ભાજપે તમામ રાજ્યોમાં નવા પ્રભારીઓની જાહેરાત કરી:સંગઠનમાં ફેરફારથી સ્મૃતિ ઈરાની, રામ માધવ અને હરીશ દ્વિવેદી સહિત 6 નેતાઓનું કદ વધ્યું

ભાજપે બુધવારે તમામ રાજ્યોમાં પોતાના નવા પ્રભારીઓ અને સહપ્રભારીઓની જાહેરાત કરી. પાર્ટીના અધ્યક્ષ નીતિન નબીન તરફથી જાહેર કરાયેલી યાદી મુજબ, સ્મૃતિ ઈરાનીને છત્તીસગઢ અને હરિયાણાના પ્રભારી બનાવવામાં આવ્યા છે. રામ માધવને તમિલનાડુ અને ઉત્તરાખંડની જવાબદારી સોંપવામાં આવી છે. આ યાદીમાં ઉત્તર પ્રદેશ, પંજાબ અને ગુજરાતના પ્રભારીઓનાં નામ પણ સામેલ છે. આ ત્રણેય રાજ્યોના પ્રભારીઓની નિમણૂક 18 ઓગસ્ટે જ કરવામાં આવી હતી. બિહારની ચૂંટણીમાં પાર્ટીને જીત અપાવનાર વિનોદ તાવડેને ઉત્તર પ્રદેશના પ્રભારી બનાવવામાં આવ્યા છે. પંજાબની જવાબદારી સતીશ પૂનિયાને સોંપવામાં આવી છે. ગુજરાતની જવાબદારી તરુણ ચૂગને આપવામાં આવી છે. 18 ઓગસ્ટે પાર્ટીએ જણાવ્યું હતું કે બાકીના રાજ્યોના પ્રભારીઓ અને સહપ્રભારીઓની નિમણૂક બાદમાં કરવામાં આવશે. ભાજપ સંગઠનમાં સ્થાન મળ્યા બાદ હવે સ્મૃતિ ઈરાની, હરીશ દ્વિવેદી, રામ માધવ અને અનિલ એન્ટની સહિત છ એવા પ્રમુખ નામો સામેલ થયા છે, જેમને પાર્ટીએ અલગ-અલગ રાજ્યોનો પ્રભાર સોંપ્યો છે. એટલું જ નહીં, રામ માધવ અને સતીશ પૂનિયાને ચૂંટણીવાળા રાજ્યોની જવાબદારી પણ સોંપવામાં આવી છે. ભાજપે રાષ્ટ્રીય મહાસચિવોને રાજ્યોનો પ્રભાર સોંપ્યો ભાજપના રાષ્ટ્રીય મહાસચિવ સ્મૃતિ ઈરાનીને છત્તીસગઢ અને હરિયાણાના પ્રભારી બનાવવામાં આવ્યા છે, જ્યારે હરીશ દ્વિવેદીને બિહાર અને કર્ણાટકની જવાબદારી સોંપવામાં આવી છે. સતીશ પૂનિયાને પંજાબ ઉપરાંત જમ્મુ-કાશ્મીરના પ્રભારી બનાવવામાં આવ્યા છે. રામ માધવને તમિલનાડુ ઉપરાંત ઉત્તરાખંડની જવાબદારી સોંપવામાં આવી છે. બીજી તરફ, સુનીલ બંસલને બંગાળ ઉપરાંત તેલંગાણાના પ્રભારી તરીકે અગાઉની જેમ જ યથાવત રાખવામાં આવ્યા છે. અનિલ એન્ટનીને નાગાલેન્ડના પ્રભારી અને ગોવાના સહ-પ્રભારી બનાવવામાં આવ્યા છે. પંજાબ, ઉત્તરાખંડ અને ગોવામાં આવતા વર્ષની શરૂઆતમાં જ વિધાનસભાની ચૂંટણીઓ યોજાવાની છે, જેને ચૂંટણીની વ્યૂહરચનાના દૃષ્ટિકોણથી ખૂબ જ મહત્વપૂર્ણ માનવામાં