અનુભવી તપાસ અધિકારી બોલ્યા- ખૂની બહુ ચાલાક છે:પોલીસ 3 દિવસ સુધી ગટરો ફંફોસી રહી, પ્લાસ્ટિકની કાળી થેલીઓએ આખા શહેરની ઊંઘ ઉડાડી દીધી

ભારે વરસાદ બાદ નર્મદા ડેમમાંથી જ્યારે મોટા પ્રમાણમાં પાણી છોડાય ત્યારે સમાચારોમાં ચમકતું ભરૂચ શહેર પોતાના વેપાર-ઉદ્યોગ અને શાંતિ માટે જાણીતું છે પણ આજથી એક વર્ષ પહેલાં શહેરમાં એક એવી ઘટના ઘટી ગઇ હતી જેના કારણે લોકોના ચહેરા પર ભય હતો, ગલીએ ગલીએ ચર્ચાઓ થતી અને પોલીસ દોડતી થઇ ગઇ હતી. 3 દિવસ સુધી પોલીસ ગટરો ફંફોસતી રહી અને કાળી પ્લાસ્ટિકની થેલીઓમાંથી કપાયેલા માનવ અંગો મળતા રહ્યા. ગુજરાત ક્રાઇમ ફાઇલ્સમાં આજે વાત ચોંકાવનારી મર્ડર મિસ્ટ્રીની. 29 માર્ચ, 2025ને શનિવારની બપોરે અગનગોળા વરસાવ્યા બાદ સૂરજદાદા ધીમે-ધીમે આથમી રહ્યાં હતા. સાંજ ઢળવા લાગી હતી. વાતાવરણમાં બફારો હજુ જેમનો તેમ જ હતો. આવામાં ભરૂચ શહેરની બહારની તરફનો વિસ્તાર ધીમે ધીમે સૂમસામ બની રહ્યો હતો. દૂધધારા ડેરીથી ભોલાવ GIDC તરફ જતો રસ્તો દિવસ દરમિયાન જેટલો વ્યસ્ત રહેતો હતો એટલો જ સાંજે ભયાનક લાગતો હતો. GIDCના પાણીના નિકાલ માટે બનાવેલી ગટર, અવની પર ઉતરવાની તૈયારી કરી રહેલાં અંધારાના ઓળા અને લોકોની ઓછી થઇ રહેલી અવર જવર જાણે કે કોઇ ડરામણી ઘટનાની ચાડી ફૂંકી રહ્યાં હતા. એક શ્વાન ગટરમાંથી કંઇક ખેંચીને પોતાના મોંમાં ભરાવીને રસ્તા તરફ આવી રહ્યો હતો. રસ્તા પર ચહલ પહલ ઓછી હતી પણ જે લોકોએ દૃશ્ય જોયું તેમને થયું કે કદાચ કોઇ જાનવરનું કપાયેલું માથું હશે પરંતુ પછીની થોડી જ ક્ષણોમાં હાહાકાર મચી જવાનો હતો. શ્વાન રોડ પર આવ્યો અને લોકોએ ધ્યાનથી જોયું તો તેમના પગ નીચેથી જમીન સરકી ગઇ કેમ કે શ્વાનના મોંઢામાં કોઇ જાનવરનું નહીં પણ એક યુવકનું કપાયેલું માથું હતું. કાપેલું, લોહીથી ખરડાયેલું અને અડધી ખૂલેલી આંખોવાળુ માથું જોઇને લોકો સ્તબ્ધ થઇ ગયા, એકબીજા સામે જોવા લાગ્યા. આ દૃશ્ય કોઇ હોરર ફિલ્મના સીન કરતાં ઓછું નહોતું. એકઠા થયેલા લોકોમાંથી એક વ્યક્તિએ બૂમ પાડી.... અરે, આ યુવાનની હત્યા થઇ લાગે છે. થોડી જ વારમાં ત્યાં ભીડ એકઠી થઇ ગઇ. કોઇ મોબાઇલમાં વીડિયો ઉતારવા લાગ્યું તો કોઇ કપાયેલું માથું જોઇને ઉબકા કરવા લાગ્યું. ભીડમાંથી એક વ્યક્તિએ પોલીસને ફોન કરીને ઘટનાની જાણ કરી દીધી. આ જાણ થયા બાદ સી ડિવીઝન પોલીસ સ્ટેશનના પીઆઇ વામન ભરવાડ અને તેમનો સ્ટાફ ઘટનાસ્થળે પહોંચી ગયા. DySP સી.કે.