પ્રિયાએ કહ્યું- મને એકલામાં મળવા આવી જા:પરિણીત પ્રેમિકાનો વીડિયો કોલ આવતા પ્રેમીને થઇ ખાતરી, ગામ છોડીને 26 કિલોમીટર દૂર પહોંચ્યો

'ગુજરાત ક્રાઇમ ફાઇલ્સ'ના પહેલા એપિસોડમાં આપણે જોયું કે કડીના આદુંદરા ગામે રહેતા સનીને તેના જ કાકાની સગી સાળી પ્રિયા સાથે પ્રેમસંબંધ હતો. પ્રિયાના લગ્ન થઇ ગયા હતા અને તે રિસામણે આવી ત્યારે આ પ્રેમસંબંધ વધુ આગળ વધ્યો હતો. બન્નેના પરિવારને જાણ થઇ જતાં તેમને સમજાવ્યા હતા અને પ્રિયા પાછી પોતાના સાસરે ગઇ હતી. સાસરે ગયા બાદ પણ પ્રિયા સનીને ભૂલી શકી નહોતી. બન્ને એકબીજા સાથે ચોરી છૂપીથી ફોન પર વાતો કરતા હતા. એક દિવસ બન્ને ભાગી ગયા. પરિવારજનો તેમની ભાળ મેળવીને પાછા લઇ આવ્યા અને બન્નેને ફરીથી સમજાવ્યા. સની સાથે અફેર હોવા છતાં પ્રિયાના પતિએ તેને સ્વીકારી લીધી. તેને એમ હતું કે કદાચ પ્રિયા સુધરી જશે. તેને ફરીથી સાસરે લઇ ગયા બાદ પણ તે સનીને ભૂલી નહોતી. બન્ને ફરીથી ફોન પર વાતો કરવા લાગ્યા હતા. હવે આગળ વાંચો કે બન્ને વચ્ચેનું આ અફેર આગળ કેવો વળાંક લે છે.... સાસરે રહેલી પ્રિયા અને આદુંદરા ગામે રહેતો સની ઘણીવાર ફોન પર વાતો કરતા. તેમને એમ હતું કે આ વાતચીતની કોઇને જાણ નહીં થાય પરંતુ તેવું ન થયું. એક દિવસ પ્રિયાના પતિ રમેશને આ બન્ને વચ્ચે થતી વાતચીતની ખબર પડી ગઇ. તેને મનોમન ગુસ્સો આવ્યો. તેને થયું કે મારી પત્નીને મેં આટલી સમજાવી, આટલી તક આપી તેમ છતાં તે સુધરવાનું નામ નથી લેતી, હવે મારે સની સાથેના તેના પ્રેમસંબંધ વિશે કંઇક કરવું પડશે. રમેશના મનમાં ગુસ્સો તો હતો જ એટલે સૌથી પહેલાં તેણે પ્રિયા સાથે મોટો ઝઘડો કર્યો. આ ઝઘડો એટલો ઉગ્ર બની ગયો કે પ્રિયા ડરી ગઇ. બીકના માર્યા તેણે પતિને ખાતરી આપી કે હવે પછી હું સની સાથે ક્યારેય વાત નહીં કરૂં. જો કે રમેશને તેની આ વાત પર વિશ્વાસ નહોતો એટલે તેણે પોતાના કાકા જયંતીભાઇને બધી વાત કરી. બન્નેએ સાથે મળીને સનીને ધમકી આપવાનું નક્કી કર્યું. તરત જ સનીને ફોન લગાવ્યો અને તેને પ્રિયા સાથે વાત ન કરવા ધમકી આપી. જેથી તેમને ફોન પર જ મોટો ઝઘડો થયો. હવે રમેશના મનમાં એક ખતરનાક વિચાર આવ્યો. તેણે પ્રિયાના જીવનમાંથી સની નામનો કાંટો હંમેશને માટે દૂર કરવાનું