મેડિકલ સ્ટોર ચલાવનાર ઉત્પલ પટેલનું ગિફ્ટ સિટીના નામે કરોડોનું ફુલેકું:લાખોના વળતરની લાલચે ઘણાએ લોન લઈ રૂપિયા રોક્યા, 5 રાજ્યના લોકોને કેવી રીતે ટ્રેપમાં ફસાવ્યા?

ગાંધીનગર પાસે આવેલી ગિફ્ટ સિટીમાંથી એક મોટું ભોપાળુ બહાર આવ્યું છે. આમ તો ગિફ્ટ સિટીનું નામ પડે એટલે મલ્ટિનેશનલ કંપનીઓની ગંગનચૂંબી ઇમારતોની તસવીર મનમાં ઉભરી આવી. સામાન્ય માણસ માટે ત્યાં રૂપિયો રોકવો પણ સપના સમાન ગણાય. પરંતુ જ્યારે આવી જગ્યાએ નાનું રોકાણ કરીને દર મહિને કમાણી કરવાની સ્કિમ આવી તો હજારો લોકોને છૂટ્ટા હાથે રૂપિયા રોક્યા. શોર્ટકટથી કમાવી લેવાની માનસિકતા તો એવી કે અમુકે તો લોન લઈને રોકાણ કર્યું. પણ ત્રણ વર્ષની અંદર જ હજારો લોકોના લગભગ 400 કરોડ રૂપિયા ચાઉં કરી નાખ્યા હોવાનો ગંભીર આરોપ લાગતા સનસની મચી ગઈ છે. ગુજરાતની શાન અને સરકારી માટે વિકાસની ફૂટપટ્ટી સમાન ગિફ્ટ સિટીના નામે આવું કૌભાંડ થવાના દાવા પાછળનું સત્ય જાણવા માટે દિવ્ય ભાસ્કરે ઇન્વેસ્ટિગેશન કર્યું. જેમાં ગિફ્ટ સિટીથી માંડીને સાબરકાંઠાના એ ગામડા સુધી તપાસ કરી, જ્યાં માસ્ટર માઇન્ડનું વતન છે. અમારી તપાસમાં આ સ્કીમના કેટલાક એવા પાસા સામે આવ્યા, જે જાણીને આશ્ચર્યચકિત થઈ જવાય. વાત એમ છે કે ગિફ્ટ સિટીમાં એક ભવ્ય ઇમારતના ત્રીજા માળે શૂટ સ્પેસ ડિજિટલ પ્રાઇવેટ લિમિટેડ નામની એક કંપની આવેલી છે. આ કંપનીમાં ઉત્પલ પટેલ નામની એક વ્યક્તિ ડિરેક્ટરના પદ પર છે અને ઇન્વેસ્ટર્સના દાવા પ્રમાણે ઉત્પલ પટેલ જ આ ગેમનો મુખ્ય ચહેરો છે. હરિયાણાના રોહતકથી આવેલા ચારથી પાંચ લોકોમાં એક યુવકે કહ્યું, “અમે શરૂઆતમાં ખૂબ ઓછું રોકાણ કર્યું હતું. દર મહિને ભાડું મળી જતું હોવાથી અમને વિશ્વાસ બેઠો. એટલે મેં ઘરના કાગળ પર લોન લીધી અને દોઢેક કરોડ રૂપિયા રોક્યા. હવે રૂપિયા ફસાઈ ચૂક્યા છે, મારી પાસે લોનના હપ્તા ભરવાના પૈસા નથી.” ગુજરાતના જ એક રોકાણકારે કહ્યું, “કંપનીના ડિરેક્ટર 15 દિવસથી ઓફિસે ફરક્યા નથી. ફોન પર એટલું જ કહે છે કે મારા એકાઉન્ટ ફ્રિઝ થઈ ગયા છે. હું વ્યવસ્થામાં પડ્યો છું.” અન્ય એક રોકાણકાર બોલ્યો, “નવો ડેટા સેન્ટર બનાવવા માટે પ્રાંતિજ પાસે જગ્યા લેવામાં આવી અને તેનું ભૂમિપૂજન કરીને અમને ડફોળ બનાવવામાં આવ્યા.” હવે, કરોડપતિ બનાવાના સપના બતાવતી આ સ્કીમને સમજો, જેનાથી ખ્યાલ આવી જશે કે લોકો કેમ લોન લઈને અને જીવનમૂડી નાખીને રૂપિયા રોકવા લાગ્યા હતા. હાલના આધુનિક સમયમાં ડેટા સેન્ટરની ખૂબ જરૂર પડે છે. ડેટા સેન્ટર એટલે એવા ડિજિટલ સ્ટોરેજ જ્યાં ફોટો, વીડિયો, કન્ટેન્ટ વગેરેનો અલગ-અલગ પ્રકારે ડેટા સ્ટોર થતો હોય. આપણે સોશિયલ મીડિયા પર જે ફોટો કે વીડિયો અપલોડ કરીએ છીએ, એ પણ જે તે કંપનીના ડેટા સેન્ટરમાં સ્ટોર થતાં જ હોય. જો કોઈ કંપનીઓના પોતાના ડેટા સેન્ટર ન હોય તો તે ભાડે લે. બસ, અહીંથી જ ચાલાકીથી કમાણી કરવાનો કિમીયો શરૂ થાય છે. ઉત્પલ પટેલે શૂટ સ્પેસ ડિજિટલની ઓળખ ડેટા સેન્ટર ભાડે આપતી કંપની તરીકે આપી. લોકોને લાલચ આપી કે ગિફ્ટ સિટીમાં આવેલી આ કંપનીમાં તમે રૂપિયા રોકો અને તમને TB એટલે કે ટેરાબાઇટમાં સ્ટોરેજ મળશે. આ સ્ટોરેજ વિવિધ કંપનીઓને ભાડે આપવામાં આવશે. એટલે તમને દરમહિને ભાડા પેટે આવક થતી રહેશે. આ રોકાણ માટે ભાડા કરાર પણ કરવામાં આવતા હતા. સરળ ઉદહરણની રીતે સમજીએ તો એક કોમ્લેક્સમાં 100 દુકાનો હોય. તો ઇન્વેસ્ટર પાસેથી દુકાનના નામે રૂપિયા લેવાના અને જે તે દુકાન અન્ય કોઈ વ્યક્તિને ભાડે આપી દેવાની. જે ભાડું મળે એમાં કંપની અને ઇન્વેસ્ટરને આવક થાય. આવી જ ફોર્મ્યૂલા ઉત્પલ પટેલે અપનાવી. શૂટ સ્પેસ ડિજિટલમાં રોકાણ ટેરાબાઇટ પર ચાલતું હતું. એટલે ઓછામાં ઓછું એક ટેરાબાઈટનું રોકાણ કોઈ વ્યક્તિ કરી શકે. જો એક ટેરાબાઈટના નામે GST સહિત 38,940 રૂપિયાનું રોકાણ કરવામાં આવે તો મહિનાના અંતે ભાડા પેટા 1650 રૂપિયાની આવક થતી. જેમ-જેમ રોકાણ વધે એમ-એમ ભાડાની આવક પણ વધતી જાય. નીચે આપેલા કોષ્ટકની મદદથી સમજો કે કેવી રીતે હજારો-લાખો રૂપિયાના ભાડાની આવકના સપના લોકોને બતાવવામાં આવ્યા હતા. લક્ઝરી કારથી માંડીને ક્રૂઝ સુધીના વાયદા વધુમાં વધુ લોકો આ ઇન્વેસ્ટમેન્ટ સ્કીમ સાથે જોડાય અને શૂટ સ્પેસ ડિજિટલમાં કરોડો રૂપિયાનું રોકાણ આવે એ માટે મલ્ટિલેવલ માર્કેટિંગ ચેઇન ઊભી કરવામાં આવી. કેટલીક બિઝનેસ ડેટા વેબસાઇટ પરથી મળેલી