આવી રહી છે. સંગઠનમાં હરીશ દ્વિવેદીનું સતત વધતું કદ ઉત્તર પ્રદેશના બસ્તીથી આવતા પૂર્વ સાંસદ હરીશ દ્વિવેદી ભાજપના સૌથી વિશ્વસનીય સંગઠનાત્મક ચહેરાઓમાંના એક બનીને ઉભર્યા છે. દ્વિવેદી અગાઉ રાષ્ટ્રીય સચિવ તરીકે બિહાર જેવા મહત્વપૂર્ણ રાજ્યના પ્રભારી રહી ચૂક્યા છે. હવે ભાજપે તેમને બિહાર ઉપરાંત કર્ણાટકના પ્રભારી બનાવ્યા છે. તેમને ઉત્તર પ્રદેશમાં ભાજપના મોટા બ્રાહ્મણ ચહેરા તરીકે માનવામાં આવે છે અને તેઓ બસ્તીથી બે વખત સાંસદ રહી ચૂક્યા છે. ચૂંટણી વ્યવસ્થાપન, બૂથ સ્તરના કાર્યકર્તાઓ પર પકડ અને સંગઠનાત્મક શિસ્તને કારણે કેન્દ્રીય નેતૃત્વે તેમનું કદ વધારીને મોટા રાજ્યોમાં ચૂંટણી વ્યવસ્થાપનની મહત્વપૂર્ણ જવાબદારી સોંપી છે. ભાજપે નીતિન નબીનની ટીમમાં તેમને મહાસચિવ બનાવ્યા, ત્યારબાદ યુવા મોરચાની જવાબદારી સોંપી અને હવે તેમને બિહાર ઉપરાંત કર્ણાટકની જવાબદારી સોંપવામાં આવી છે. સ્મૃતિ ઈરાનીના ભાજપમાં ફરી જૂના દિવસો પાછા ફર્યા લોકસભા ચૂંટણીમાં હાર બાદ સ્મૃતિ ઈરાનીને લઈને અનેક પ્રકારની અટકળો ચાલી રહી હતી. જોકે, ભાજપના ટોચના નેતૃત્વે તેમને રાષ્ટ્રીય સ્તરે મહત્વપૂર્ણ ભૂમિકાઓ અને વૈચારિક મોરચે પાર્ટીનું વલણ મજબૂતીથી રજૂ કરવાની જવાબદારી સોંપી છે. સ્મૃતિ ઈરાનીને નીતિન નબીનની ટીમમાં પહેલાં મહાસચિવ બનાવવામાં આવ્યા અને હવે તેમને ભાજપ શાસિત રાજ્યો હરિયાણા અને છત્તીસગઢના પ્રભારી બનાવવામાં આવ્યા છે. ભાજપ કેડર અને જાહેર સંવાદમાં સ્મૃતિ ઈરાનીની આક્રમક શૈલીને ધ્યાનમાં રાખીને તેમને અનેક રાજ્યોના સંગઠનાત્મક પ્રવાસો અને વિશેષ વ્યૂહાત્મક અભિયાનોમાં આગળ રાખવામાં આવી રહ્યા છે. હરિયાણા અને છત્તીસગઢમાં ભાજપના રાજકીય મૂળને મજબૂત કરવાની જવાબદારી સ્મૃતિ ઈરાનીના ખભા પર રહેશે. રામ માધવનું સંગઠનમાં પુનરાગમન અને વધતું કદ ભાજપના સંગઠનાત્મક માળખામાં રાષ્ટ્રીય સ્વયંસેવક સંઘના વરિષ્ઠ વિચારક અને વ્યૂહરચનાકાર રામ માધવનું રાજકીય કદ ફરી એકવાર મુખ્ય રીતે ઉભરી આવ્યું છે. ભાજપના રાષ્ટ્રીય ઉપાધ્યક્ષ તરીકે પહેલાં તેમની મુખ્ય પ્રવાહમાં વાપસી થઈ હતી અને હવે તેમને બે રાજ્યોના પ્રભારી બનાવવામાં આવ્યા છે. વર્ષ 