શું વોટમાં તબદિલ થશે થલાપતિના વિલાપ કરતા ફેન્સની ભીડ?:ફેન ક્લબ બની પાર્ટી, લોકોએ કહ્યું- જીવ પણ આપીશું; સ્ટાલિન કે BJP, કોને નુકસાન?

15 એપ્રિલ 2026, તમિલનાડુના ચેન્નાઈનું ટીનગર. એક્ટરથી રાજનેતા બનેલા થલાપતિ વિજયનો સાંજે 4 વાગ્યે રોડ શો હતો. તૈયારી સવારના 11 વાગ્યાથી જ શરૂ થઈ ગઈ હતી. ઠેર-ઠેર પોલીસનું બેરિકેડિંગ અને સ્વાગત માટે કાર્યકર્તાઓના મંચ હતા. વિજયને જોવા માટે સવારથી જ ફૂલ-હાર લઈને રસ્તાઓ પર લોકો ઉમટવા લાગ્યા હતા. રેલી ટીનગર પહોંચતા જ વિજયની એક ઝલક મેળવવા માટે ભીડ બેકાબૂ બની ગઈ હતી. તેમને જોતા જ એક વ્યક્તિ જોર-જોરથી બૂમો પાડવા લાગ્યો. તેની આંખોમાં આંસુ હતા, કારણ કે આ ક્ષણની રાહ તેણે 6 કલાક તડકામાં ઊભા રહીને જોઈ હતી. વિજય પ્રત્યેની આ દીવાનગી રેલીમાં ઠેર-ઠેર જોવા મળી હતી. તસવીર 15 એપ્રિલની છે, જ્યારે ચેન્નાઈમાં રેલી દરમિયાન થલાપતિ વિજયની એક ઝલક મેળવીને એક ફેન રડી પડ્યો હતો. વિજયની પાર્ટી તમિલગા વેત્રી કઝગમ (TVK) વિધાનસભા ચૂંટણીમાં તમિલનાડુની તમામ 234 બેઠકો પર એકલે હાથે ચૂંટણી લડી રહી છે. વિજય બે મહિના પહેલા જ જાહેરાત કરી ચૂક્યા છે કે વિધાનસભા ચૂંટણીમાં જંગ ‘વિજય વિરુદ્ધ સ્ટાલિન’ છે. વિજયની એન્ટ્રીથી તમિલનાડુના રાજકારણમાં શું બદલાશે, તે અમે સમજવાનો પ્રયાસ કર્યો. વિજય દિલમાં વસે છે, અમને તેમની રાજનીતિ પણ પસંદ છે ચેન્નાઈમાં રોડ શો દરમિયાન અમને સંગીતા મળી. વિજયને જોવા માટે તે ગામડેથી પોતાના મિત્રો સાથે આવી હતી. સંગીતા કહે છે, ‘વિજય અમારા બધાના દિલમાં વસે છે, અમે તેમના માટે જીવ પણ આપી શકીએ છીએ. તેમની સાથે અમારો લગાવ માત્ર ફિલ્મ સ્ટાર અને ફેનનો નથી, અમે તેમની રાજનીતિને પણ સપોર્ટ કરીએ છીએ, કારણ કે તેઓ મહિલાઓની સુરક્ષા, શિક્ષણ, ડ્રગ્સ અને ભ્રષ્ટાચાર સાથે જોડાયેલા મુદ્દા ઉઠાવી રહ્યા છે. તેઓ રોજગારની વાત કરી રહ્યા છે.’ શું આ વખતે થલાપતિ આવી રહ્યા છે? જવાબમાં સંગીતા કહે છે, ‘ચોક્કસપણે. જુઓ, હું કોઈ ફેન ક્લબ સાથે જોડાયેલી નથી, પણ તેમની ફેન છું. અમે દિલથી તેમનું સમર્થન કરીએ છીએ. જો તેઓ સરકારમાં આવશે, તો અમારી મુશ્કેલીઓ દૂર થશે.’ થલાપતિ વિજય અત્યાર સુધી 40થી વધુ રોડ શો અને સભાઓ કરી ચૂક્યા છે. દરેક જગ્યાએ તેમના ફેન્સ અને સમર્થકોની જબરદસ્ત ભીડ ઉમટી હતી. વિજયના વાયદાઓ પર વિશ્વાસ, તેઓ જ CM બનશે 21 વર્ષનો ફૈઝલ કોલેજમાં ફર્સ્ટ યરનો સ્ટુડન્ટ છે. તે અને તેની માતા જૈતૂન, તિરુપુરથી ચેન્નાઈ સુધીની 450 કિમીની મુસાફરી બસમાં કરીને આવ્યા છે. બંને વિજયના જબરદસ્ત ફેન છે અને તેમની એક ઝલક મેળવવા આવ્યા છે. જૈતૂન કહે છે: અમને પરિવર્તન જોઈએ છે. થલાપતિએ આવવું પડશે અને બધું બરાબર કરવું પડશે. અમને તેમના વાયદાઓ પર વિશ્વાસ છે. 2026માં થલાપતિ જ CM બનશે. અમે પૂછ્યું કે વિજયની પોલિટિક્સમાં શું પસંદ છે? તેઓ કહે છે, ‘મહિલાઓ પ્રત્યેનો તેમનો દ્રષ્ટિકોણ ખૂબ પસંદ છે. DMKમાં હવે એ દમ રહ્યો નથી. અમે અહીં પૈસા માટે નહીં, પણ વિજય માટે આવ્યા છીએ. અમે પરિવર્તન માટે આવ્યા છીએ.’ વિજયની રેલીમાં 18 વર્ષના યુવાનોથી લઈને વૃદ્ધો સુધી દરેક ઉંમરના લોકો હતા. અહીં જ અમારી મુલાકાત 61 વર્ષના એલિઝાબેથ સાથે થઈ. તેમના માટે ચાલવું મુશ્કેલ છે, પરંતુ તેઓ વિજયને જોવા માટે ચેન્નાઈના વિલ્લિવાકમ વિસ્તારથી ટીનગર આવ્યા હતા. ત્યારબાદ હજારો લોકો વચ્ચે 3 કલાક બેરિકેડિંગના સહારે ઊભા રહ્યા. એલિઝાબેથ કહે છે, ‘હું ફક્ત વિજયને જોવા આવી છું, તેમને જ સપોર્ટ કરીશ.’ વિજય આ રેલીઓ અને સભાઓમાં જ્ઞાતિનું રાજકારણ કરતા દેખાતા નથી. તેમનું ફોકસ મહિલા અને યુવા વોટબેંક પર છે. તેમની પાર્ટી યુવાનો અને મહિલાઓ સાથે સીધો સંવાદ કરી રહી છે. ફેન ક્લબે બનાવ્યું વિજયની પાર્ટીનું માળખું રેલીમાં મળેલી ચૈવન્તિ વેલ્લોરની કોલેજમાં અભ્યાસ કરે છે. ક્લાસ છોડીને યુનિફોર્મમાં જ 150 કિમી દૂર રેલીમાં આવી ગઈ. તે શરમાતા કહે છે, ‘વી ઓલ લવ થલાપતિ. નાનપણથી તેમને જોતા આવ્યા છીએ, આજે સામેથી જોવા છે.’ ચૈવન્તિ, વેલ્લોર વિજય ફેન ક્લબની મેમ્બર પણ છે. તમિલનાડુમાં વિજયની સેંકડો ફેન ક્લબ્સ છે. આ સ્ટારના નામે સામાજિક કાર્યો કરે છે. આ ક્લબ્સ પાછળ ખુદ સ્ટાર જ હોય છે. વિજયની આવી જ એક ક્લબ હવે પાર્ટીમાં બદલાઈ ગઈ છે, જેની મુખ્ય સંસ્થાનું નામ ‘All India Thalapathy Vijay Makkal Iyakkam’ છે. ક્લબમાં કામ કરનારાઓને જ પાર્ટીમાં સ્થાન આપવામાં આવ્યું છે. આ ક્લબ એક નેટવર્કની જેમ કામ કરે છે. તેમાં સ્ટેટ પ્રેસિડેન્ટ, જનરલ સેક્રેટરી અને કો-ઓર્ડિનેટર્સ બધા જ વિજયને રિપોર્ટ કરે છે. દરેક કો-ઓર્ડિનેટર પાસે સ્ટારના ફેન્સનો ડેટા હોય છે, જે નવી ફિલ્મ, પોસ્ટર, ગીતો અને સોશિયલ વર્ક સાથે જોડાયેલ કન્ટેન્ટ તેમના ફેન્સ સુધી મોકલે છે. આ ક્લબ્સ વોટ્સએપ ગ્રુપ, ટેલિગ્રામ, ઇન્સ્ટાગ્રામ જેવા સોશિયલ મીડિયા અને મેસેજિંગ એપ્સ દ્વારા નેટવર્કિંગ કરે છે. હવે આ જ સિસ્ટમનો ઉપયોગ વિજય રાજનીતિ અને ચૂંટણીમાં કરી રહ્યા છે. વિજયના ચહેરા અને નિર્ણયો પર ચાલી રહેલી પાર્ટી DMK અને AIADMKની જેમ TVK કોઈ સંગઠનાત્મક પાર્ટી નથી. તે વિજયની ‘થલાપતિ’ (સેનાપતિ) ઇમેજની આસપાસ જ ફરે છે. પાર્ટીમાં વિજય પછી કોઈ નંબર બે કે ત્રણ નથી. તેઓ જ પ્રથમ અને અંતિમ નિર્ણય લેનાર છે. પાર્ટીના વરિષ્ઠ નેતાઓ જણાવે છે કે ચૂંટણી પહેલા લગભગ 70 હજાર બૂથ એજન્ટ બનાવવાની તૈયારી કરવામાં આવી હતી. મોટાભાગે તેમાં સફળતા પણ મળી છે. પાર્ટીમાં અલગ-અલગ હોદ્દા બનાવી જવાબદારીઓ વહેંચવામાં આવી છે. જોકે, આ બધા માત્ર વિજયને સલાહ આપી શકે છે, તેમને પડકારવાની તાકાત કોઈનામાં નથી. TVK ભલે