મેયર નક્કી કરવા આજથી 3 દિવસ ભાજપના નિરીક્ષકો સેન્સ લેશે:ધારાસભ્યો-કોર્પોરેટરને મળશે, પાર્લામેન્ટ્રી બોર્ડ 6 મે બાદ ગમે ત્યારે મેયરથી લઈ સ્ટે.કમિટીના ચેરમેનના નામ પર મારશે મહોર

ગત 28 એપ્રિલે જાહેર થયેલા સ્થાનિક સ્વરાજની ચૂંટણીના પરિણામોમાં ભાજપે તમામ 15 મહાનગરપાલિકામાં સત્તા હાંસલ કરી છે. આગામી સમયમાં મેયર સહિતના મુખ્ય પાંચ પદાધિકારીની નિમણૂક થવાની છે. મેયર સહિતના પદાધિકારીઓ નક્કી કરવા માટે અમદાવાદ, સુરત, રાજકોટ, ભાવનગર અને મહેસાણામાં ધારાસભ્યો અને કોર્પોરેટર સહિતના શહેર સંગઠનના નેતાઓ સાથે પ્રદેશના નેતાઓ દ્વારા સેન્સ લેવામાં આવશે અને મેયર તરીકેના નામો આપવામાં આવશે. જે પ્રદેશ પાર્લામેન્ટરી બોર્ડમાં જશે અને ત્યારબાદ મ્યુનિસિપલ કમિશનર દ્વારા પ્રથમ સામાન્ય સભા બોલાવવામાં આવશે જેમાં મેયર, ડેપ્યુટી મેયર અને સ્ટેન્ડિંગ કમિટીના ચેરમેનના નામની જાહેરાત થશે. ભાજપના પ્રદેશ પ્રમુખ જગદીશ વિશ્વકર્માએ નિમેલા નિરીક્ષકો 1 થી 3 મે દરમિયાન મહાનગરપાલિકાઓ, જિલ્લા પંચાયતો, નગરપાલિકાઓ તેમજ તાલુકા પંયાચતોમાં ચૂંટાયેલા ભાજપના જન પ્રતિનિધિઓને મળીને કોને મેયર અને પ્રમુખપદ સહિતના હોદ્દા આપવા તે અંગે રજૂઆતો સાંભળશે. આ સેન્સ પ્રક્રિયા અંગેનો અહેવાલ પ્રદેશ મોવડીમંડળને અપાયા પછી 4, 5 અને 6 મે એમ ત્રણ દિવસ માટે ગુજરાત ભાજપ પાર્લામેન્ટરી બોર્ડની બેઠક મળે એવી શક્યતા છે. મ્યુનિસિપલ કમિશનર સામાન્ય સભામાં મેયરની જાહેરાત કરશે પ્રદેશ પાર્લામેન્ટ્રી બોર્ડમાં રાજ્યની 15 મહાનગરપાલિકા માટેના મેયર પદના દાવેદારના નામો પર ચર્ચા કરવામાં આવશે અને દરેક મહાનગરપાલિકા માટે મેયરના નામના કવર બનાવીને જે તે શહેર પ્રમુખ અથવા પ્રભારીને આપવામાં આવશે. ગુજરાત સરકાર દ્વારા મ્યુનિસિપલ કોર્પોરેશનના ચૂંટાયેલા પ્રતિનિધિઓ અંગેનું જાહેરનામું બહાર પાડવામાં આવશે જે બાદ મ્યુનિસિપલ કમિશનર દ્વારા પ્રથમ સામાન્ય સભા બોલાવવામાં આવશે જેમાં મેયર, ડેપ્યુટી મેયર અને સ્ટેન્ડિંગ કમિટીના ચેરમેનની જાહેરાત કરવામાં આવશે. સ્થાનિક સ્વરાજ્યની ચૂંટણીઓમાં 15 મનપામાં ભાજપનો ભવ્ય વિજ્ય થયો છે, પરંતુ હવે ખરો ખેલ શરૂ થયો છે 'મેયર' પદ માટે. તો આવો ભાસ્કર પર જોઇએ 15 મનપામાં મેયર-ડે.