2020માં રાષ્ટ્રીય મહાસચિવ પદ પરથી હટાવવામાં આવ્યા બાદ અને ફરી સંઘના કાર્યક્ષેત્રમાં પરત ફર્યા પછી રામ માધવનું ભાજપના કેન્દ્રીય સંગઠનમાં રાષ્ટ્રીય ઉપાધ્યક્ષ પદ પર પુનરાગમન થયું છે. રામ માધવની આ નવી જવાબદારી ભાજપ અને આરએસએસ વચ્ચે વધુ સારો સમન્વય સ્થાપિત કરવા તથા 2029ની ચૂંટણીલક્ષી મોરચાબંધીની દૃષ્ટિએ અત્યંત મહત્વપૂર્ણ માનવામાં આવી રહી છે. રામ માધવને દક્ષિણ ભારતના તમિલનાડુની સાથે ચૂંટણીલક્ષી રાજ્ય ઉત્તરાખંડના પ્રભારી બનાવવામાં આવ્યા છે. તમિલનાડુ હજુ પણ ભાજપ માટે અત્યંત મુશ્કેલ મેદાન માનવામાં આવે છે, જ્યારે ઉત્તરાખંડમાં ભાજપ સામે સત્તાની હેટ્રિક નોંધાવવાનો પડકાર છે. આસામ, ત્રિપુરા અને નાગાલેન્ડમાં ભાજપની સરકારો બનાવવામાં તેમજ પૂર્વોત્તર રાજ્યોમાં પાર્ટીનો આધાર મજબૂત કરવામાં તેમની મહત્વપૂર્ણ ભૂમિકા રહી છે. આ ઉપરાંત જમ્મુ-કાશ્મીરમાં પાર્ટીના રાજકીય મૂળને મજબૂત બનાવવામાં પણ તેમનો મહત્વપૂર્ણ ફાળો રહ્યો છે. આ કારણે જ હવે તેમને 'મિશન સાઉથ' હેઠળ તમિલનાડુની કમાન સોંપવામાં આવી છે, જે ભાજપ માટે સૌથી મુશ્કેલ મેદાન બની રહ્યું છે. સુનીલ બંસલનું રાજકીય કદ યથાવત્ ઉત્તર પ્રદેશમાં પાર્ટીને મજબૂત આધાર આપ્યા બાદ સુનીલ બંસલને રાષ્ટ્રીય સ્તરે મોટી જવાબદારી સોંપવામાં આવી હતી. હાલ પશ્ચિમ બંગાળ, ઓડિશા અને તેલંગાણા જેવા રાજ્યોમાં પાર્ટીના વિસ્તરણની જવાબદારી તેમના ખભા પર છે. ઓડિશામાં પાર્ટીની અભૂતપૂર્વ સફળતા અને બંગાળમાં સંગઠનને મજબૂત બનાવ્યા બાદ ભાજપે તેમને પશ્ચિમ બંગાળની સાથે તેલંગાણાના પ્રભારી તરીકે યથાવત્ રાખ્યા છે. ભાજપના સંગઠનાત્મક અને ચૂંટણીલક્ષી માળખામાં સુનીલ બંસલનું નામ આજે પાર્ટીના ટોચના વ્યૂહરચનાકારો અને કેન્દ્રીય નેતૃત્વના સૌથી વિશ્વસનીય ચહેરાઓમાં ગણાય છે. પડદા પાછળ રહીને કામ કરવાની તેમની શૈલી, માઇક્રો-મેનેજમેન્ટ અને જમીની સ્તરે કેડરને એકસૂત્રમાં બાંધવાની ક્ષમતાને કારણે તેમને ભાજપના 'ઇલેક્શન એન્જિનિયર' પણ કહેવામાં આવે છે. બંસલને અત્યાર સુધી જે રાજ્યોની કમાન સોંપવામાં આવી છે, તેમાં તેલંગાણાને છોડીને બાકીના રાજ્યોમાં કમળ ખીલવવામાં તેઓ સફળ રહ્યા છે; હવે તેમના