Search

    Language Settings
    Select Website Language

    GDPR Compliance

    We use cookies to ensure you get the best experience on our website. By continuing to use our site, you accept our use of cookies, Privacy Policy, and Terms of Service.

    BijnorNews
    Bijnor news

    ચોપાટી પર રમકડાં વેચનારા હસરત જયપુરી દિગ્ગજ ગીતકાર બન્યા:છેલ્લા શ્વાસ સુધી પુસ્તક અને પેનનો સાથ ન છોડ્યો, ભાણેજ ડબ્બુ મલિકે અજાણ્યા કિસ્સાઓ વર્ણવ્યા

    3 days ago

    2

    0

    👍 ❤️ 😂 😮 😢 😡 😘 🤐 🥰

    હિન્દી સિનેમાના દિગ્ગજ ગીતકાર હસરત જયપુરીની 104મી જન્મજયંતિ પર તેમના ભાણેજ ડબ્બુ મલિકે તેમની સાથે જોડાયેલી ઘણી ખાસ યાદો શેર કરી. તેમણે જણાવ્યું કે, હસરત જયપુરી માત્ર એક ઉત્તમ શાયર જ નહોતા, પરંતુ પોતાના અંગત જીવનમાં અત્યંત સાદગી અને આત્મીયતા રાખનારા વ્યક્તિ પણ હતા. ચોપાટી પર રમકડાં વેચવાથી અને બસ કંડક્ટરની નોકરીથી શરૂ થયેલી તેમની સફર તેમને ફિલ્મ ઇન્ડસ્ટ્રીના ટોચના ગીતકારોમાં લઈ આવી. શંકર-જયકિશન અને રાજ કપૂર સાથેની તેમની જોડીએ ઘણા યાદગાર ગીતો આપ્યા. છેલ્લા શ્વાસ સુધી તેમના હાથમાં કલમ અને પુસ્તક રહ્યા, જે તેમના કામ પ્રત્યેના જુસ્સાને દર્શાવે છે. ‘મામાજી ખૂબ મોટા ગીતકાર છે, એવું તો ઘણું પાછળથી ખબર પડી’ ડબ્બુ મલિકે કહ્યું કે, 'અમે ખૂબ નાના હતા, ત્યારે મુંબઈના ખાર સ્થિત મામા હસરત જયપુરીના ઘરે જતા હતા. ઘરથી બાલ્કનીને અડીને તેમનો પલંગ હતો, જ્યાં બેસીને તેઓ કવિતાઓ લખતા હતા. અમારી બાળપણની યાદો એ છે કે, મોટા-મોટા ડિરેક્ટર, પ્રોડ્યુસર, એક્ટરનો જમાવડો તેમને મળવા માટે ઘરે આવતા હતા.' 'અમે નાના હતા, ત્યારે એટલું સ્પષ્ટ નહોતું થતું કે લોકો તેમને આટલું સન્માન કે આટલું મહત્વ શા માટે આપી રહ્યા છે. આ જાણવા માટે અમને વર્ષો લાગ્યા. પછી ધીમે ધીમે ખબર પડી કે મામાજી ખૂબ મોટા ગીતકાર છે. હવે પાછળ વળીને જોઉં છું, ત્યારે મને લાગે છે કે બાપ રે! આ માણસે કેટલું અદ્ભુત કામ કર્યું છે.' 'તેમની સૌથી સુંદર વાત એ હતી કે, તેમને કિમામ પાન અને પરફ્યુમનો ખૂબ શોખ હતો. તેવી જ રીતે તેમનું વ્યક્તિત્વ પણ સુગંધિત હતું. તેમનો બહેન-બનેવી વગેરેનો ઘણો મોટો પરિવાર હતો અને તેઓ બધાને ખૂબ પ્રેમ આપતા હતા. બધાનું ધ્યાન રાખતા હતા, તે તેમની સૌથી મોટી વિશેષતા હતી. લોકોના જીવન વિશે વિચારતા હતા અને તેમાં મગ્ન રહેતા હતા. અમે લોકો વિચારતા હતા કે, તેમનું ધ્યાન ખેંચવું પણ ખૂબ મુશ્કેલ હતું. કારણ કે, તેઓ આખો દિવસ ગીતો લખવામાં વ્યસ્ત રહેતા હતા.' ‘જયકિશનના મૃત્યુ પર આખો દિવસ રડતા રહ્યા’ 'મને તેમની એક સાંજની વાત યાદ છે, જે હું ક્યારેય ભૂલતો નથી. તે એ છે કે જય કિશનનું મૃત્યુ થયું હતું. તે દિવસે નેશનલ રેડિયો પર તેમનું લખેલું ગીત આખા હિન્દુસ્તાનમાં વાગી રહ્યું હતું. તે ગીત હતું- ‘ગીતો કા કનૈયા ચલા ગયા, અબ ગીત મેરે વિરાન હુએ...’, આ સાંભળીને તેમના આંસુ રોકાઈ રહ્યા ન હતા.' 'મને ખબર નથી, કદાચ તેનું કમ્પોઝિશન શંકર-જયકિશનજીએ કર્યું હશે. પરંતુ તે ક્ષણ ક્યારેય ભૂલાતી નથી. તેમના ગીતો પર શંકર-જયકિશનની જોડીએ ખૂબ જ દિલકશ કામ કર્યું છે.' 'છેલ્લા શ્વાસ સુધી તેમના હાથમાં કલમ અને પુસ્તક હતું' 'મામા હસરત જયપુરી, મને ખૂબ પ્રેમ કરતા હતા. હું તેમનો લાડકો હતો, કારણ કે ઘરમાં સૌથી નાનો હું જ હતો. મને તેમની પાસેથી ખૂબ પ્રેમ મળ્યો. જોકે, તે સમયે તેઓ ઘણા વૃદ્ધ થઈ ગયા હતા, પરંતુ તેમણે મને કહ્યું હતું કે, તારામાં પણ એક સંગીતકાર છુપાયેલો છે, તું ગીતો બનાવી શકે છે.' 'મેં કહ્યું કે મેં તો કંઈ શીખ્યું જ નથી. તે સમય સુધીમાં તેઓ જુહુ સ્થિત પોતાના બંગલામાં રહેવા આવી ગયા હતા. જુહુમાં તેમનો ભવ્ય બંગલો હતો. આર્થિક રીતે ખૂબ જ સુરક્ષિત વ્યક્તિ હતા. તેમણે અને તેમના પત્નીએ પરિવાર માટે મોટા મોટા નિર્ણયો લીધા. પોતાના જમાનામાં તેમનો ખૂબ જ સફળ પરિવાર રહ્યો છે.' 'તેઓ આવનારી 10 પેઢીઓને સુરક્ષિત કરીને ગયા. એટલા મહાન માણસ હતા. પરંતુ મેં એક વસ્તુ જોઈ છે કે, છેલ્લા શ્વાસ સુધી તેમના હાથમાં કલમ અને પુસ્તક હતું.' 'પોતાની બહેન એટલે કે મારી મમ્મી માટે ગીત લખેલુ' 'મારી મમ્મી મિલ્કિસ, હસરત જયપુરીની સૌથી નાની બહેન હતી. તેઓ મારી મમ્મીને ખૂબ પ્રેમ કરતા હતા. પ્રેમથી મમ્મીને નન્હું (નાની) બોલાવતા હતા. તેમણે ગીત- ‘સુનો છોટી-સી ગુડિયા કી લંબી કહાની...’, મારી મમ્મી માટે લખ્યું હતું. મારી મમ્મીના જીવનમાં જે સંઘર્ષ હતો, તેને ધ્યાનમાં રાખીને લખ્યું હતું.' 'પપ્પાએ ઘણો સંઘર્ષ જોયો હતો.મામાજી માટે તો મમ્મી 15-16 વર્ષની બહેન હતી, જેમના લગ્ન 18 વર્ષની ઉંમરે થઈ ગયા. તેમણે બહેનની આખી જિંદગી જોઈ. જોકે, પોતાના હિસાબે તેઓ જે કંઈ પણ કરી શકતા હતા, તે કર્યું. પરંતુ મમ્મીને જોઈને તેઓ હંમેશા કહેતા હતા કે, આ મારી ઢીંગલી છે. તેમને આ બધી વસ્તુઓની તકલીફ ઉઠાવવાની જરૂર નહોતી, ત્યારે તેમણે આ ગીત લખ્યું હતું.' 'પોતાના કામ પ્રત્યે કેન્દ્રિત હતા' 'તેમનું વ્યક્તિત્વ ખૂબ જ સર્જનાત્મક અને અદ્ભુત હતું. પોતાના કામ પ્રત્યે આટલા કેન્દ્રિત અને લીન રહેવું તેમની પાસેથી શીખી શકાય છે. મતલબ કે, તેમની પાસે કોઈ પણ પ્રકારનું વિચલન નહોતું. દિવસભર શબ્દોની વાર્તામાં વ્યસ્ત રહેતા હતા. તેમણે ક્યારેય સામાન્ય જીવન જીવ્યું જ નહોતું.' 'દરેક પળ, દરેક ક્ષણ તેમને ફક્ત સંગીત, ગીતો, ગીત-ગાયન, મુખડા જ સંભળાતા હતા. અદ્ભુત વ્યક્તિત્વ હતું. ડિરેક્ટર વગેરેને મળવાનું હોય, ત્યારે જ તેઓ પાર્ટી-ફંક્શનમાં જતા હતા. પોતાના જમાનામાં લેખન (રાઇટિંગ) ના હિસાબે વ્યાવસાયિક રીતે સફળ વ્યક્તિ રહ્યા. તેમણે પોતાના સમયમાં જે સમય જોયો છે, તે કોઈ જોઈ જ ન શકે. આટલી શક્તિ, આટલી વ્યાવસાયિક સફળતા, બાપ રે બાપ! વાહ!! આજે ભૂતકાળમાં જઈશું, ત્યારે જણાશે કે કેવા ગીતો અને કેવા ચિત્રો, કેવું કામ કર્યું છે.' 