રણવીર સિંહના સમર્થનમાં ઉતરી ઇન્ડસ્ટ્રી:ચંકીએ કહ્યું- મને પણ બેન કર્યો હતો, મનોજ બાજપેયીએ કહ્યું-આશા છે કે વિવાદ જલ્દી પતી જશે; અશોક પંડિતે સ્પષ્ટતા કરી

ફરહાન અખ્તરની ‘ડોન 3’ અચાનક છોડી દેવાને કારણે FWICE (ફિલ્મ ફેડરેશન ઓફ વેસ્ટર્ન સિને એમ્પ્લોયીઝ) એ રણવીર સિંહ પર પ્રતિબંધ મૂક્યો છે. જ્યાં સુધી મામલો ઉકેલાય નહીં, ત્યાં સુધી ફેડરેશન સાથે જોડાયેલા લોકો રણવીર સાથે કામ કરી શકશે નહીં. આ જાહેરાત પછી ઇન્ડસ્ટ્રીના ઘણા લોકો તેમના સમર્થનમાં ઉતર્યા છે. ચંકી પાંડેએ જણાવ્યું છે કે એક સમયે તે પણ આ પ્રતિબંધનો ભોગ બની ચૂક્યા છે. માફી માંગ્યા પછી તેના પરનો પ્રતિબંધ હટાવી દેવામાં આવ્યો હતો. જ્યારે બીજી તરફ FWICE ના ચીફ એડવાઈઝર અશોક પંડિતે પ્રતિબંધ પર સ્પષ્ટતા કરી છે. મેં પણ આ ભોગવ્યું છે- ચંકી પાંડે ચંકી પાંડેએ રણવીર સિંહના વિવાદ પર તાજેતરમાં ઈ-ટાઈમ્સને આપેલા ઇન્ટરવ્યુમાં જણાવ્યું છે કે 1987માં ફિલ્મ ઇન્ડસ્ટ્રીની હડતાળ હતી અને શૂટિંગ કરવાની પરવાનગી નહોતી. પરંતુ બરાબર તે જ સમયે તેની ફિલ્મ આગ હી આગનું શૂટિંગ ઊટીમાં થયું. આ વાતથી નારાજ ફેડરેશને ફિલ્મમાં કામ કરનાર દરેક વ્યક્તિ પર પ્રતિબંધ મૂક્યો હતો. જોકે ત્યારે ધર્મેન્દ્ર અને શત્રુઘ્ન સિંહા એટલા મોટા સ્ટાર હતા, જેમની પાસે એક સાથે 30-40 ફિલ્મો હતી, આવા સંજોગોમાં તેને પ્રતિબંધિત કરવા મુશ્કેલ હતું. ચંકી પાંડે કહ્યું- જે નવા હતા અને જેની પહેલી ફિલ્મ પણ રિલીઝ થઈ ન હતી, તેને એક અઠવાડિયા માટે પ્રતિબંધિત કરવામાં આવ્યા હતા. વિવાદ પર ચંકી પાંડેએ માફી માંગી, ત્યારબાદ તેમને ફરીથી કામ કરવાની મંજૂરી મળી. વાતચીતમાં ચંકી પાંડેએ કહ્યું છે કે, આપણી ઇન્ડસ્ટ્રી ખૂબ નાની અને નાજુક છે. મેં આ બધું સહન કર્યું છે. આશા છે કે આ મામલો જલ્દી ઉકેલાઈ જશે- મનોજ બાજપેયી અપકમિંગ ફિલ્મ ગવર્નરના પ્રમોશનલ ઇવેન્ટ દરમિયાન એક્ટર મનોજ બાજપેયીએ પણ આ અંગે પ્રતિક્રિયા આપી છે. તેણે રણવીરના પ્રતિબંધ સાથે જોડાયેલા સવાલ પર કહ્યું, 'આ જગ્યા આ વાત માટે બિલકુલ યોગ્ય નથી. હું તમને એક વાત કહેવા માંગુ છું કે આ ઇન્ડસ્ટ્રીમાં