માટે તેલંગાણામાં ભાજપની સરકાર બનાવવાનો પડકાર છે. હાર બાદ પૂનિયાનું કદ કેવી રીતે વધતું ગયું રાજસ્થાનમાં 2023ની વિધાનસભા ચૂંટણીમાં આમેર બેઠક પરથી મળેલી હાર અને તે પહેલાં પ્રદેશ અધ્યક્ષ પદ પરથી હટાવવામાં આવ્યા બાદ એવી અટકળો લગાવવામાં આવી રહી હતી કે ડૉ. સતીશ પૂનિયાનો રાજકીય પ્રભાવ ઘટી શકે છે. જોકે, ભાજપના ટોચના નેતૃત્વે તેમના સંગઠનાત્મક અનુભવ અને જાટ સમાજમાં રહેલી પકડને ધ્યાનમાં રાખીને તેમના પર મોટો દાવ લગાવ્યો, જેના કારણે તેમના રાજકીય કદમાં અભૂતપૂર્વ વધારો થયો છે. વિધાનસભા ચૂંટણી હાર્યા બાદ પૂનિયાને હરિયાણાની કમાન સોંપવામાં આવી, જ્યાં તેઓ ભાજપને હેટ્રિક અપાવવામાં સફળ રહ્યા. ભાજપે સતત ત્રીજી વખત રાજ્યમાં સંપૂર્ણ બહુમતીની સરકાર બનાવી. આ ચૂંટણીલક્ષી સફળતાએ કેન્દ્રીય સંગઠનમાં તેમના પ્રત્યેનો વિશ્વાસ અનેકગણો વધારી દીધો. તેના કારણે ભાજપે તેમને રાજ્યસભામાં મોકલ્યા અને ત્યારબાદ નીતિન નબીનની ટીમમાં મહામંત્રી બનાવ્યા. હવે તેમને પંજાબની સાથે જમ્મુ-કાશ્મીરના પ્રભારી બનાવવામાં આવ્યા છે. આ પહેલાં તેમને ભાજપ અનુસૂચિત જનજાતિ મોરચાના પ્રભારી તરીકે પણ નિયુક્ત કરવામાં આવ્યા હતા. અનિલ એન્ટનીને ભાજપમાં પ્રમોશન પૂર્વ રક્ષા મંત્રી અને કોંગ્રેસના દિગ્ગજ નેતા એ.કે. એન્ટનીના પુત્ર અનિલ એન્ટનીનો ભાજપમાં જોડાયા બાદથી જ રાજકીય સફર ખૂબ ઝડપથી આગળ વધી છે. દક્ષિણ ભારતના કેરળમાંથી આવતા એન્ટનીને આગળ કરીને ભાજપ પોતાના જનાધાર અને વિસ્તરણની વ્યૂહરચનામાં વ્યસ્ત છે. ભાજપ અધ્યક્ષ નીતિન નબીને અનિલ એન્ટનીને પહેલાં પોતાની ટીમમાં રાષ્ટ્રીય સચિવ બનાવ્યા અને હવે સંગઠનમાં મોટી જવાબદારી સોંપતાં તેમને નાગાલેન્ડના પ્રદેશ પ્રભારી તરીકે નિયુક્ત કર્યા છે. આ સાથે જ તેમને ગોવાના સહ-પ્રભારી પણ બનાવવામાં આવ્યા છે. ભાજપના રાષ્ટ્રીય અધ્યક્ષ દ્વારા જાહેર કરાયેલી રાજ્ય પ્રભારીઓની યાદીમાં અનિલ એન્ટનીને આ મહત્વપૂર્ણ જવાબદારી આપવામાં આવી છે. પૂર્વોત્તરના રાજ્યોમાં સંગઠનનો વિસ્તાર કરવા અને સ્થાનિક રાજકીય સમીકરણોને સંભાળવાની જવાબદારી હવે તેમના ખભા પર છે. આ ઉપરાંત ગોવામાં આવતા વર્ષની શરૂઆતમાં જ વિધાનસભાની ચૂંટણી યોજાવાની છે, જ્યાં ભાજપ છેલ્લા 10 વર્ષથી સત્તામાં છે. આવી સ્થિતિમાં તેમના સામે પૂર્વોત્તરની સાથે-સાથે ગોવામાં પણ ભાજપના રાજકીય મૂળિયાં મજબૂત જાળવી રાખવાની જવાબદારી સોંપવામાં આવી છે. 