ટની ચર્ચા, ભાસ્કરને મળ્યા 'સ્ફોટક ચેટ'ના પુરાવા
    Next Article
    ગુજરાતમાં દિલજીત દોસાંઝનો ફીવર, હોટલ-ફ્લાઈટ ભાડામાં 7 ગણા સુધીનો વધારો:દેશભરમાંથી યંગસ્ટર્સ નમો સ્ટેડિયમમાં કોન્સર્ટ માણવા આતુર, હોટલ રૂમનું ભાડું ₹35,000 સુધી ચૂકવવું પડશે

    Related Gujarat Updates:

    Are you sure? You want to delete this comment..! Remove Cancel

    Comments (0)

      Leave a comment