જાણકારી પ્રમાણે રોકાણકાર લાવનાર એજન્ટોને સ્માર્ટફોનથી માંડીને મેકબૂક, લક્ઝુરિયસ કાર અને ક્રૂઝ આપવા સુધીની લાલચ આપવામાં આવી હતી. આ ઉપરાંત દરમહિને લાખો-કરોડો રૂપિયા પણ કમિશન પેટે આપવાની સ્કિમ આપી હતી. ગિફ્ટ સિટીનું નામ પડે એટલે લોકો રૂપિયા રોકવા તૈયાર થઈ જતા ઉત્પલ પટેલે માત્ર ગુજરાત જ નહીં, રાજસ્થાન, ઉત્તરપ્રદેશ, દિલ્હી અને જમ્મુ કાશ્મીર સુધી પોતાના મોટિવેશનલ સેશન ગોઠવ્યા અને લોકોને લોભામણી લાલચ આપીને રોકાણ કરવા માટે આકર્ષવા માટેના પ્રયાસો કર્યા. જે એજન્ટો સારું કામ કરે તેમને મોટી-મોટી હોટલમાં લોકો સામે સન્માનિત કરવામાં આવતા હતા. આ રીતે નવા રોકાણકારો લાવવાની ચેઇન મજબૂત કરી એટલું જ નહીં, નોઇડા અને જમ્મુ-કાશ્મીરમાં સ્પેસ ડિજિટલ પ્રાઇવેટ લિમિડેટની ઓફિસો ખોલવામાં આવી. એટલે મોટી કંપની તરીકે લોકોના મનમાં ઓળખ બેસાડી દીધી. તમામ જગ્યાએ ઓફિસોના ઉદઘાટન માટે કંપનીનો ડિરેક્ટર ઉત્પલ પટેલ ખુદ જતો હતો. હવે જ્યારે લોકોને રૂપિયા મળતા બંધ થયા એટલે સોમવારે ગિફ્ટ સિટીમાં રોકાણકારોનું મોટું ટોળું ધસી આવ્યું. જો કે ઓફિસે તાળા મારેલા હતા. આક્રોશ ઠાલવતા રોકાણકારોમાં ઘણા લોકો ગુજરાત બહારના પણ હતા. છેવટે ત્યાં પોલીસ બોલાવવી પડી. રોકાણકારોએ પોલીસને પણ આ સમગ્ર પ્રકરણમાં કૌભાંડ થયું હોવાના આરોપ લગાવીને અરજી આપી છે. રોકાણકારોના દાવ પ્રમાણે અંદાજે 32 હજાર લોકો પાસેથી કરોડો રૂપિયા ઉલેચ્યા છે. દિવ્ય ભાસ્કરે આ કંપની અને તેને ચલાવનાર લોકોની કરમ કુંડળી કાઢી. તો ઘણા નવા ખુલાસા થયા. કોઈપણ કંપની શરૂ કરવી હોય તો તેને કંપની એક્ટ પ્રમાણે રજિસ્ટર કરાવવી પડે. રજિસ્ટ્રાર ઓફ કંપની એટલે કે RoCની અમદાવાદ ખાતે આવેલી ઓફિસમાં શૂટ સ્પેસ ડિજિટલ પ્રાઇવેટ લિમિટેડની નોંધાણી થયેલી છે. તેના ડેટા પ્રમાણે 30 માર્ચ, 2023ના રોજ આ કંપની અસ્તિત્વમાં આવી હતી. હાલમાં ગિફ્ટ સિટીની ઓફિસને ભલે તાળા લાગી ગયા હોય પણ સરકારી રેકોર્ડ પર આ કંપની એક્ટિવ છે. જ્યાં તેનું કામ ડેટા પ્રોસેસિંગ અને હોસ્ટિંગનું હોવાનું લખ્યું છે. 