12 રાજ્યો-કેન્દ્રશાસિત પ્રદેશોમાં કોઈ સહ-પ્રભારી નથી 12 રાજ્યો-કેન્દ્રશાસિત પ્રદેશોમાં ભાજપે કોઈ સહ-પ્રભારીની નિમણૂક કરી નથી. તેમાં આંદામાન-નિકોબાર, અરુણાચલ પ્રદેશ, ચંદીગઢ, દાદરા અને નગર હવેલી તથા દમણ અને દીવ, લદ્દાખ અને લક્ષદ્વીપનો સમાવેશ થાય છે. મણિપુર, મિઝોરમ, નાગાલેન્ડ, પુડુચેરી, સિક્કિમ અને ત્રિપુરામાં પણ માત્ર પ્રભારીઓની નિમણૂક કરવામાં આવી છે, કોઈ સહ-પ્રભારી નથી. ભાજપના પ્રભારી અને સહ-પ્રભારીઓની યાદીમાં 4 ખાસ તથ્યો મહારાષ્ટ્રમાં બે પ્રભારી, બે સહ-પ્રભારી: બૈજયંત જય પાંડા અને અમિત માલવિયા પ્રભારી છે. સદાનંદ શેટ તનવાડે અને કમલજીત સેહરાવતને સહ-પ્રભારી બનાવવામાં આવ્યા છે. અનિલ એન્ટનીને બે રાજ્યોમાં બેવડી જવાબદારી: અનિલ એન્ટનીને નાગાલેન્ડના પ્રભારી બનાવવામાં આવ્યા છે. તેઓ ગોવાના સહ-પ્રભારી પણ રહેશે. યુપીમાં 1 પ્રભારી સાથે 4 સહ-પ્રભારી: વિનોદ તાવડેને પ્રભારી બનાવવામાં આવ્યા છે, જ્યારે તેમની સાથે ચાર સહ-પ્રભારીની નિમણૂક કરવામાં આવી છે. 5 રાજ્યોમાં બે-બે સહ-પ્રભારી: આસામ, બિહાર, દિલ્હી, રાજસ્થાન અને તમિલનાડુમાં બે-બે સહ-પ્રભારીની નિમણૂક કરવામાં આવી છે. ---------------------------------- આ સમાચાર પણ વાંચો: નીતિન નબીનની નવી ટીમ જાહેર:સ્મૃતિ ઈરાની-રામ માધવની વાપસી, ભાજપ IT સેલના ઇન્ચાર્જ અમિત માલવિયાને હટાવાયા; તમામ મોરચાના અધ્યક્ષ બદલાયા ભાજપ અધ્યક્ષ નીતિન નબીને પદ સંભાળ્યાના 209 દિવસ પછી સોમવારે 65 સભ્યોની કાર્યકારિણીની જાહેરાત કરી દીધી. રામ માધવને ઉપાધ્યક્ષ અને સ્મૃતિ ઈરાનીને મહાસચિવ બનાવીને પાછા લાવવામાં આવ્યા છે. ભાજપ IT સેલના પ્રભારી અમિત માલવીયાને હટાવી દેવામાં આવ્યા છે, દીપક મ્હસ્કે તેમનું સ્થાન લેશે. જ્યારે, રાજસ્થાનના પૂર્વ મુખ્યમંત્રી વસુંધરા રાજે ઉપાધ્યક્ષ પદે યથાવત રહેશે. રાષ્ટ્રીય સંગઠન મંત્રી બીએલ સંતોષ પણ પદ પર યથાવત રહેશે. વાંચો સંપૂર્ણ સમાચાર…