નવી પાર્ટી હોય, પણ ચૂંટણી પ્રચારમાં ઘણો ખર્ચ કરી રહી છે. પાર્ટી અત્યાર સુધી 40થી વધુ મેગા રેલીઓ અને રોડ શો કરી ચૂકી છે. પ્રચારમાં AI ટેકનોલોજી અને રોબોટ્સનો પણ ઉપયોગ કરવામાં આવી રહ્યો છે. પાર્ટી સાથે જોડાયેલી નાણાકીય વિગતો હજુ જાહેર કરવામાં આવી નથી. પાર્ટીના સૂત્રો જણાવે છે કે તેમની પાસે ત્રણ રીતે પૈસા આવી રહ્યા છે. પ્રથમ- વિજયની અંગત સંપત્તિ. બીજું- ફેન ક્લબ અને મોટા સમર્થકો. ત્રીજું- ટિકિટ મેળવનાર ઉમેદવારો. વિજયની ખ્યાતિ ફેન ક્લબની 20 વર્ષની મહેનતનું પરિણામ વિજય સર્વેસર્વા છે, પરંતુ તેઓ ન તો મીડિયા સાથે વાત કરે છે, ન તો કોઈ ઇન્ટરવ્યુ આપે છે. TVKના નેતા ફેલિક્સ ગેરાલ્ડ જ રાષ્ટ્રીય મીડિયામાં પાર્ટીનો પક્ષ રાખે છે. તેઓ જણાવે છે કે, ‘2021ની સ્થાનિક ચૂંટણીમાં ફેન ક્લબના 130 નેતાઓએ ચૂંટણી લડી હતી અને મોટાભાગના જીત્યા હતા. વિજયે પાર્ટી લોન્ચ કરતા પહેલા જ અહીંની રાજકીય જમીનનો અંદાજ મેળવી લીધો હતો. તેઓ સત્તાવાર રીતે 2024માં રાજનીતિમાં આવ્યા, પરંતુ તેમની આ ખ્યાતિ ફેન ક્લબની 20 વર્ષની મહેનતનું પરિણામ છે.’ અમે ફેલિક્સને પૂછ્યું કે વિજયનો CM સ્ટાલિન વિરુદ્ધ પ્રચાર અને BJP-AIADMK પ્રત્યે નરમાશ, શું એવો સંકેત છે કે તેઓ ચૂંટણી પછી BJPને સપોર્ટ કરી દેશે? આના પર ફેલિક્સ કહે છે, ‘અમે ભ્રષ્ટાચારની વિરુદ્ધ છીએ. DMK સાચા અર્થમાં સેક્યુલર પાર્ટી પણ નથી. અમે BJPની પણ ટીકા કરીએ છીએ.’ ‘વિજયએ સ્પષ્ટ કર્યું છે કે વૈચારિક રીતે BJP અમારી વિરોધી છે. તેને સમર્થન આપવાનો સવાલ જ નથી, અમે અમારા દમ પર સરકાર બનાવવા જઈ રહ્યા છીએ.’ એક્સપર્ટ બોલ્યા: વિજયની રાજનીતિમાં કંઈ નવું નથી, 12-15% વોટ મળશે 'The Hindu' ના સિનિયર જર્નાલિસ્ટ ડી. સુરેશ કુમાર કહે છે કે વિજય તમિલનાડુના સૌથી મોટા હીરો છે, પરંતુ તેમની વાર્તા જયલલિતા અને MGR થી ઘણી અલગ છે. વિજયે એવા સમયે રાજકારણમાં પગ મૂક્યો છે જ્યારે તેઓ કારકિર્દીના શિખર પર છે. કમલ હાસન કે રજનીકાંત બંને કારકિર્દીના અંતિમ તબક્કે રાજકારણમાં આવ્યા હતા. વિજયે ચૂંટણી પ્રચારમાં ઘણી વખત પોતાને જોસેફ વિજય કહીને સંબોધ્યા છે. તેઓ પોતાની ક્રિશ્ચિયન ઓળખ પર ભાર મૂકી રહ્યા છે. આ અંગે સુરેશ કહે છે, ‘વિજયનો પ્રભાવ શહેરી વિસ્તારોમાં વધુ છે. મહિલાઓ અને યુવાનોનો મોટો હિસ્સો તેમની સાથે જશે. તેઓ ક્રિશ્ચિયન છે, તેથી લઘુમતીઓના પણ વોટ મળશે. ઓછામાં ઓછા 12-15% વોટ તેમના હિસ્સામાં આવશે.’ સુરેશના મતે, વિજયની રાજકીય વિચારધારામાં કંઈ નવું નથી. તેઓ દ્રવિડિયન રાજનીતિ જ કરી રહ્યા છે, જે DMK અને AIADMK કરતા આવ્યા છે. તેમના વૈચારિક નેતાઓ પેરિયાર અને આંબેડકર જ છે. મુદ્દાઓની વાત કરીએ તો તેઓ NEET હટાવવા, રાજ્યના અધિકારો વધારવા અને Two-language formulaનું સમર્થન કરે છે.