'મેં પણ સાંભળ્યું છે કે તેઓ ચોપાટી પર બેસીને રમકડાં વેચતા હતા' 'તેમના વિશે જેટલું સાંભળ્યું છે, તે એ છે કે તેઓ પોતાના પરિવારને સંભાળવા જયપુરથી મુંબઈ આવ્યા હતા. અહીં ચોપાટી પર બેસીને રમકડાં વેચતા હતા. પછી તેમને બસ કંડક્ટરની નોકરી મળી. પછી કોઈ મુશાયરામાં કવિ તરીકે તેમને પૃથ્વીરાજ કપૂર મળ્યા. પૃથ્વીરાજ કપૂરે તેમને ભલામણ કરી કે મારા દીકરા રાજ કપૂરને મળો.' 'ત્યાંથી વાર્તા શરૂ થઈ. મેં મારી જિંદગીમાં આટલો મહેનતુ માણસ ક્યારેય જોયો નથી. ‘બહારોં ફૂલ બરસાઓ...’, ‘લિખે જો ખત તુઝે...’, ‘તુમ મુઝે યૂં ન ભુલા પાઓગે...’, ‘એહસાસ તેરા હોગા મુઝ પર...’ ‘જિંદગી એક સફર હૈ સુહાના...’ વગેરે તેમના લખેલા મારા મનપસંદ ગીતોની યાદી ક્યારેય પૂરી નહીં થાય. આજે વિચારું છું કે આટલો દિગ્ગજ માણસ આ પૃથ્વી પર આવ્યો અને આટલા સારા રોમેન્ટિક ગીતો લખીને ચાલ્યો ગયો.' 'ભાગ્યશાળી છું કે તેમને ગળે લગાવવાનો મોકો મળ્યો' 'અમે તો આખી જિંદગી તેમના પ્રશંસક જ બની રહીશું. ક્યારેક ક્યારેક પોતાને ખુશકિસ્મત સમજીએ છીએ, કે તેમને ગળે લગાવવાનો મોકો મળ્યો. અમે તેમને કિસ કરી શક્યા અને તેઓ અમારા કપાળને ચૂમી શક્યા. આ અમારી કિસ્મત હતી કે આટલા મોટા માણસનો અમને પ્રેમ મળ્યો.' 'તેમને વેજ-નોનવેજ બધું જ પસંદ હતું. તેમના દીકરાઓ પણ કહે છે કે ગાવું અને ખાવું એ તેમનું પ્રિય રહ્યું છે. તેઓ તેમની બહેન એટલે કે મારી મમ્મીના હાથનું ભોજન ખાવા માટે શંકર-જયકિશન, રાજ કપૂર વગેરે સાથે ઘરે આવતા હતા. મારી મમ્મી ખૂબ જ સરસ નોન-વેજ બનાવતી હતી.' ‘તેઓ ઘરે ફોન કરીને કહેતા હતા કે, નંદુને કહેજો કે આજે શાહી કબાબ બનાવી દે. મારી મમ્મીના રસોઈ બનાવવા પર તેમને ખૂબ ગર્વ હતો. તેઓ ખૂબ જ સાધારણ રીતે જન્મદિવસ ઉજવતા હતા. જન્મદિવસ પર ગરીબોને ભોજન વહેંચતા હતા.’
    Click here to Read More
    • Share:
    સેન્સેક્સ 1100 પોઈન્ટ વધીને 78,000 પર ટ્રેડ થઈ રહ્યો છે:નિફ્ટી પણ 300 વધીને 24,150 પર પહોંચ્યો; બેંકિંગ અને ઓટો શેરોમાં ખરીદી
    Previous Article
    સેન્સેક્સ 1100 પોઈન્ટ વધીને 78,000 પર ટ્રેડ થઈ રહ્યો છે:નિફ્ટી પણ 300 વધીને 24,150 પર પહોંચ્યો; બેંકિંગ અને ઓટો શેરોમાં ખરીદી
    Next Article
    11 વાગ્યે બિહાર CMના શપથ લેશે સમ્રાટ ચૌધરી:શપથ પહેલાં જ મળી CMની સિક્યોરિટી; સમ્રાટ પંચમુખી હનુમાન મંદિરે જવા નીકળ્યા
    11 વાગ્યે બિહાર CMના શપથ લેશે સમ્રાટ ચૌધરી:શપથ પહેલાં જ મળી CMની સિક્યોરિટી; સમ્રાટ પંચમુખી હનુમાન મંદિરે જવા નીકળ્યા

    Related Entertainment Updates:

    Are you sure? You want to delete this comment..! Remove Cancel

    Comments (0)

      Leave a comment

      Send