એક મહિલા, 6 વર્ષ, બળાત્કાર -છેડતીના 10 ખોટા કેસ:નિવૃત્ત આર્મી ઓફિસરે રિવર્સ FIR કરાવી તો સામે આવ્યો આખો ખેલ, જાણો કોણ છે શબનમ

નામ: રાકેશ વાલિયા ઉંમર: 65 વર્ષ કામ: રિટાયર્ડ આર્મી ઓફિસર વાત 2021ની છે. 44 વર્ષની એક મહિલાએ સોશિયલ ઇન્ફ્લુએન્સર બનીને રાકેશને ફોન કર્યો અને મળવાનો સમય માંગ્યો. 29 ડિસેમ્બર, 2021ના રોજ 45 મિનિટની મુલાકાત થઈ અને રાકેશ પર રેપ (બળાત્કાર)ની FIR થઈ ગઈ. કેસ સેશન્સ કોર્ટ, હાઈકોર્ટ અને પછી સુપ્રીમ કોર્ટમાં ગયો. તપાસ શરૂ થઈ, તો ફક્ત દિલ્હીમાં જ મહિલાની ખોટી FIRના 9 શિકાર મળ્યા. રાકેશ 10મો ટાર્ગેટ હતા. કેપ્ટન રાકેશ વાલિયાએ 2022માં જ આરોપ લગાવનારી મહિલા વિરુદ્ધ રિવર્સ કેસની એપ્લિકેશન આપી. પોલીસે 3 વર્ષ પછી FIR ત્યારે કરી, જ્યારે સુપ્રીમ કોર્ટે કેપ્ટન વાલિયાને નિર્દોષ જાહેર કર્યા. 4 વર્ષ કેસ ચાલ્યા પછી ફેબ્રુઆરી 2025માં સુપ્રીમ કોર્ટે તેમની વિરુદ્ધની FIR રદ કરી દીધી. 45 મિનિટની મુલાકાત, જેના પછી રેપની FIR થઈ કેપ્ટન વાલિયા જણાવે છે, ‘2017માં મારી એક બૂક પબ્લિશ થઈ. 2019ના અંતમાં કોઈ સિદ્રા મન્સૂરનો ફોન આવ્યો. પોતાને સોશિયલ મીડિયા ઇન્ફ્લુએન્સર ગણાવી અને કહ્યું કે મારી પુસ્તકનું પ્રમોશન અને ટ્રાન્સલેશન કરશે. તેણે મને મળવાની ઈચ્છા વ્યક્ત કરી. વ્યસ્તતાને કારણે એપોઇન્ટમેન્ટ ટળતી રહી, આખરે 29 ડિસેમ્બર 2021ના રોજ મળવાનું નક્કી થયું.’ 'સિદ્રાએ કહ્યું કે તે પતિ સાથે ઇન્ટરવ્યુ લેવા આવશે. ગાડીમાં જ મારો ઇન્ટરવ્યુ કરશે. હું નહોતો જાણતો કે આ મુલાકાત મારી જિંદગી અને માન-સમ્માનને તહેસ-નહેસ કરી દેશે. બપોરે 3.30 વાગ્યે પિકઅપ માટે હું છતરપુર મેટ્રો સ્ટેશન પહોંચ્યો, તો ફક્ત સિદ્રા મળી. તેણે જણાવ્યું કે પતિને કોઈ કામથી જવું પડ્યું. પછી ગાડીમાં ઇન્ટરવ્યુ શરૂ થયો.' 'સિદ્રા પાસે 2 ફોન અને એક વોઈસ રેકોર્ડર હતું. બધું સામાન્ય હતું, પરંતુ શંકા ત્યારે થઈ, જ્યારે સિદ્રાએ કહ્યું કે તમારા ફોન કોલને કારણે આપણે વધારે વાત ન કરી શક્યા. શું કોઈ પાર્ક કે હોટલમાં જઈને ડિટેલમાં વાત કરી શકીએ? મેં આગળ કોઈ વાત કર્યા વગર સાંજે 4.15 વાગ્યે નોઈડાના બોટનિકલ ગાર્ડન (સેક્ટર 38) પોલીસ સ્ટેશન સામે તેમને ડ્રોપ કરી દીધા.' 