Search

    Language Settings
    Select Website Language

    GDPR Compliance

    We use cookies to ensure you get the best experience on our website. By continuing to use our site, you accept our use of cookies, Privacy Policy, and Terms of Service.

    BijnorNews
    Bijnor news

    આજ સુધી કોઈએ નથી કર્યું તે મસ્કના ‘સ્ટારશિપ’એ કરી બતાવ્યું:ઓર્બિટમાંથી પરત ફરી રોબોટિક આર્મ્સે રોકેટને હવામાં જ ઝડપી લીધું; બૂસ્ટર ફાટવાથી ડબલ કેચનો પ્લાન ફેલ

    2 दिन पहले

    ઈલોન મસ્કની સ્પેસ કંપની સ્પેસએક્સના સૌથી શક્તિશાળી રોકેટ ‘સ્ટારશિપ 15’એ એ કરી બતાવ્યું જે આજ સુધી કોઈ રોકેટે કર્યું ન હતું. આ રોકેટ 14 નવેમ્બરે સ્ટારબેઝથી ઊડ્યું, ઓર્બિટમાં ગયું, 26 સ્ટારલિંક V3 સેટેલાઈટ ડિપ્લોય કર્યા. ધરતીના 14 ચક્કર લગાવ્યા, આશરે 22 કલાક પૃથ્વીની કક્ષામાં રહ્યું. 15 નવેમ્બરે પરત આવીને એ જ ટાવર પર ઉતર્યું જ્યાંથી ઊડ્યું હતું. એટલે કે 2 મોટા રોબોટિક હાથ, જેને ચોપસ્ટિક આર્મ્સ પણ કહે છે, તેમણે આ રોકેટને પકડી લીધું. આ એક પૂરી રાઉન્ડ ટ્રિપ છે. લોન્ચથી ઓર્બિટમાં જવું અને પરત એ જ લોન્ચ પેડ પર આવવું. શિપનું પરત આવવું જ સૌથી મુશ્કેલ ભાગ હતો. બૂસ્ટર પહેલાં 3 વાર કેચ થઈ ચૂક્યું છે. શિપનું ઓર્બિટલ સ્પીડથી પરત આવવું, રી-એન્ટ્રી સહન કરવી, પલટવું અને હવામાં રોકાઈને આર્મ્સમાં આવવું- આ પહેલાં ક્યારેય થયું ન હતું. સ્ટારશિપ સ્પેસક્રાફ્ટ (ઉપરનો ભાગ) અને સુપર હેવી બૂસ્ટર (નીચેનો ભાગ)ને કલેક્ટિવલી 'સ્ટારશિપ' કહેવામાં આવે છે. આ વ્હીકલની ઊંચાઈ 403 ફૂટ છે. આ 'સ્ટારશિપ'ની 15મી ટેસ્ટ ફ્લાઈટ હતી. આ લોન્ચ અમેરિકાના ટેક્સાસ સ્થિત સ્ટારબેઝથી ભારતીય સમય અનુસાર શનિવારે સવારે 4:15 વાગ્યે કરવામાં આવ્યું છે. સ્ટારબેઝ પર સ્ટારશિપની 2 તસવીરો.. બૂસ્ટર ફેલ થયું, પરંતુ મિશન અટક્યું નહીં સ્પેસએક્સનો પ્લાન "ડબલ કેચ" હતો. એટલે કે બૂસ્ટર પણ પરત આવે અને યાન પણ. પરંતુ બૂસ્ટરમાં પરત આવતી વખતે ટેકનિકલ ખામી સર્જાઈ. કંટ્રોલરે તેને ટાવરથી હટાવીને ગલ્ફ ઓફ મેક્સિકો તરફ ડાયવર્ટ કરી દીધું, જ્યાં તે ફાટી ગયું. આ V3 બૂસ્ટર હતું. જૂના વર્ઝનને સ્પેસએક્સ 3 વાર પકડી ચૂક્યું છે, પરંતુ V3ને પહેલીવાર પકડવાનો