નક્કી કરી લીધું. કોઇપણ રીતે સનીને સાંકોડ ગામે બોલાવવો અને તે આવે એટલે મારી નાખવો આવો પ્લાન ઘડી નાખ્યો. જેમાં તેમને ભત્રીજા સુનિલનો પણ સાથ મળ્યો. રમેશ અને જયંતી સાથે ઝઘડો થયો હોવાથી જો એ લોકો ફોન કરીને સનીને બોલાવે તો સની આવે નહીં એટલે તેમણે પ્રિયાને કહ્યું કે તું સનીને ફોન કરીને આપણા ગામે બોલાવ. પ્રિયા સનીના પ્રેમમાં હતી અને તે પોતાના પતિના સ્વભાવથી સારી રીતે પરિચિત હતી એટલે તેણે સનીને ફોન કરવાની ના પાડી દીધી. રમેશે તેને માર માર્યો અને સનીને બોલાવવા માટે ફરીથી કહ્યું તેમ છતાં પ્રિયા ન માની. હવે રમેશના ગુસ્સાનો પાર નહોતો. તે આડેધડ પ્રિયાને મારવા લાગ્યો. પતિનું આવું રૌદ્ર સ્વરૂપ જોઇને પ્રિયા ગભરાઇ ગઇ. છેવટે તે સનીને ફોન કરવા માટે માની ગઇ. *** 2 એપ્રિલ, 2026 આદુંદરા ગામ બપોરે અંદાજે 1:30 વાગ્યે સની પોતાના ગામમાં જ હતો. ત્યાં જ અચાનક તેનો મોબાઇલ રણક્યો. સનીએ જોયું તો પ્રિયાનો ફોન હતો. તે ચોંકી ગયો. છતાં તેણે ફોન ઉપાડ્યો. સામેથી પ્રિયાએ તેને કહ્યું કે હું થોળ તળાવ પાસે આવું છું, તું મને મળવા આવ. થોડીવાર માટે તો સનીને પ્રિયાની વાત પર વિશ્વાસ ન આવ્યો. સની માનવા તૈયાર નહોતો કે રમેશ સાથે થયેલા ઝઘડા બાદ પણ પ્રિયા તેને ફોન કરશે એટલે ખાતરી કરવા માટે સનીએ પ્રિયાને કહ્યું કે તું મને વીડિયો કોલ કર તો હું સાચું માનું. પ્રિયા પાસે વીડિયો કોલ કરવા સિવાય કોઇ રસ્તો નહોતો. તેણે વીડિયો કોલ કર્યો. સનીએ જોયું તો પ્રિયા તેના ઘરે હતી. તેણે પ્રિયાને કહ્યું જો તું સાચે જ મને મળવા આવતી હો તો હું પણ આવવા માટે તૈયાર છું. આના પછી બન્ને વચ્ચે થોડી વાતચીત થઇ. જેથી સનીને વિશ્વાસ આવી ગયો કે પ્રિયા મળવા આવે છે. તે તરત જ પોતાના ગામેથી નીકળીને 26 કિલોમીટર દૂર આવેલા થોળ તરફ જતી રિક્ષામાં બેસી ગયો. બપોરે 4 વાગ્યે સની થોળ ત્રણ રસ્તા પર પહોંચી ગયો હતો. અહીં પ્રિયા પહેલેથી જ હાજર હતી. તે એકલી સનીની રાહ જોઇને ઊભી હતી. સનીએ પ્રિયાને જોઇ અને તેની નજીક ગયો. બન્નેએ હજુ કંઇક વાત કરવાનું શરૂ કર્યાં ત્યાં જ પાછળથી એક પિકઅપ ડાલુ આવ્યું. સની કંઇ સમજે-વિચારે તે પહેલાં જ પિકઅપ ડાલુ તેની પાસે આવીને ઊભું રહી ગયું. તેમાંથી પ્રિયાનો પતિ રમેશ, તેના કાકા જયંતીભાઇ અને સુનિલ બહાર આવ્યા. આ ત્રણેય થોળ ગામે આવેલી ચંદનપુરા ચોકડી ઉપર રિક્ષા સ્ટેન્ડ નજીક પોતાનું પિકઅપ ડાલુ લઇને સંતાયેલા હતા. ત્રણેયે સની પાસે આવીને તેને ઊંચકીને ડાલામાં નાખી દીધો. રમેશ પ્રિયા પાસે ગયો અને એક રિક્ષા કરી તેને સાંકોડમાં આવેલા પોતાના ઘરે મોકલી દીધી. થોળથી સાંકોડ ગામનું અંતર અંદાજે 53 કિલોમીટર થતું હતું. પ્રિયાને રવાના કર્યા પછી રમેશ પિકઅપ ડાલામાં બેસી ગયો. સનીનું અપહરણ કરીને સાંકોડ ગામ તરફ રવાના થઇ ગયા. સાંકોડ પહોંચીને સનીને મારી નાખવાનો પ્લાન હતો. થોળથી સાણંદ જી.આઇ.ડી.સી થઇ સાંકોડ ગામની સીમમાં લઇ જતી વખતે રસ્તામાં સનીને ધોકા અને ગડદા પાટુથી ખૂબ માર માર્યો. સીમમાં પહોંચ્યા બાદ પણ સનીને માર મારવાનું ચાલુ જ હતું. આ માર સની સહન ન કરી શક્યો. શરીરમાં અંદરના ભાગે ઇજાઓ થતાં તેનું ત્યાં જ મોત થઇ ગયું. *** લાશને ઠેકાણે પાડી નિશ્ચિંત થઇ ગયા જે સની થોડા સમય પહેલાં જીવતો જાગતો હતો તે હવે લાશ બનીને સીમમાં પડ્યો હતો. રમેશ અને બીજા 2 આરોપીઓએ તેની લાશને ઠેકાણે પાડવાનું નક્કી કર્યું. ત્રણેયે સનીની લાશ ઉપાડીને ફરી પિકઅપ ડાલામાં નાખી અને ડાલુ વીરમગામ તરફ મારી મૂક્યું. રસ્તામાં થોળી મુબારક ગામ આવ્યું. જ્યાંથી નર્મદા કેનાલ પસાર થતી હતી. ત્રણેયને સનીની લાશના નિકાલ માટે આ જગ્યા યોગ્ય લાગી. તેમણે પિકઅપ ડાલુ ત્યાં ઊભું રાખ્યું અને લાશને કેનાલના પાણીમાં ફેંકી દીધી. આટલું કરતાં સુધીમાં રાતના 12 વાગી ગયા હતા. ત્રણેયે સાથે મળીને રાતના અંધારામાં પિકઅપ ડાલુ પણ ધોઇ નાખ્યું કે જેથી કરીને કોઇ પુરાવા ન રહે. સનીની લાશને ઠેકાણે પાડ્યા બાદ ત્રણેય નિશ્વિંત હતા. મનોમન હરખાતા હતા કે અમને કોઇએ જોયા નથી અને આ વાતની કોઇને ખબર નથી. ત્રણેય પોતાના ગામ સાંકોડ આવ્યા. જાણે કંઇ બન્યું જ ના હોય તે પોતપોતાના ઘરે જતાં રહ્યાં. મોડી રાત્રે પતિ રમેશને ઘરે આવેલો જોઇને પ્રિયા ડઘાઇ ગઇ. તેને ખબર હતી પોતાના પતિએ સનીની હત્યા કરી નાખી છે. તેના ચહેરાના હાવભાવ જોઇને રમેશે પિત્તો ગુમાવ્યો. તેણે પ્રિયાને ધમકી આપી કે આના વિશે કોઇને વાત કરતી નહીં, નહીંતર હું તને છૂટાછેડા આપી દઇશ અને તારી જિંદગી બરબાદ કરી નાખીશ. જેથી