પટેલ પણ આવી ગયા હતા. પોલીસે આસપાસનો વિસ્તાર કોર્ડન કરી દીધો. માથું ગળાથી કૂરતાપૂર્વક કાપીને અલગ કરવામાં આવ્યું હતું. વધુ તપાસ માટે ફોરેન્સિક ટીમને પણ ઘટના સ્થળે બોલાવી લીધી. પોલીસ માટે સૌથી મોટો પ્રશ્ન હતો મૃતકની ઓળખનો. આખરે આ વ્યક્તિ કોણ છે? કોણે તેની સાથે આવું કર્યું? આની સાથોસાથ બીજો એક સવાલ એ પણ હતો કે જો માથું મળ્યું છે તો બાકીનું શરીર ક્યાં? આ સવાલનો જવાબ બીજા દિવસે મળવાનો હતો. પોલીસે સ્થળ પરથી માથું લઇને પોસ્ટ મોર્ટમ માટે મોકલી આપ્યું. અનુભવી પોલીસ અધિકારી વામન ભરવાડ સમજી ગયા હતા કે માથું મળ્યું છે તો બાકીના અંગો પણ ક્યાંક આસપાસ જ હોવા જોઇએ. જેથી તેમણે સ્ટાફને આસપાસમાં તપાસ કરવાની સૂચના આપી. હવે આસપાસના વિસ્તારોની તપાસ શરૂ થઇ પણ રાત પડી જતાં તપાસ પર બ્રેક મારવી પડી. તારીખઃ 30 માર્ચ, 2025 રવિવારની રજા હતી પણ આખા શહેરમાં કપાયેલું માથું મળ્યું હોવાની વાત પ્રસરી ચૂકી હતી. દિવસ ઊગી ચૂક્યો હતો અને ફરીથી પોલીસ તપાસમાં લાગી હતી. જ્યાંથી માથું મળ્યું હતું તેનાથી 300 મીટર દૂર તે જ ગટરમાંથી કાળા કલરની એક થેલી મળી આવી. 2 પોલીસકર્મીઓએ બે હાથથી ખેંચીને થેલીને બહાર કાઢી. જ્યારે થેલી ખોલી તો તેમાંથી માનવ શરીરનો કમરથી ઘૂંટણ સુધીનો કાપેલો ભાગ મળી આવ્યો હતો. હવે એ સ્પષ્ટ થઇ ગયું હતું કે આ કોઇ સામાન્ય હત્યા નહોતી પણ ક્રૂરતાપૂર્વક કરાયેલી હત્યા હતી. હત્યારાએ ફક્ત યુવાનને મારી નહોતો નાખ્યો પરંતુ તેની ઓળખ પણ ન થાય તેવો પ્રયાસ કર્યો હતો. હવે પોલીસે માનવ શરીરના બાકીના અંગો શોધવાના હતા. પોલીસ તપાસ આગળ વધી. સાંજ પડતાં જ વધુ એક સફળતા મળી. આ વખતે પોલીસને જમણો હાથ મળી આવ્યો. હજુ અમૂક અંગો બાકી હતા એટલે પોલીસે મથામણ ચાલુ જ રાખી પણ રાત પડી જતાં ઓપરેશન અટકાવવું પડ્યું. તારીખઃ 31 માર્ચ, 2025 આ દિવસે નાણાંકીય વર્ષ પૂરૂં થઇ રહ્યું હતું પણ પોલીસની તપાસ ફરીથી શરૂ થવાની હતી. તપાસનો આ ત્રીજો દિવસ હતો. થોડી શોધખોળના અંતે ફરી એકવાર કાળા કલરની પ્લાસ્ટિકની થેલી મળી. જેમાં ડાબો હાથ કપાયેલી હાલતમાં હતો. અલગ અલગ જગ્યાએથી માનવ અંગો મળતાં એ નક્કી થઇ ગયું હતું કે કોઇએ પોલીસને ગેરમાર્ગે દોરવા માટે આવું કર્યું છે. પોલીસને જે અંગો મળ્યાં હતા તેમાં છાતી અને પગ હજુ બાકી હતા. ઘટના સ્થળે હાજર પોલીસ અધિકારીઓના ચહેરા પર ગંભીરતા હતી. તેમાંથી એક અનુભવી અધિકારી બોલ્યા- આ કામ સામાન્ય માણસનું નથી.ખૂની બહુ ચાલાક છે. આરોપીને પકડવા પોલીસે અલગ અલગ ટીમ બનાવી લીધી હતી. એક ટીમ CCTV ચેક કરવામાં લાગી. બીજી ટીમ ગુમ થયેલા લોકોની યાદી મેળવવામાં લાગી. ત્રીજી ટીમ ગટર અને આસપાસના વિસ્તારોમાં બાકી અંગોની શોધખોળ કરવામાં લાગી હતી. છેલ્લા 3 દિવસથી સતત માનવ શરીરના ટુકડા મળી આવતા આખું શહેર ભયમાં હતું. વોટ્સએપ ગ્રુપ્સમાં ફોટા ફરી રહ્યા હતા. લોકો બાળકોને વહેલા ઘરે બોલાવી લેતા હતા. રાત્રે ગટરની આસપાસનો વિસ્તાર સૂમસામ થઇ જતો હતો. ચાની કિટલી અને પાનના ગલ્લાઓ પર ચર્ચા ચાલતી. 'આ કોઇ ગેંગવોર હશે.' 'ના, આ તો અંગત વેરઝેર લાગે છે.' 