મેયર ને સ્ટેન્ડિંગ ચેરમેનના સંભવિત નામ અને ફોટો. અમદાવાદમાં મેયર પદ OBC પુરુષ માટે અનામત સ્થાનિક સ્વરાજ્યની ચૂંટણીઓમાં અમદાવાદ મહાનગરપાલિકામાં ભાજપનો ભવ્ય વિજય થયો છે. 160 બેઠકો મેળવીને અમદાવાદ મ્યુનિસિપલ કોર્પોરેશનમાં ભાજપની સત્તા ફરી આવી છે ત્યારે સૌથી મોટી મહાનગરપાલિકા અમદાવાદમાં નગરપતિ એવા મેયર, ડેપ્યુટી મેયર, સ્ટેન્ડિંગ કમિટી ચેરમેન, શાસક પક્ષના નેતા અને દંડક કોણ બનશે તે અંગે ચર્ચા શરૂ થઈ ચૂકી છે. પ્રથમ અઢી વર્ષની ટર્મ માટે મેયર પદ OBC પુરુષ માટે અનામત છે. અનુભવી અને સિનિયર રહી ચૂકેલા કોર્પોરેટરને મેયર બનાવવામાં આવતા હોય છે. જ્યારે સ્ટેન્ડિંગ કમિટીના ચેરમેન તરીકે પણ અનુભવી અને નિર્ણય લઇ શકે એવા લોકોને પદ મળે છે. મેયર પદ માટે થલતેજ વોર્ડના પૂર્વ સ્ટેન્ડિંગ કમિટીના ચેરમેન મજબૂત દાવેદાર ભાજપના સૂત્રો પાસેથી મળતી માહિતી મુજબ અમદાવાદ મહાનગરપાલિકામાં મુખ્ય પાંચ પદાધિકારીઓ માટે અનેક અનુભવી અને સિનિયર લોકોથી લઈને પ્રથમ વખત ચૂંટણી લડેલા લોકો પણ દાવેદાર છે. માત્ર મેયર પદ રોટેશન પ્રમાણે OBC પુરુષ માટે અનામત હોવાથી મેયર તરીકે પુરુષને સ્થાન મળશે. મેયર પદ માટે થલતેજ વોર્ડના કોર્પોરેટર અને પૂર્વ સ્ટેન્ડિંગ કમિટીના ચેરમેન હિતેશ બારોટ મજબૂત દાવેદાર છે. પ્રથમ વખત ચૂંટણી લડેલા બોડકદેવના કોર્પોરેટર ધરમશી દેસાઈ પણ દાવેદાર છે જ્યારે નિકોલ વોર્ડના સૌથી વધુ મત મેળવેલા દીપક પંચાલ પણ મેયર પદ માટે રેસમાં છે. વેજલપુર વોર્ડના સિનિયર કોર્પોરેટર રાજુ ઠાકોરને પણ દાવેદાર માનવામાં આવી રહ્યાં છે. ડેપ્યુટી મેયર માટે 8 દાવેદાર સામાન્ય રીતે જો મેયર પદ પર પુરુષ હોય તો મહિલા ડેપ્યુટી મેયર અને મેયર મહિલા હોય તો ડેપ્યુટી મેયર પુરુષ તરીકે મૂકવામાં આવતા હોય છે. મેયર પદ પર પુરુષ હોવાના પગલે ડેપ્યુટી મેયર તરીકે મહિલા મુકાઈ શકે છે. ડેપ્યુટી મેયર પદના દાવેદાર તરીકે લાંભા વોર્ડના ડો. ચાંદની પટેલ, સાબરમતી વોર્ડના અંજુબેન શાહ, રાણીપ વોર્ડના ભાવિ પંચાલ, અસારવા વોર્ડના અનસુયા પટેલ નરોડા વોર્ડના દિવ્યાબેન નિકુંજ ખાખી, સરદારનગર