પ્રયાસ હતો. સ્પેસએક્સના કેટ ટાઈસે જણાવ્યું- પરત આવતી વખતે બૂસ્ટરના એન્જિન ખૂબ વહેલા બંધ થઈ ગયા. બૂસ્ટરની ગાઈડન્સ સિસ્ટમને લાગ્યું કે, તે યોગ્ય સ્થિતિમાં નથી, તેથી તેણે પોતાની જાતે જ પાણી તરફ ડાયવર્ઝન અને સેલ્ફ-ડિસ્ટ્રક્શન શરૂ કરી દીધું. ફુલ રાઉન્ડ ટ્રિપથી શું બદલાશે 1. સ્પેસફ્લાઈટ હવે હવાઈ જહાજ જેવી હશે: ફાલ્કન 9 માત્ર બૂસ્ટર બચાવતું હતું. સ્ટારશિપ આખું રોકેટ બચાવી લે છે. કોઈ હિસ્સો ફેંકવાનો નહીં, દરિયામાંથી ઉઠાવવાનો નહીં. ઉતરો, ફ્યુઅલ ભરો, ફરી ઊડાવો. સ્પેસએક્સનો ટાર્ગેટ છે - 2027ના પ્રથમ છમાસિક ગાળા સુધીમાં અઠવાડિયામાં એક લોન્ચ. 2. અંતરિક્ષમાં ડેટા સેન્ટર હવે હકીકત: મસ્કનો પ્લાન છે - ઓર્બિટમાં 10 લાખ સેટેલાઈટ સુધીનું નેટવર્ક, જે AI માટે ડેટા સેન્ટરનું કામ કરશે. અંતરિક્ષમાં સોલાર પાવર 24x7 છે, કૂલિંગ ફ્રી છે, જમીન-પાણી-વીજળીની પરમિટની જરૂર નથી. સ્ટારશિપ એક વારમાં 100+ ટન સામાન લઈ જઈ શકે છે અને પરત પણ લાવી શકે છે. 3. ચંદ્ર અને મંગળનો રસ્તો ખૂલ્યો: 2027માં ક્રૂ વગર ચંદ્ર પર લેન્ડિંગ, NASAના આર્ટેમિસ પ્રોગ્રામ માટે સ્ટારશિપ જ લૂનર લેન્ડર છે. મંગળ માટે ઓર્બિટમાં ફ્યુઅલ ભરવું પડશે, જેના માટે ડઝનેક લોન્ચ જોઈએ. તે માત્ર ફુલી રીયુઝેબલ રોકેટથી જ શક્ય છે. લુઇઝિયાનામાં 100 બિલિયન ડોલરની નવી લોન્ચ સાઈટ બની રહી છે. હવે સ્ટારશિપના અગાઉ થયેલા 14 ટેસ્ટ વિશે જાણો…. 14મો ટેસ્ટ: સ્ટારશિપ પહેલીવાર પૃથ્વીની કક્ષામાં પહોંચ્યું 'સ્ટારશિપ'નો 14મો ટેસ્ટ ભારતીય સમય અનુસાર 28 સપ્ટેમ્બરે સાંજે 6:16 વાગ્યે થયો હતો. તેમાં સ્ટારશિપ પહેલીવાર પૃથ્વીની કક્ષામાં પહોંચ્યું હતું. 26 સેટેલાઈટ પણ લોન્ચ કરવામાં આવ્યા. શરૂઆતી યોજના હેઠળ સ્ટારશિપે આશરે 10 કલાક સુધી પૃથ્વીના ચક્કર લગાવવાના હતા, પરંતુ મિશન દરમિયાન કરવામાં આવેલા રિવ્યૂ બાદ કંટ્રોલર્સે તેને વહેલા સમાપ્ત કરવાનો નિર્ણય કર્યો. મિશન શરૂ થયાના ત્રીજા કલાકની આસપાસ તેને પ્રશાંત મહાસાગરમાં ઉતારવામાં આવ્યું. આ ઉડાનથી પહેલીવાર નવી ટેકનિકવાળા 26 'સ્ટારલિંક V3' સેટેલાઈટ્સ અંતરિક્ષમાં મોકલવામાં આવ્યા. 