'કુલ 45 મિનિટની મુલાકાત હતી. ઘરે પણ નહોતો પહોંચ્યો કે નોઈડા સેક્ટર-37 સ્ટેશનથી ફોન આવ્યો. પોલીસે કહ્યું કે શબનમ નામની મહિલાએ મારા પર રેપનો આરોપ લગાવ્યો છે. મેં પોલીસને જણાવ્યું કે હું તેમને નથી ઓળખતો. પછી રાત્રે 11.30 વાગ્યે મહેરૌલી પોલીસ સ્ટેશનથી ફોન આવ્યો. જણાવવામાં આવ્યું કે શબનમે મારી વિરુદ્ધ રેપની FIR કરી છે. ત્યારે મને સિદ્રા મન્સૂરની અસલી ઓળખ ખબર પડી.’ FIRમાં નોંધાયેલી કહાની અને તથ્યોમાં 3 ગરબડો મળી… 1. કેપ્ટન વાલિયા જણાવે છે, ‘FIRમાં લખ્યું હતું કે મેં શબનમને બપોરે 3.30 વાગ્યે ગાડીમાં બેસાડી. 20 મિનિટ પછી 3.50 વાગ્યે તરસ લાગતા તેને કોલ્ડ ડ્રિંક આપ્યું, જેમાં નશો હતો. 15 મિનિટ પછી તેને નશો ચઢવાનું શરૂ થયું, એટલે કે અત્યાર સુધી 4.05 વાગી ચૂક્યા હતા. 10 મિનિટ પછી એટલે કે 4.15 વાગ્યે તે બેભાન થઈ, જેનો ફાયદો ઉઠાવીને મેં રેપ કર્યો. જ્યારે અસલમાં મેં 4.15 વાગ્યે તેને ડ્રોપ કરી દીધી હતી.‘ ગરબડ: ડ્રોપ કરવાનો સમય અને બેભાન થવાનો સમય એક જ છે, તો રેપ ક્યારે થયો? 2. FIR મુજબ, હું નિર્જન જગ્યા પર ગાડી ફેરવતો રહ્યો. રેપનો સ્પોટ નોઈડા સેક્ટર-34 કે 35 હતો. અહીં જ મેં નશાની હાલતમાં મહિલાને આગળની સીટ પરથી ઉતારીને પાછળ બેસાડી. પછી આ જ વ્યસ્ત વિસ્તારમાં ગાડી ફરતી રહી. ગરબડ: શું 60-62 વર્ષની વ્યક્તિ 44 વર્ષની મહિલાને બેક સીટ પર એટલી સફાઈથી બેસાડી દેશે કે કોઈ જોઈ પણ ન શકે? તે પણ ત્યારે, જ્યારે તે નશામાં છે. 3. નશામાં મહિલા બપોરે 4.15થી રાત્રે 11 વાગ્યા સુધી એક પોલીસ સ્ટેશનથી બીજા અને પછી ત્રીજા સ્ટેશન ફરતી રહી. નોઈડામાં સેક્ટર-37 અને દિલ્હીના ઘિટોરની સ્ટેશનમાં FIR ન લખાઈ. તે દિલ્હીના મહેરૌલી સ્ટેશનમાં રાત્રે 11 વાગ્યે પહોંચી અને માત્ર 13 મિનિટમાં 11.13 વાગ્યે FIR નોંધાઈ ગઈ. ગરબડ: કોઈ વ્યક્તિ નશાની હાલતમાં આટલો પ્રવાસ કેવી રીતે કરી શકે? રેપનો આરોપ લગાવ્યો, પરંતુ મેડિકલ ન કરાવ્યું કેપ્ટન રાકેશ વાલિયાએ આગળ જણાવ્યું, ‘FIRમાં નોંધાયેલી ઘટનાની રાત્રે 10.55 વાગ્યે દીકરાને ફેસબુક પર એક મેસેજ મળ્યો. લખ્યું હતું- 'Are you Rakesh Walia’s son, your father raped me.' ફેમિલી સુધી આ વાત પહોંચાડીને, ડરાવવાની કોશિશ થઈ.’ ‘સ્ટેશન ગયો, તો પૂછપરછ અને મેડિકલ થયું. જ્યારે ફરિયાદ કરનારી મહિલાએ મેડિકલ કરાવવાની અને તપાસ માટે કપડાં આપવાની ના પાડી દીધી. તે રેપનો સ્પોટ પણ ઓળખી શકી નહીં. આ પછી અલગ-અલગ લોકો દ્વારા પૈસાની ડિમાન્ડ આવવાની શરૂ થઈ ગઈ.’ 2022માં પુરાવા એકઠા કર્યા અને મહિલા પર કેસ કર્યો કેપ્ટન વાલિયા આગળ જણાવે છે, ‘2022માં મેં મહિલા વિરુદ્ધ પુરાવા એકઠા કરવાના શરૂ કર્યા. આ જ વર્ષે 3-4 FIR એકઠી કરી લીધી, જે આ જ મહિલાએ બીજા પુરુષો પર કરી હતી. બધાને ફસાવવાની રીત એકસરખી હતી. 