વોર્ડના ડિમ્પલ વરિંદાની, ઓઢવના મીના રઘુવેન્દ્ર ઠાકોર અથવા વિલાસબેન દેસાઈ છે. વસ્ત્રાલ વોર્ડના કોર્પોરેટરને પણ ચેરમેન પદ માટે દાવેદાર મનાય છે સ્ટેન્ડિંગ કમિટીના ચેરમેન તરીકે મજબૂત દાવેદારમાં પાલડી વોર્ડના જૈનિક વકીલ છે. બોડકદેવ વોર્ડના કોર્પોરેટર અને પૂર્વ સ્ટેન્ડિંગ કમિટીના ચેરમેન દેવાંગ દાણીને ફરી કમાન સોંપાઈ શકે છે. સ્ટેન્ડિંગ કમિટી ચેરમેન તરીકે પાટીદાર ચહેરાઓ ખૂબ દાવેદાર છે. શહેરના પૂર્વ મહામંત્રી અને નિકોલ વોર્ડના પરેશ લાખાણીને પણ અનુભવી હોવાના પગલે સ્ટેન્ડિંગ કમિટીનું ચેરમેન પદ મળી શકે છે. જોધપુર વોર્ડના કોર્પોરેટર વિનોદ પટેલ અથવા ભાગ્યેશ પટેલ અને વસ્ત્રાલ વોર્ડના કોર્પોરેટર પરેશ પટેલ ચેરમેન પદમાં દાવેદાર માનવામાં આવે છે. શાસક પક્ષના નેતા માટે 4 અને દંડક તરીકે 3 દાવેદાર શાસક પક્ષના નેતા તરીકે સ્ટેડિયમ વોર્ડના કોર્પોરેટર જીતેન્દ્રભાઈ ખચરિયા, ઘાટલોડિયા વોર્ડના પ્રવીણ અંબાલાલ પટેલ, વિરાટનગરના મુકેશ પટેલ, શાહીબાગ વોર્ડના જશુભાઈ ઠાકોર સહિતના નેતાઓ દાવેદાર માનવામાં આવી રહ્યા છે જ્યારે દંડક તરીકે ખોખરા વોર્ડના નયન બ્રહ્મભટ્ટ, ઠક્કરબાપાનગરના રણજીતસિંહ વાળા, શાહપુર વોર્ડના હિતેન્દ્ર બાબુભાઈ પરમાર સહિતના નેતાઓ દાવેદાર માનવામાં આવી રહ્યા છે. પ્રદેશના નેતાઓ દ્વારા મુખ્ય ત્રણ નામ મોકલાશે અમદાવાદ મ્યુનિસિપલ કોર્પોરેશનમાં ભાજપે ફરી સત્તા મેળવી છે અને 159માંથી એક બેઠક વધારીને 160 બેઠક પર વિજય મેળવ્યો છે, જેમાં મેયર સહિત મુખ્ય પાંચ પદાધિકારીઓની નિમણૂક કરવામાં આવનાર છે, આગામી એક અઠવાડિયામાં મુખ્ય પાંચ પદાધિકારીઓની જાહેરાત સામાન્ય સભામાં કરવામાં આવશે. મેયર પદના નામ માટે શહેર ભાજપ સંગઠન તરફથી નામો પ્રદેશ પાર્લામેન્ટરી સુધી આપવામાં આવશે અને ત્યારબાદ પ્રદેશના નેતાઓ દ્વારા નામો આપવામાં આવશે. મુખ્ય ત્રણ નામ મોકલવામાં આવશે, જેમાંથી એક નામ પર મહોર વાગશે. સુરતમાં મેયર પદ માટે સામાન્ય મહિલા અનામત સુરત મહાનગરપાલિકાની ચૂંટણીના પરિણામોએ ફરી એકવાર સાબિત કરી દીધું છે કે સુરત ભાજપનો અજેય ગઢ છે. 