13મો ટેસ્ટ: પહેલીવાર પાણીમાં સુરક્ષિત તરતું દેખાયું સ્ટારશિપ સ્ટારશિપની 13મી ટેસ્ટ ઉડાન ભારતીય સમય અનુસાર 25 જુલાઈ 2026ના રોજ થઈ હતી. તેમાં અપર સ્ટેજે હિંદ મહાસાગરમાં લેન્ડ કર્યું, જ્યારે તેના બૂસ્ટરે મેક્સિકોની ખાડીમાં લેન્ડિંગ કર્યું. આ પહેલીવાર હતું જ્યારે સ્ટારશિપને સુરક્ષિત પાણીમાં ઉતાર્યું. લેન્ડિંગ દરમિયાન સ્ટારશિપ પોતાની 'બેલી-ફ્લોપ' સ્થિતિમાંથી સીધું થયું અને પાણી પર લંબવત ઉતર્યું. ત્યારબાદ તે ધીરે-ધીરે એક તરફ ઝૂકીને દરિયામાં તરવા લાગ્યું. 12મો ટેસ્ટ: એન્જિન ફેલ થયા પછી પણ હિંદ મહાસાગરમાં લેન્ડિંગ 'સ્ટારશિપ'નો 12મો ટેસ્ટ સફળતાઓ અને નિષ્ફળતાઓની મિશ્ર સફર રહી હતી. તેમાં સ્ટારશિપના નવા અને મોટા વર્ઝન (V3)નો ઉપયોગ પહેલીવાર કરવામાં આવ્યો હતો. ટેક્સાસના દક્ષિણી છેડે સ્થિત 'સ્ટારબેઝ' લોન્ચિંગ પેડ પરથી ઉડાન ભર્યા બાદ એન્જિનમાં ખામી આવી ગઈ. આ કારણે રોકેટ નષ્ટ થવાનો ખતરો મંડરાઈ રહ્યો હતો. આમ છતાં લગભગ એક કલાક બાદ સ્ટારશિપ સ્પેસક્રાફ્ટ હિંદ મહાસાગરમાં સુરક્ષિત લેન્ડ કરવામાં સફળ રહ્યું. આ ટેસ્ટને ભારતીય સમય અનુસાર 23 મેની સવારે લોન્ચ કરવામાં આવ્યો. 11મો ટેસ્ટ: બીજી વાર આઠ ડમી સેટેલાઈટ અંતરિક્ષમાં છોડ્યા સ્ટારશિપનો 11મો ટેસ્ટ 14 ઓક્ટોબર 2025ના રોજ સવારે 5:00 વાગ્યે ટેક્સાસના બોકા ચિકાથી કરવામાં આવ્યો હતો. આ ટેસ્ટ 1 કલાક 6 મિનિટનો હતો, જેમાં સુપર હેવી બૂસ્ટરની અમેરિકાની ખાડીમાં વોટર લેન્ડિંગ કરાવવામાં આવી. જ્યારે સ્ટારશિપની હિંદ મહાસાગરમાં વોટર લેન્ડિંગ કરાવવામાં આવી. આ ફ્લાઈટનો ઉદ્દેશ્ય ભવિષ્યમાં રોકેટને ઉડાન ભરનારી જગ્યા પર પરત લાવવા સાથે જોડાયેલા ટેસ્ટ કરવાનો હતો. 10મો ટેસ્ટ: પહેલીવાર આઠ ડમી સેટેલાઈટ અંતરિક્ષમાં છોડ્યા સ્ટારશિપનો 10મો ટેસ્ટ 27 ઓગસ્ટ 2025ના રોજ કરવામાં આવ્યો હતો, જે સફળ રહ્યો હતો. રોકેટને સવારે 5:00 વાગ્યે ટેક્સાસના બોકા ચિકાથી લોન્ચ કરવામાં આવ્યું. આ ટેસ્ટ 1 કલાક 6 મિનિટનો હતો. આ મિશનમાં સ્ટારલિંક સિમ્યુલેટર સેટેલાઈટને અંતરિક્ષમાં છોડવાથી લઈને એન્જિન ચાલુ કરવા જેવા તમામ ઓબ્જેક્ટિવ પૂરા થયા. સ્ટારલિંક સિમ્યુલેટર સેટેલાઈટ વાસ્તવિક સ્ટારલિંક સેટેલાઈટ્સના ડમી છે. તેમનો ઉપયોગ સ્ટારશિપની ઉપગ્રહ જમાવટ ક્ષમતાઓનું પરીક્ષણ કરવા માટે થાય છે. 