'કદાચ કોઇ સાઇકો કિલર હશે.' દરેક માણસ પોતાની રીતે અંદાજ લગાવતો હતો. જેટલા મોંઢા તેટલી વાતો થતી હતી પણ પોલીસ હજુ અંધારામાં હતી. આ મર્ડર મિસ્ટ્રીની ગંભીરતા સમજી ભરૂચ જિલ્લા પોલીસ અધિક્ષક મયુર ચાવડાએ આરોપીને ઝડપથી પકડી લેવા સૂચના આપી હતી. LCB PI એમ.પી.વાળા અને તેમની ટીમે ઘટના સ્થળની આસપાસના વિસ્તારની મુલાકાત લઇને 90 જેટલા CCTV ફૂટેજ એકઠાં કર્યા હતા. હ્યુમન સોર્સ, ટેકનિકલ સર્વેલન્સથી ઇનપુટ મેળવવાનું કામ ચાલુ જ હતું. આ દરમિયાન પોલીસને એક મહત્વની કડી મળી. શહેરના એ ડિવીઝન પોલીસ સ્ટેશન વિસ્તાર હેઠળ આવતી વેદાંત સોસાયટીમાં રહેતા મોહિત ચૌહાણે મોટોભાઇ સચિન 3 દિવસથી ગૂમ હોવાની ફરિયાદ નોંધાવી હતી. સચિન 3 દિવસથી ગૂમ હતો. જ્યારે માનવ અંગો મળવાનું પણ 3 દિવસથી જ શરૂ થયું હતું એટલે પોલીસે આ બન્ને ઘટનાઓનો તાળો મેળવ્યો. આ બન્ને ઘટનાઓનું એકબીજા સાથે કોઇ કનેક્શન હોવાનું લાગ્યું. સામાન્ય રીતે જ્યારે કોઇ અજાણી લાશ મળે ત્યારે પોલીસ આસપાસના વિસ્તારમાંથી જે લોકો ગૂમ થયા હોય તેના પર વધુ ફોકસ કરતી હોય છે. આ કેસમાં પણ એવું જ થયું. પોલીસે જ્યારે કપાયેલું માથું મોહિતને બતાવ્યું ત્યારે મોહિતને આંચકો લાગ્યો. તે અવાચક થઇ ગયો. તેની આંખમાંથી આંસુ સરી પડ્યા. તે રડતાં-રડતાં બોલ્યો- હા સાહેબ, આ મારો ભાઇ સચિન જ છે વધુ ખાતરી કરવા માટે પોલીસે જે હાથ મળી આવ્યા હતા તે મોહિતને બતાવ્યા. હાથ પર ટેટૂ હતું. મોહિતે તેની પણ ઓળખ કરી અને કહ્યું કે આ હાથ મારા ભાઇના જ છે. પોલીસ માટે હવે પહેલો કોયડો ઉકેલાઇ ગયો હતો. લાશની ઓળખ થઇ ચૂકી હતી પણ બીજા સવાલો હજુ પણ મોંઢું ફાડીને ઊભા હતા. સચિનની આવી ઘાતકી હત્યા કોણે અને શા માટે કરી હતી? પોલીસે જ્યારે મોહિતને પૂછ્યું કે તને કોઇના પર શંકા છે? ત્યારે તેણે જે નામ આપ્યું તે આશ્ચર્યજનક હતું. આ નામ શૈલેન્દ્રસિંહ ચૌહાણનું હતું. આ શૈલેન્દ્ર બીજું કોઇ નહીં પણ સચિનનો ખાસ મિત્ર હતો. બંને દિવસ-રાત સાથે રહેતા. ઘણા લોકો તો તેમને મિત્રો નહીં પણ ભાઇઓ જ માનતા હતા. હવે પોલીસને શૈલેન્દ્રની શોધ હતી. જો તે પકડાય તો આખો કેસ ચપટી વગાડતાંમાં જ ઉકલી જશે તેવું પોલીસને લાગ્યું. પોલીસે શૈલેન્દ્રના ઘરે દરોડા પાડ્યા પણ તે મળ્યો નહીં. સચિનના પરિવારની સાથે રહેવાને બદલે શૈલેન્દ્ર ભરૂચ છોડીને જતો રહ્યો હતો. જતાં-જતાં એવું કહેતો ગયો હતો કે મારા કાકાનું મૃત્યુ થયું છે એટલે હું બહારગામ જઉં છું. લાશનું મળવું અને શૈલેન્દ્રનું ગાયબ થવું શું આ કોઇ યોગાનુયોગ હતો કે પછી જાણી જોઇને રમાઇ રહેલી રમત હતી? શું ખરેખર શૈલેન્દ્રએ જ પોતાના મિત્ર સચિનની આવી ઘાતકી હત્યા કરી હતી? આ સવાલોના જવાબ મેળવવા જુઓ ગુજરાત ક્રાઇમ ફાઇલ્સનો બીજો એપિસોડ.