3 વર્ષ પહેલાં જે દિવસથી કંપની બની એ જ દિવસથી ઉત્પલ પટેલ તેનો ડિરેક્ટર છે, પરંતુ ધ્યાને લેવા જેવી વાત એ છે કે ગત 21 ફેબ્રુઆરી, 2026ના રોજ ધ્રુવ ચૌધરી નામના એક વ્યક્તિને આ જ કંપનીમાં એડિશન ડિરેક્ટર બનાવાયો છે. ઉત્પલ પટેલે શૂટ સ્પેસ ડિજિટલ પ્રાઇવેટ લિમિટેડ ઉપરાંત ક્લાઉડેજી ટેકનોલોજી પ્રાઇવેટ લિમિટેડ નામની કંપની બનાવી. જેમાં પોતે 19 જાન્યુઆરી, 2024ના રોજ ડિરેક્ટર બન્યો. જેમાં ઉત્પલ સિવાય અન્ય બે લોકો પણ ડિરેક્ટર છે. આ કંપની કોમ્પ્યુટર અને તેના પાર્ટ્સ બનાવતી હોવાનું સરકારી રેકોર્ડ પરથી માલુમ પડે છે. ઉત્પલ પટેલના ગામમાં કેવો છે માહોલ? દિવ્ય ભાસ્કરને ઇન્વેસ્ટિગેશન દરમિયાન મળેલી જાણકારી પ્રમાણે ઉત્પલ પટેલ સાબરકાંઠામાં આવેલા ઇસરી ગામનો વતની છે. એટલે અમે તેના ગામ પહોંચ્યા હતા. જો કે હાલ ઉત્પલ પટેલના ઘરે પણ ગિફ્ટ સિટીની ઓફિસની માફક તાળા લટકી રહ્યા છે. ઉત્પલ પટેલના જ એક નજીકની વ્યક્તિએ નામ ન આપવાની શરતે જણાવ્યું કે ઉત્પલે ફાર્મસીમાં બેચલર કર્યું છે. કોલેજ પૂરી થયા બાદ તે ઘરની નજીક મેડિકલ સ્ટોર ચલાવતો હતો. ફોરેન રિટર્ન ઉત્પલ પટેલ કોરોનાકાળ પછી નવા રૂપમાં આવ્યો તેના પિતા શિક્ષક હતા. ઉત્પલને વિદેશમાં સેટલ કરવા માટે ન્યૂઝિલેન્ડ મોકલવામાં આવ્યો હતો. પરંતુ કોઈક કારણોસર એ બે જ વર્ષમાં પાછો ફર્યો. ફરી એકવાર તેણે વતન આવીને ટાયર, કલર વગેરેની એજન્સીઓ લીધી. પરંતુ કોરોનાકાળ દરમિયાન તેણે આ ધંધો છોડી દીધો અને ગાંધીનગર આવી ગયો. આમ, મોટા શહેરમાં આવ્યા બાદ 2023માં જ તેણે શૂટ સ્પેસ પ્રાઇવેટ લિમિટેડ કંપની શરૂ કરી અને લોકો પાસેથી રોકાણના નામે રૂપિયા ઉઘરાવવાનું કામ શરૂ કર્યું. હજુ રોકાણકારોને મનાવવાના પ્રયાસ કર્યા ઇસરી ગામના લોકો સંબંધોની શરમ રાખીને ઓનકેમેરા કાંઈ બોલવા માટે તૈયાર નથી. જો કે ગણગણાટ તો એવો પણ છે કે આખી ફાયનાન્સિયલ ચેઇન તુટી ગયા બાદ તપાસનો રેલો પોતાની તરફ આવી શકે એવી ઉત્પલને આશંકા હતી. એટલે કેટલાક લોકોના મતે તે વિદેશ પણ ભાગી ગયો હોઈ શકે છે. જો કે આ વાતને કોઈ સત્તાવાર સમર્થન મળ્યું નથી. વાતો એવી પણ વહેતી થઈ છે કે ઉત્પલે 3 મહિનામાં રોકાણકારોને રૂપિયા પાછા આપી દેવાનો વાયદો કર્યો છે. પરંતુ લોકોને હજુ તેની વાત પર વિશ્વાસ આવી રહ્યો નથી.