29 જૂન સ્ટારશિપમાં બ્લાસ્ટ થઈ ગયો હતો આ પહેલાં આ ટેસ્ટ 29 જૂન 2025ના રોજ થવાનો હતો, પરંતુ સ્ટેટિક ફાયર ટેસ્ટ દરમિયાન સ્ટારશિપમાં બ્લાસ્ટ થઈ ગયો હતો. આ ટેસ્ટમાં રોકેટને જમીન પર રાખીને તેના એન્જિનને ચાલુ કરવામાં આવે છે, જેથી લોન્ચ પહેલાં બધું બરાબર હોય, તે ચેક કરી શકાય. ટેસ્ટ દરમિયાન રોકેટના ઉપરના હિસ્સામાં અચાનક વિસ્ફોટ શરૂ થયો. જોતજોતામાં આખું રોકેટ આગના ગોળામાં ફેરવાઈ ગયું હતું. નવમો ટેસ્ટ: બૂસ્ટર લેન્ડ થઈ ગયું હતું, પરંતુ શિપે કંટ્રોલ ગુમાવી દીધો 28 મે 2025ના રોજ થયેલા 9મા ટેસ્ટમાં લોન્ચિંગના આશરે 30 મિનિટ બાદ સ્ટારશિપે કંટ્રોલ ગુમાવી દીધો હતો, જે કારણે પૃથ્વીના વાતાવરણમાં એન્ટર થવા પર તે નષ્ટ થઈ ગયું હતું. આ સતત ત્રીજી વાર હતું જ્યારે સ્ટારશિપ આકાશમાં જ નષ્ટ થયું હતું. જોકે, બૂસ્ટરે અમેરિકાની ખાડીમાં હાર્ડ લેન્ડિંગ કર્યું. આઠમો ટેસ્ટ: બૂસ્ટર લેન્ડ થઈ ગયું હતું, પરંતુ શિપ બ્લાસ્ટ થઈ ગઈ હતી સ્ટારશિપનો આઠમો ટેસ્ટ ભારતીય સમય અનુસાર 7 માર્ચ 2025ના રોજ થયો હતો. લોન્ચિંગની 7 મિનિટ બાદ બૂસ્ટર (નીચેનો હિસ્સો) અલગ થઈને પરત લોન્ચ પેડ પર આવી ગયું. પરંતુ 8 મિનિટ બાદ શિપ (ઉપરનો હિસ્સો)ના છ એન્જિનોમાંથી 4એ કામ કરવાનું બંધ કરી દીધું જેનાથી શિપે કંટ્રોલ ગુમાવી દીધો. ત્યારબાદ ઓટોમેટેડ એબોર્ટ સિસ્ટમે શિપને બ્લાસ્ટ કરી દીધું. પડતા કાટમાળના કારણે મિયામી, ઓરલેન્ડો, પામ બીચ અને ફોર્ટ લોડરડેલના એરપોર્ટ પર ઉડાનો પ્રભાવિત થઈ હતી. સાતમો ટેસ્ટ: બૂસ્ટર પરત આવ્યું; પરંતુ સ્પેસક્રાફ્ટ આકાશમાં જ બ્લાસ્ટ થયું 17 જાન્યુઆરી 2025ના રોજ પણ સ્ટારશિપનો સાતમો ટેસ્ટ સંપૂર્ણપણે સફળ રહ્યો ન હતો. લોન્ચિંગની 8 મિનિટ બાદ બૂસ્ટર (નીચેનો હિસ્સો) અલગ થઈને પરત લોન્ચ પેડ પર આવી ગયું હતું, પરંતુ શિપ (ઉપરનો હિસ્સો)માં ઓક્સિજન લીકથી બ્લાસ્ટ થઈ ગયો હતો. છઠ્ઠો ટેસ્ટ: લોન્ચપેડ પર ઉતરવામાં મુશ્કેલી દેખાઈ તો પાણી પર લેન્ડ કરાવ્યું, ટ્રમ્પ પણ હાજર રહ્યા સ્ટારશિપનો છઠ્ઠો ટેસ્ટ 20 નવેમ્બર 2024ના રોજ સવારે 03:30 વાગ્યે કરવામાં આવ્યો હતો. અમેરિકાના તત્કાલીન રાષ્ટ્રપતિ ડોનાલ્ડ ટ્રમ્પ પણ ટેસ્ટ જોવા માટે સ્ટારબેઝ પહોંચ્યા હતા. આ ટેસ્ટમાં બૂસ્ટરને લોન્ચ કર્યા બાદ પરત લોન્ચપેડ પર કેચ કરવાનું હતું, પરંતુ તમામ પેરામીટર બરાબર ન હોવાના કારણે તેને પાણીમાં લેન્ડ કરાવવાનો નિર્ણય