જેટલા પણ લોકો છે, તેઓ બધા આ વિશે ફક્ત સોશિયલ મીડિયા પર જ વાંચી રહ્યા છે અને અમારી પાસે આ વિશે કોઈ વિગતવાર માહિતી નથી'. આગળ મનોજ બાજપેયીએ કહ્યું છે, ‘એક સહકર્મી હોવા અને આ બિરાદરીના સભ્ય હોવાના નાતે અમે બસ એટલું જ કહી શકીએ કે આશા છે કે આ મામલો જલ્દી ઉકેલાઈ જશે.’ ફિલ્મમેકર સંજય ગુપ્તાએ પણ રણવીરને પ્રતિબંધિત કરવા પર ફેડરેશનની ટીકા કરી છે. તેમણે સત્તાવાર સોશિયલ મીડિયા એકાઉન્ટ પર લખ્યું છે, ‘જ્યારે એક એ-લિસ્ટર હીરો શૂટ કરે છે, ત્યારે તેની સાથે 300થી વધુ વર્કર્સ સેટ પર કામ કરે છે. કોઈને પ્રતિબંધિત કરવાથી તેનું નુકસાન થતું નથી, પરંતુ તે મજૂરોની રોજીરોટી છીનવાઈ જાય છે, જેઓ તે કામ પર જ નિર્ભર છે. આખરે આનો મતલબ શું છે.’ FWICE ના ચીફ એડવાઈઝર અશોક પંડિતે સ્પષ્ટતા કરી પ્રતિબંધની ટીકા થયા બાદ અશોક પંડિતે આ મામલે સ્પષ્ટતા કરી છે. તેમનું કહેવું છે કે લોકોએ તેમના આદેશનો ખોટો અર્થ કાઢ્યો છે. ઈ-ટાઈમ્સને આપેલા ઈન્ટરવ્યુમાં અશોક પંડિતે કહ્યું- પહેલી વાત તો એ કે આખી વાતચીત જ ખોટી થઈ ગઈ. આ પ્રતિબંધ નથી. અમે કોઈ કોર્ટ નથી. અમે લોકોને પ્રતિબંધિત કરી શકતા નથી. અમે નોન-કોર્પોરેશન ઇશ્યૂ કર્યું છે. એનો અર્થ એ છે કે અમારા 30 ક્રાફ્ટના સભ્યો રણવીર સાથે કામ નહીં કરે. અમારી ઈચ્છા છે કે અમે તેમની સાથે કામ કરીએ કે નહીં.અમે એક ટ્રેડ યુનિયન જેવા છીએ. મામલો હજુ ઉકેલાયો નથી, કારણ કે અમે જોયું કે આ એક ખૂબ જ ખોટો ટ્રેન્ડ શરૂ થઈ ગયો છે. જાણો શું છે આખો મામલો? ફરહાન અખ્તરે વર્ષ 2023માં એક્ટર રણવીર સિંહ સાથે ફિલ્મ ડોન-3ની જાહેરાત કરી હતી. 2006માં આવેલી શાહરુખ અભિનીત ડોન અને 2011માં આવેલી ડોન-2 પછી, આ ફ્રેન્ચાઇઝીની ત્રીજી ફિલ્મ બનવાની હતી. જાહેરાત સમયે કિયારા અડવાણીને ફિલ્મમાં કાસ્ટ કરવામાં આવી હતી. પરંતુ પ્રેગ્નન્સી અને મેટરનિટી બ્રેકના કારણે કિયારાએ ફિલ્મ છોડી દીધી, ત્યારબાદ ક્રિતી સેનનને કાસ્ટ કરવાના સમાચાર આવ્યા. આ ફિલ્મ ફરહાન અખ્તર, હોમ પ્રોડક્શન એક્સેલ એન્ટરટેઈનમેન્ટના બેનર હેઠળ બનાવી રહ્યા હતા. ડોન-3 ને ચાલુ રાખવા માટે ફરહાને