25 ફેબ્રુઆરી, 2025ના રોજ સુપ્રીમ કોર્ટે મારી વિરુદ્ધ થયેલી FIR રદ કરી દીધી. મેં પણ મહિલા વિરુદ્ધ ખોટી FIR નોંધાવવા અને એક્સટોર્શન (પૈસા પડાવવા)ની ફરિયાદ કરી હતી.‘ ‘જે પોલીસે મારી વિરુદ્ધ માત્ર 13 મિનિટમાં FIR કરી હતી, તેને મહિલા વિરુદ્ધ કેસ નોંધવામાં 3 વર્ષ લાગી ગયા. મહિલા પાસે પુરાવાના નામે માત્ર તેનું નિવેદન હતું. મારી પાસે 9 FIR હતી, જેમાં બીજા પણ લોકોને ફસાવવાના પુરાવા હતા. આખરે માર્ચ 2025માં મહિલા પર FIR થઈ.‘ વકીલ બોલ્યા- મહિલા વિરુદ્ધ પુરાવા, પરંતુ બેલ મળી કેપ્ટન વાલિયાના વકીલ ભારત ચુગની લીગલ ટીમના મેમ્બર અમિત લખાની કહે છે, 'આ કેસ એટલો નબળો હતો કે સુપ્રીમ કોર્ટમાં બીજી સુનાવણીમાં રદ થઈ ગયો. સેશન્સ અને હાઈકોર્ટે મહિલાના ટ્રેપમાં ફસાયેલા બીજા લોકો વિરુદ્ધ થયેલી FIR પર ચર્ચા પણ ન કરી. મહિલાનું મેડિકલ ન કરાવવું બીજો મોટો આધાર બન્યો.' તેઓ આરોપ લગાવતા કહે છે, 'પોલીસે મહિલાની ધરપકડ કરી, પરંતુ એક કલાકમાં છોડી દીધી. તે પછી ક્રાઈમ બ્રાન્ચે જે પ્રેસ રિલીઝ જાહેર કરી, તે પણ રસપ્રદ છે. તેમણે લખ્યું હતું- ક્રાઈમ બ્રાન્ચે હનીટ્રેપ કરનારા એક રેકેટનો પર્દાફાશ કર્યો. આ એક મોટું ઓર્ગેનાઈઝ્ડ રેકેટ છે. મતલબ તમે માની રહ્યા છો કે આ એક મોટું રેકેટ છે, પણ ધરપકડ કરીને છોડી પણ દીધી?' રેપ કેસ દ્વારા સરકારી ફંડમાંથી પૈસાની ઉઘરાણીની રમત આખરે આવા સંજોગો કેમ બની રહ્યા છે, શું આની પાછળ કોઈ ગેંગ એક્ટિવ છે, તે સમજવા માટે અમે આવા મામલાઓ પર કામ કરી રહેલા RTI એક્ટિવિસ્ટ સોની કપૂર સાથે વાત કરી. તેઓ જણાવે છે, ‘આ એક રીતે ઓર્ગેનાઈઝ્ડ ક્રાઈમ બની ગયો છે. દિલ્હીના આંકડા તો ઓછામાં ઓછું આ જ જણાવે છે.' ‘જુઓ જો કોઈ મહિલા પોલીસ સ્ટેશન પહોંચીને કહે છે કે કોઈ વ્યક્તિએ મારો રેપ કર્યો છે, તો FIR નોંધવી પોલીસની મજબૂરી છે, નહીંતર તે અધિકારીને જ સજા થઈ જશે. આને ઝીરો અવર FIR કહે છે. હવે આ બધું સંમતિથી થયું કે નહીં, તે મહિલા જ જણાવશે. તેની જ વાત સાચી માનવામાં આવશે. તેને કોઈ સાક્ષીની પણ જરૂર નથી.' ‘FIR લખાયા પછી જ રેપ પીડિતને સરકાર તરફથી વળતર તરીકે આર્થિક મદદ મળવાની શરૂ થઈ જાય છે. ચાર્જશીટ ફાઈલ થાય ત્યાં સુધીમાં 50% સુધી પૈસા મળી જાય છે. આરોપ સાબિત ન થવા પર પૈસાની રિકવરી કરવાનો નિયમ છે, પરંતુ તે બહુ ઓછા કિસ્સામાં થઈ શકે છે.’ દિલ્હીમાં 3097 રેપ કેસનો ટ્રાયલ, 133માં જ સજા સોની કપૂર આગળ જણાવે છે, 'મેં પોલીસ પાસે તે મહિલાઓનો ડેટા માંગ્યો હતો, જે ઘણી વાર અલગ-અલગ પુરુષો પર રેપ કેસ લગાવે છે. પછી પોલિસી હેઠળ સરકાર પાસેથી પૈસા લે છે. આ નામની સ્પેલિંગમાં થોડા ઘણા ફેરફાર કરી લે છે, તેથી સોફ્ટવેરમાં નામ પકડમાં આવતું નથી.' ‘દિલ્હીમાં અમે ત્રણ જગ્યાએ પોલીસ, દિલ્હી સ્ટેટ લીગલ સર્વિસ ઓથોરિટી (DLSA) અને કોર્ટમાંથી આવા કેસોનો ડેટા કાઢવાની કોશિશ કરી. પોલીસ હેડક્વાર્ટરે સાફ ના પાડી દીધી. એવામાં દરેક પોલીસ સ્ટેશનમાં RTI લગાવીને ડેટા કાઢવો અશક્ય જેવું હતું. પછી DLSA ગયા, તો ત્યાંથી જવાબ મળ્યો કે અમે એવો કોઈ ડેટા મેન્ટેન કરતા નથી.‘ ‘આ પછી અમે દિલ્હીની અલગ-અલગ 11 કોર્ટમાં ગયા. 10માંથી ડેટા મળ્યો, પરંતુ દ્વારકા કોર્ટમાંથી અત્યાર સુધી નથી મળ્યો. આ બધામાં અંદાજે 4 મહિનાનો સમય લાગ્યો. અત્યારે ફક્ત દિલ્હીનો ડેટા જોઈએ, તો કુલ 3097 રેપ કેસના ટ્રાયલ થયા, પરંતુ સજા માત્ર 133 મામલામાં થઈ, એટલે કે દોષિત ઠરવાનો રેટ માત્ર 4.3% છે.‘ શું તમે બીજા રાજ્યોનો પણ ડેટા કાઢવાની કોશિશ કરી? સોની જણાવે છે, ‘દિલ્હી સિવાય માત્ર કર્ણાટકમાંથી આવો ડેટા મળ્યો છે. ત્યાં કન્વિક્શન રેટ (સજાનો દર) તેનાથી પણ ઓછો માત્ર 0.36% છે. આ પણ કોઈએ RTIથી કાઢ્યો છે. બે મહિના પહેલા અમે હરિયાણામાં પણ RTI લગાવી છે. અમારી પાસે ઘણી નાની ટીમ છે, જ્યારે દેશભરનો ડેટા કાઢવા માટે મોટું નેટવર્ક જોઈએ.‘ ઉઘરાણી માટે પુરુષોને હનીટ્રેપ કરતી કોનવુમેન હનીટ્રેપના શિકાર પુરુષો માટે કામ કરનારી એડવોકેટ દીપિકા નારાયણ કહે છે, 'આખા દેશમાંથી અમારી પાસે આવા કિસ્સા આવ્યા છે. જબલપુર, જયપુર, ગુડગાંવ અને દિલ્હીમાં કેસોનો રાફડો ફાટ્યો છે. અત્યારે મારી પાસે 25-28 કેસ છે, જ્યાં સ્ત્રીઓએ 3થી લઈને 15 પુરુષો પર કેસ કરી રાખ્યો છે. અમે તેમને ફોલો કરી રહ્યા છીએ.' શું ચોક્કસ ડેટા છે? અમારી ક્ષમતા સરકાર જેટલી નથી, જે આખા દેશનો ડેટા ભેગો કરી શકે. અમે હરિયાણાના તમામ જિલ્લાઓમાંથી આવા મામલાઓની લિસ્ટ માંગી હતી, પરંતુ 8 જિલ્લાઓમાંથી જવાબ મળ્યો. ફક્ત આ જિલ્લાઓમાં 51 એવી મહિલાઓ મળી, જેમણે 3-15 પુરુષો વિરુદ્ધ રેપ, ગેંગરેપ અને છેડતીના કેસ નોંધાવ્યા છે.