લેવામાં આવ્યો. સ્ટારશિપના એન્જિનને સ્પેસમાં ફરીથી ચાલુ કરવામાં આવ્યું. ત્યારબાદ હિંદ મહાસાગરમાં લેન્ડિંગ થઈ. પાંચમો ટેસ્ટ: પહેલીવાર બૂસ્ટરને લોન્ચપેડ પર કેચ કર્યું હતું સ્ટારશિપનો પાંચમો ટેસ્ટ 13 ઓક્ટોબર 2024ના રોજ કરવામાં આવ્યો હતો. આ ટેસ્ટમાં પૃથ્વીથી 96 Km ઉપર મોકલવામાં આવેલા સુપર હેવી બૂસ્ટરને લોન્ચપેડ પર પરત લાવવામાં આવ્યું, જેને મેકેઝિલાએ પકડ્યું. મેકેઝિલા બે મેટલ આર્મ છે જે ચોપસ્ટિક્સ જેવા દેખાય છે. જ્યારે સ્ટારશિપની પૃથ્વીના વાયુમંડળમાં રી-એન્ટ્રી કરાવીને હિંદ મહાસાગરમાં કન્ટ્રોલ્ડ લેન્ડિંગ કરાવવામાં આવી. સ્ટારશિપે જ્યારે પૃથ્વીના વાતાવરણમાં એન્ટ્રી કરી ત્યારે તેની રફતાર 26,000 કિલોમીટર પ્રતિ કલાક હતી અને તાપમાન 1,430°C સુધી પહોંચી ગયું હતું. ચોથો ટેસ્ટ: સ્ટારશિપને સ્પેસમાં લઈ જવામાં આવ્યું, પછી પાણીમાં લેન્ડિંગ થઈ સ્ટારશિપનો ચોથો ટેસ્ટ 6 જૂન 2024ના રોજ થયો હતો, જે સફળ રહ્યો હતો. 1.05 કલાકના આ મિશનને બોકા ચિકાથી સાંજે 6.20 વાગ્યે લોન્ચ કરવામાં આવ્યું હતું. તેમાં સ્ટારશિપને સ્પેસમાં લઈ જવામાં આવ્યું, પછી પૃથ્વી પર પરત લાવીને પાણી પર લેન્ડ કરાવવામાં આવ્યું. ટેસ્ટનો મેઈન ગોલ એ જોવાનો હતો કે, સ્ટારશિપ પૃથ્વીના વાતાવરણમાં એન્ટ્રી દરમિયાન સર્વાઈવ કરી શકે છે કે નહીં. ટેસ્ટ બાદ કંપનીના માલિક ઈલોન મસ્કે કહ્યું હતું, 'ઘણી ટાઈલ્સના નુકસાન અને એક ડેમેજ્ડ ફ્લેપ છતાં સ્ટારશિપે દરિયામાં સોફ્ટ લેન્ડિંગ કર્યું.' ત્રીજો ટેસ્ટ: રીએન્ટ્રી બાદ સ્ટારશિપ સાથે સંપર્ક તૂટ્યો હતો આ ટેસ્ટ 14 માર્ચ 2024ના રોજ થયો હતો. સ્પેસએક્સે જણાવ્યું હતું કે, સ્ટારશિપ રીએન્ટ્રી દરમિયાન સર્વાઈવ કરી શક્યું નહીં, પરંતુ તેણે ઉડાન દરમિયાન ઘણી મહત્વપૂર્ણ ઉપલબ્ધિઓ હાંસલ કરી. જ્યારે ઈલોન મસ્કે કહ્યું કે, તેમને આશા છે કે આ વર્ષે અડધો ડઝન સ્ટારશિપ ઉડાન ભરશે. સ્ટારશિપે ઓર્બિટમાં પહોંચ્યા બાદ પેલોડ ડોરને ખોલ્યો અને બંધ કર્યો. રોકેટની અંદર બે ટેન્કોની વચ્ચે ઘણા ટન તરલ ઓક્સિજનને મૂવ કર્યો. સ્ટારશિપની પૃથ્વીના વાતાવરણમાં રીએન્ટ્રી કરાવવામાં આવી, પરંતુ સંપર્ક તૂટી ગયો. બીજો ટેસ્ટ: સ્ટેજ સેપરેશન બાદ ખામી આવી ગઈ હતી સ્ટારશિપનો બીજો ટેસ્ટ 18 નવેમ્બર 2023ના રોજ સાંજે આશરે 6:30 