પોતાની બીજી ફિલ્મ જી લે ઝરા પોસ્ટપોન કરી દીધી. ફિલ્મ મોડી પડતાં રણવીર સિંહ ધુરંધરમાં વ્યસ્ત થઈ ગયા. રિપોર્ટ્સ હતા કે 2025 માં ડોન 3 નું શૂટિંગ શરૂ થશે, પરંતુ પછી અચાનક રણવીર સિંહે ફિલ્મ છોડી દીધી. મેકર્સનો આરોપ છે કે રણવીર સ્ક્રિપ્ટમાં હસ્તક્ષેપ કરી રહ્યા હતા. તેઓ ગાળાગાળી અને હિંસક દ્રશ્યોની માંગ કરી રહ્યા હતા, પરંતુ મેકર્સ આના પર રાજી ન થયા. મિડ-ડે ના રિપોર્ટમાં દાવો કરવામાં આવ્યો કે રણવીરે ફિલ્મ છોડી દીધી છે અને તે જલ્દી જ ફિલ્મનો સાઇનિંગ અમાઉન્ટ પણ પરત કરી દેશે, જ્યારે મેકર્સ પહેલાથી જ પ્રી-પ્રોડક્શન, ડિલે અને રી-વર્કના કારણે ફિલ્મ પર ખર્ચ કરી ચૂક્યા હતા. આના પર ફરહાન અખ્તરે પ્રોડ્યુસર્સ ગિલ્ડમાં ફરિયાદ કરીને 45 કરોડ રૂપિયાના વળતરની માંગ કરી. તેમનું કહેવું હતું કે પ્રી-પ્રોડક્શન, શૂટિંગ શેડ્યૂલમાં ફેરફારને કારણે તેમને ભારે નુકસાન થયું છે. ત્યારે આમિર ખાને પણ મધ્યસ્થી કરવાનો પ્રયાસ કર્યો, પરંતુ વાત બની નહીં. પ્રોડ્યુસર ગિલ્ડે બંને પક્ષોને સમાધાન માટે સમય પણ આપ્યો, પરંતુ ત્યારે પણ કોઈ ઉકેલ આવ્યો નહીં. પાછળથી આ મામલો FWICE પાસે પહોંચ્યો. મામલાને ગંભીરતાથી લેતા ફેડરેશને રણવીર સિંહને અલગ-અલગ પ્રસંગોએ 3 નોટિસ મોકલી, પરંતુ તેમણે સ્પષ્ટ કહ્યું કે આ કાનૂની મામલો છે, જે ફેડરેશન દ્વારા નહીં પરંતુ કોર્ટ દ્વારા ઉકેલવો જોઈએ. આખરે 25 મેના રોજ એક પ્રેસ કોન્ફરન્સ કર્યા પછી ફેડરેશને રણવીરને પ્રતિબંધિત કરવાની જાહેરાત કરી દીધી. રણવીર સિંહની ટીમનો દાવો- એક્ટર સમજી-વિચારીને ચૂપ છે રણવીર સિંહના પ્રવક્તાએ જણાવ્યું કે- 'રણવીર સિંહ ફિલ્મ ઇન્ડસ્ટ્રી અને 'ડૉન' ફ્રેન્ચાઇઝી સાથે જોડાયેલી દરેક વ્યક્તિનું દિલથી સન્માન કરે છે. 'ડૉન 3' ને લઈને હાલમાં જે કંઈ પણ બન્યું છે, તેના પર તેમણે સમજી-વિચારીને મૌન રહેવું જ યોગ્ય માન્યું છે. તેમનું માનવું છે કે કામ સાથે જોડાયેલી બાબતો અને પરસ્પર સંબંધો હંમેશા ગરિમા, સમજદારી અને પરસ્પર સન્માન સાથે જ નિભાવવા જોઈએ.' ‘આ દરમિયાન ઘણી બધી વાતો અને અફવાઓ સામે આવી છે, પરંતુ રણવીરે ક્યારેય પણ જાહેરમાં આ અંગે કોઈ સ્પષ્ટતા કરવી કે આ અટકળોને પ્રોત્સાહન આપવું જરૂરી નથી સમજ્યું. તેમનું પૂરું ધ્યાન સંપૂર્ણપણે તેમના કામ અને આગામી પ્રોજેક્ટ્સ પર કેન્દ્રિત છે.’ હવે સમજો FWICE શું છે? રણવીર પર પ્રતિબંધની શું અસર થશે ફેડરેશન ઓફ વેસ્ટર્ન ઇન્ડિયા સિને એમ્પ્લોઇઝ (FWICE) ફિલ્મ ઇન્ડસ્ટ્રીના કામદારો અને કલાકારોના હિતોનું રક્ષણ કરતી સૌથી મોટી સંસ્થા છે. તેની શરૂઆત વર્ષ 1956 માં થઈ હતી અને 1958 માં તેનું રજીસ્ટ્રેશન કરવામાં આવ્યું હતું. મધર બોડી: આ ફેડરેશન મુખ્યત્વે એક મધર બોડી (ટોચની સંસ્થા) તરીકે કામ કરે છે. તેના હેઠળ કુલ 34 અલગ-અલગ એસોસિએશનો આવે છે. સભ્યોની સંખ્યા: તેમાં એક્ટર્સ, ડિરેક્ટર્સ, પ્રોડ્યુસર્સ, કેમેરામેન, ટેકનિશિયન્સ, જુનિયર આર્ટિસ્ટ અને સ્પોટબોય જેવી 34 એસોસિએશનોના લગભગ 4 થી 5 લાખ સભ્યો જોડાયેલા છે. ક્ષેત્ર: આ એશિયાની સૌથી મોટી ફિલ્મ ફેડરેશન છે. વર્તમાનમાં ફિલ્મ ઇન્ડસ્ટ્રીમાં કામ કરતા લગભગ 90 ટકા લોકો આ જ ફેડરેશન સાથે જોડાયેલી એસોસિએશન્સના સભ્યો છે. તેનું પોતાનું એક બંધારણ છે, જેને માનવું બધા સભ્યો માટે જરૂરી છે. જો ફેડરેશન કામ બંધ કરી દે તો શૂટિંગ રદ FWICE પાસે ફિલ્મ ઇન્ડસ્ટ્રીના કાર્યકારી માહોલને નિયંત્રિત કરવાની મોટી તાકાત છે. કામ રોકવું: જો ફેડરેશન તેના 4 થી 5 લાખ સભ્યોને કોઈ પ્રોજેક્ટ પર કામ કરતા રોકી દે, તો બીજા જ દિવસથી ફિલ્મો અને ટીવી શોની શૂટિંગ સંપૂર્ણપણે બંધ થઈ જશે. ચુકવણી વસૂલવી: ફેડરેશન નિર્માતાઓ અને કલાકારો વચ્ચેના પૈસાના વિવાદોનું નિરાકરણ લાવે છે. ઉદાહરણ તરીકે, થોડા સમય પહેલા નિર્માતા ફિરોઝ નડિયાદવાલાએ એક ફિલ્મ પછી ક્રૂ મેમ્બર્સના લગભગ 3 કરોડ રૂપિયા ચૂકવ્યા ન હતા. ફેડરેશને તેમની આગામી ફિલ્મ 'વેલકમ ટુ જંગલ'ના શૂટિંગ પહેલા તમામ સભ્યોને કામ ન કરવાનો નિર્દેશ આપ્યો હતો. આ પછી, પ્રોડક્શન કંપની અને ફેડરેશનના દબાણ હેઠળ ફિરોઝ નડિયાદવાલાને જૂનું બાકી લેણું ચૂકવવું પડ્યું હતું. કાર્યવાહીનો અધિકાર: બંધારણ વિરુદ્ધ કામ કરવા પર ફેડરેશન કોઈપણ એસોસિએશન અથવા સભ્યને નોન-મેમ્બર જાહેર કરી શકે છે.