પ્રિયાએ પોતાના મોંઢા પર તાળું મારી દીધું. આ તરફ આદુંદરા ગામે સનીના ઘરે ચિંતાનો માહોલ હતો. મોડી રાત સુધી તે ઘરે પાછો આવ્યો નહોતો એટલે પરિવારે તેને શોધવાનું શરૂ કર્યું. તેના મિત્રોને પૂછ્યું પણ કોઇને ખબર નહોતી કે સની ક્યાં ગયો છે. ગામમાં સનીની જે-જે જગ્યાએ બેઠક હતી ત્યાં પણ શોધ્યો પરંતુ ત્યાંથી પણ તે ન મળ્યો. કોઇ રીતે સનીના સગડ ન મળતાં પરિવારને ફાળ પડી કે ફરી પાછું તેને પ્રિયા સાથે કંઇ થયું તો નહીં હોય ને. આ ચિંતામાંને ચિંતામાં આખી રાત વિતાવ્યા બાદ બીજા દિવસે પરિવારને કડી પોલીસને સની ગુમ થવા અંગે જાણ કરી. હવે શરૂ થયો પોલીસ તપાસનો ધમધમાટ. 4 દિવસ સુધી પોલીસ સનીને શોધતી રહી, આસપાસના પોલીસ સ્ટેશનમાં પણ જાણ કરી પરંતુ સનીની કોઇ ભાળ ન મળી. પાંચમા દિવસે સુરેન્દ્રનગરના લખતર પોલીસ સ્ટેશનની હદમાં આવેલા જ્યોતિપુરા ગામ પાસેની નર્મદા કેનાલમાંથી અજાણ્યા યુવકની અજાણી લાશ મળી આવી. સની ગુમ થવા અંગે લખતર પોલીસને જાણ થયેલી જ હતી એટલે લખતર પોલીસે કડી પોલીસને જાણ કરી અને લાશનો ફોટો મોકલ્યો. કડી પોલીસે લાશનો ફોટો સનીના ફાઇલ ફોટા સાથે મેચ કર્યો. જેમાં ખબર પડી કે જે લાશ મળી છે તે સનીની જ છે. પોલીસે તરત જ સનીના પરિવારને લાશ મળવાની જાણ કરી. આ વાત સાંભળીને પરિવાર પર જાણે કે આભ તૂટી પડ્યું. છતાં હિંમત એકઠી કરીને પરિવાર સનીની લાશ જે જગ્યાએ રખાઇ હતી તે સરકારી હોસ્પિટલ પહોંચ્યો. અહીં આવીને લાશની ઓળખ કરી. પોલીસે જ્યારે પરિવારને પૂછ્યું કે આ ઘટના પાછળ કોનો હાથ હોઇ શકે છે ત્યારે પરિવારે પ્રિયાના પતિ રમેશનું નામ આપ્યું. પોલીસે તરત જ રમેશને પકડી લીધો અને આકરી પૂછપરછ કરી. જેમાં તેણે બીજા આરોપીઓ જયંતીભાઇ અને સુનિલનું નામ પણ ઓકી દીધું. જેથી કાયદાનો સકંજો એ બન્ને ઉપર પણ કસાયો. પ્રેમ સંબંધોમાં વિવેક ચૂકી જવાનું પરિણામ કેટલું ભયાનક આવી શકે છે તેનું આ સૌથી મોટું ઉદાહરણ છે. એકતરફ સનીના પરિવારે પોતાનો દીકરો ગુમાવ્યો છે તો બીજીતરફ કાયદાના સકંજાએ સાબિત કરી દીધું છે કે ગુનેગારો ગમે તેટલી છૂપાવાની કોશિશ કરે પરંતુ તે ખાખીથી બચી શકતા નથી. આ પણ વાંચો 'મને મળવા આવી જા', કુંવારા સની અને પરિણીત પ્રિયા વચ્ચે શરૂ થયો પ્રેમસંબંધ, પાર્ટ-1