વાગ્યે કરવામાં આવ્યો હતો. લોન્ચિંગની આશરે 2.4 મિનિટ બાદ સુપર હેવી બૂસ્ટર અને સ્ટારશિપનું સેપરેશન થયું. બૂસ્ટરે પરત પૃથ્વી પર લેન્ડ થવાનું હતું, પરંતુ 3.2 મિનિટ બાદ 90 Km ઉપર તે ફાટી ગયું. જ્યારે સ્ટારશિપ નક્કી પ્લાન અનુસાર આગળ વધી ગયું. આશરે 8 મિનિટ બાદ પૃથ્વીથી 148 Km ઉપર સ્ટારશિપમાં પણ ખામી આવી ગઈ, જે કારણે તેને નષ્ટ કરવું પડ્યું. ફ્લાઈટ ટર્મિનેશન સિસ્ટમ દ્વારા તેને નષ્ટ કરવામાં આવ્યું હતું. બીજા ટેસ્ટમાં રોકેટ અને સ્ટારશિપને અલગ કરવા માટે પહેલીવાર હોટ સ્ટેજિંગ પ્રોસેસનો ઉપયોગ કરવામાં આવ્યો હતો, જે સંપૂર્ણપણે સફળ રહી હતી. તમામ 33 રેપ્ટર એન્જિનોએ પણ લોન્ચથી સેપરેશન સુધી બરાબર ફાયર કર્યું હતું. પહેલો ટેસ્ટ: લોન્ચિંગની 4 મિનિટ બાદ વિસ્ફોટ થઈ ગયો હતો 20 એપ્રિલ 2023ના રોજ સ્ટારશિપનો પહેલો ઓર્બિટલ ટેસ્ટ કરવામાં આવ્યો હતો. આ ટેસ્ટમાં બૂસ્ટર 7 અને શિપ 24ને લોન્ચ કરવામાં આવ્યા હતા. ઉડાન ભર્યાની 4 મિનિટ બાદ જ મેક્સિકોની ખાડી પાસે 30 કિલોમીટર ઉપર સ્ટારશિપમાં વિસ્ફોટ થઈ ગયો હતો. સ્ટારશિપ ફેલ થયા બાદ પણ ઈલોન મસ્ક અને કર્મચારીઓ ખુશી મનાવી રહ્યા હતા. એવું એટલા માટે કારણ કે રોકેટનું લોન્ચ પેડ પરથી ઉડવું જ મોટી સફળતા હતી. મસ્કે લોન્ચિંગના બે દિવસ પહેલાં કહ્યું હતું- સફળતા કદાચ મળે, પરંતુ ઉત્સાહ ગેરંટી છે. સ્પેસએક્સે કહ્યું હતું- સેપરેશન સ્ટેજ પહેલાં જ તેનો એક હિસ્સો અચાનક અલગ થઈ ગયો, જ્યારે તે નક્કી ન હતું. આ પ્રકારના એક ટેસ્ટ સાથે આપણે જે શીખીએ છીએ, તેનાથી સફળતા મળે છે. આજનો ટેસ્ટ અમને સ્ટારશિપની રિલાયબિલિટીમાં સુધારો કરવામાં મદદ કરશે. ટીમો ડેટાને રિવ્યૂ કરવાનું ચાલુ રાખશે અને આગામી ફ્લાઈટ ટેસ્ટની દિશામાં કામ કરશે.
    Click here to Read More
    Previous Article
    "Congress Seeking 181 Seats In 2027 UP Assembly Elections": Akhilesh Yadav
    Next Article
    કાશ્મીર-ઉત્તરાખંડમાં હિમવર્ષા, દિલ્હી-રાજસ્થાનમાં ઝરમર વરસાદ:યુપીમાં ધુમ્મસ, ઓડિશામાં ત્રીજા વાવાઝોડાનું એલર્ટ; MPના 19 શહેરોમાં ઠંડી

    Related International Updates:

    Are you sure? You want to delete this comment..! Remove Cancel

    Comments (0)

      Leave a comment