120માંથી 115 બેઠકો જીતીને ભાજપે વિપક્ષના સૂપડા સાફ કરી દીધા છે. પરંતુ હવે ખરો ખેલ શરૂ થયો છે 'મેયર' પદ માટે. આ વખતે મેયર પદ 'સામાન્ય મહિલા' માટે અનામત હોવાથી અનેક નામો ચર્ચામાં છે. ખાસ કરીને વરાછા અને કતારગામ જેવા પાટીદાર બહુલ વિસ્તારોમાં ભાજપના શાનદાર પ્રદર્શનને જોતા પાટીદાર મહિલાને મેયર બનાવવાની પ્રબળ શક્યતા સેવાઈ રહી છે. જોકે, દક્ષિણ ગુજરાતના સ્થાનિક 'સુરતી' અને 'પરપ્રાંતીય' મતોને સાચવવા ભાજપ હાઈકમાન્ડ માટે આ નિર્ણય લોઢાના ચણા ચાવવા જેવો સાબિત થશે. ઉર્વશી પટેલ કે કાવ્યા પટેલ બનશે મેયર? વરાછા અને પુણા વિસ્તારમાં જે રીતે ભાજપે આ વખતે ક્લીન સ્વીપ કર્યું છે, તે જોતા પાટીદાર સમાજને અન્યાય ન થાય તે માટે પાર્ટી ગંભીરતાથી વિચારી રહી છે. ગત ચૂંટણીમાં આમ આદમી પાર્ટીનો જે દબદબો હતો તેને આ વખતે ભાજપે તોડી પાડ્યો છે. આ વિજયના ઇનામ તરીકે પાટીદાર મહિલા ચહેરાને મેયર પદ મળી શકે છે. જેમાં ઉર્વશી પટેલ, કાવ્યા પટેલ અને જયશ્રી વરિયાના નામો સૌથી મોખરે છે. પાર્ટીના આંતરિક સૂત્રો મુજબ, જો પાટીદાર ચહેરાને મેયર બનાવવામાં આવે તો અન્ય મહત્વના પદો પર 'સુરતી' અથવા 'પરપ્રાંતીય' સભ્યોને સ્થાન આપી સંતુલન જાળવવામાં આવશે. મેયર પદ માટે જામ્યો અસલી જંગ સુરત એક એવું શહેર છે જ્યાં ભાષા અને પ્રાંતનું વૈવિધ્ય જોવા મળે છે. આ વખતે મેયર પદ માટે સુરતી અને નોન- સુરતી વચ્ચે કાંટે કી ટક્કર છે. જો ભાજપ 'સુરતી કાર્ડ' રમે તો નેન્સી શાહ, પ્રતિભા દેસાઈ, મનીષા આહીર અને ડિમ્પલ કાપડિયા, જયશ્રી વરિયા રેસમાં સૌથી આગળ છે. આ મહિલા કોર્પોરેટરો પાસે સંગઠનનો બહોળો અનુભવ છે. બીજી તરફ, સુરતમાં વસતા લાખો પાટીદારો મતોને ધ્યાને રાખીને સાથે આ વખતે પાટીદાર વિસ્તારમાં ભવ્ય વિજય ના કારણે પાટીદાર સમાજની પણ મહિલા મેયર બની શકે છે. ડેપ્યુટી મેયર પદ માટે ઓબીસી અને પરપ્રાંતીય ચહેરાઓ પર નજર બીજી તરફ, સુરતમાં વસતા કરોડો પરપ્રાંતીયોના મતોને ધ્યાને રાખીને રાજસ્થાની કે ઉત્તર ભારતીય ચહેરાને પણ મેયર કે ડેપ્યુટી મેયર પદ પર બેસાડવાની વિચારણા ચાલી રહી છે, જેથી આગામી વિધાનસભા અને લોકસભા ચૂંટણીમાં તેનો સીધો ફાયદો મળી શકે. મેયર પદ મહિલા માટે અનામત હોવાથી ડેપ્યુટી મેયર પદ પર કોઈ સક્ષમ પુરુષ ઉમેદવારને બેસાડવામાં આવશે. આ પદ માટે ખાસ કરીને પરપ્રાંતીય અને ઓબીસી (OBC) મતોને અંકે કરવાના પ્રયાસો થશે. અત્યારે ડેપ્યુટી મેયરની રેસમાં સુધાકર ચૌધરી, ભાઈદાસ પાટીલ, પંકજ જાદવ, દીનાનાથ મહાજન અને દિનેશ રાજપુરોહિતના નામો ચર્ચાઈ રહ્યા છે. ખાસ કરીને લિંબાયત અને ઉધના વિસ્તારમાં પરપ્રાંતીયોનું વર્ચસ્વ હોવાથી આમાંથી કોઈ એક નામ પર મહોર લાગી શકે છે. સંજય પાટીલનું નામ પણ મરાઠી મતોના પ્રતિનિધિત્વ તરીકે ચર્ચામાં છે. સ્ટેન્ડિંગ કમિટીના ચેરમેન પદ માટે ભારે ખેંચતાણ સુરત મહાનગરપાલિકામાં મેયર કરતા પણ પાવરફુલ ગણાતા સ્ટેન્ડિંગ કમિટીના ચેરમેન પદ માટે ભારે ખેંચતાણ જોવા મળી રહી છે. આ પદ પર અનુભવી અને આર્થિક પાસાઓને સમજનાર વ્યક્તિની જરૂર હોય છે. આ રેસમાં પૂર્વ મેયર દક્ષેશ માવાણી ફરી એકવાર શક્તિશાળી દાવેદાર તરીકે ઉભર્યા છે. તેમની સાથે પૂર્વ સ્ટેન્ડિંગ કમિટીના ચેરમેન રાજન પટેલ અને મહેન્દ્ર દેસાઈના નામો પણ જોરશોરથી બોલાઈ રહ્યા છે. પાટીદાર ફેક્ટરને સંતોષવા માટે રઘુ કુંત કે ધર્મેશ ભાલાળાને પણ આ મહત્વની જવાબદારી સોંપવામાં આવી શકે છે. શાસક પક્ષના નેતા તરીકે મહિલા શક્તિને પ્રાધાન્ય આપવાની તૈયારી સુરત મનપાના ઇતિહાસમાં આ વખતે શાસક પક્ષના નેતા તરીકે મહિલાઓની સક્રિયતા વધવાની છે. ભાજપ શિસ્તબદ્ધ પાર્ટી હોવાથી અહીં અનુભવને વધુ મહત્વ આપવામાં આવે છે. શાસક પક્ષ નેતા તરીકે સુધા પાંડે, રશ્મિ સાબુ અને રીના રાજપૂતના નામ રેસમાં છે. આ ત્રણેય મહિલાઓ પરપ્રાંતીય સમાજનું પ્રતિનિધિત્વ કરે છે, જે ભાજપની 'સર્વસમાવેશક' રાજનીતિનો ભાગ હોઈ શકે છે. જો મેયર પદ ગુજરાતી મહિલાને જાય, તો શાસક પક્ષ નેતા તરીકે ચોક્કસપણે કોઈ બિન-ગુજરાતી મહિલાને પ્રાધાન્ય આપવામાં આવશે. પાટીદાર અને પરપ્રાંતીય વિસ્તારોને મળશે પ્રતિનિધિત્વ આ ચૂંટણીમાં ભાજપને સૌથી વધુ લીડ પાટીદાર અને પરપ્રાંતીય બહુલ વિસ્તારોમાંથી મળી છે. વરાછા, કતારગામ, લિંબાયત અને પાંડેસરા જેવા વિસ્તારોમાં ભાજપના ઉમેદવારોએ હજારો મતોની સરસાઈ મેળવી છે. રાજકીય વિશ્લેષકોનું માનવું છે કે, આ વખતે ભાજપ કોઈ એક જ્ઞાતિને બદલે 'રીજનલ બેલેન્સ' પર વધુ ભાર મૂકશે. રાજસ્થાની સમાજ અને ઉત્તર ભારતીય સમાજને વહીવટમાં ભાગીદારી આપીને ભાજપ સુરતને મિની ઇન્ડિયા તરીકે રજૂ કરવા માંગે છે. આથી જ ડેપ્યુટી મેયર કે સ્ટેન્ડિંગ કમિટીમાં એકાદ રાજસ્થાની કે હિન્દી ભાષી ચહેરો નિશ્ચિત મનાય છે. રાજકોટમાં પાટીદાર કે બ્રાહ્મણને મેયર પદ મળી શકે રાજકોટ મહાનગર પાલિકામાં આ વખતે મેયર પદ માટે સામાન્ય અનામત હોવાથી ભારતીય જનતા પાર્ટી પાટીદાર અથવા બ્રાહ્મણ સમાજને સ્થાન આપે તેવી પુરી શક્યતા સેવાઈ રહી છે. તેમાં પણ આવનાર વિધાનસભાની ચૂંટણીને ધ્યાનમાં રાખી મેયર પદ પર પ્રથમ પાટીદારને જ મહત્વ આપવામાં આવ તેવી શક્યતા સેવાઈ રહી છે. જો કે સરકાર અને સંગઠન દ્વારા અન્ય તમામ જગ્યા પર જ્ઞાતિ આધારિત સમીકરણો નક્કી કરી આ માટે ફાઇનલ નિર્ણય લેવામાં આવશે. સ્ટેન્ડિંગ કમિટી ચેરમેન ઓબીસી સમાજમાંથી બની શકે રાજકોટમાં મેયર પદ માટે પાટીદાર સમાજમાંથી મેયર તરીકે જાહેરાત કરવામાં આવે તો કેતન પટેલ, દિલીપ લુણાગરિયા અથવા પરેશ પીપળીયાને સ્થાન આપવામાં આવી શકે છે અને બ્રાહ્મણ સમાજમાંથી બનાવવામાં આવે તો નેહલ શુકલા, પરેશ ઠાકર અને મનીષ ભટ્ટનું નામ ચર્ચામાં ચાલી રહ્યું છે. જયારે સ્ટેન્ડિંગ કમિટી ચેરમેન પદ પર ઓબીસી સમાજને સ્થાન આપવામાં આવ તેવી શક્યતા સેવાઈ રહી છે અને તેમાં ઘનશ્યામ હેરભા અથવા પૂર્વ મેયર ડો. પ્રદિપ ડવને સ્થાન આપવામાં આવે તેવી શક્યતા સેવાઈ રહી છે. ડેપ્યુટી મેયર પદ માટે કોઈ મહિલાને સ્થાન આપવામાં આવે તેવી શક્યતા સેવાઈ રહી છે. મહેસાણા મનપામાં મેયર પદની રેસમાં નયના પ્રજાપતિ, મિતલ પ્રજાપતિ, ઉષા ચૌધરી મહેસાણા મહાનગરપાલિકાની ચૂંટણી પ્રક્રિયા પૂર્ણ થતાની સાથે જ હવે સ્થાનિક રાજકારણમાં નવા પદાધિકારીઓની વરણીને લઈને ગરમાવો આવ્યો છે, જેમાં મેયર, ડેપ્યુટી મેયર અને ચેરમેન પદ માટે કોના નામ પર મહોર લાગશે તે અંગે સૌની નજર ટકેલી છે. મેયર પદની રેસમાં નયના પ્રજાપતિ, મિતલ પ્રજાપતિ અને ઉષા ચૌધરીના નામ ચર્ચામાં છે. ડેપ્યુટી મેયર પદ માટે રાકેશ બારોટ, ધીરજ કરમચંદાણી અને રાકેશ પટેલના નામ અગ્રણી માનવામાં આવે છે. આ ઉપરાંત, સ્ટેન્ડિંગ ચેરમેન પદ માટે દીપક પટેલનું નામ સૌથી વધુ ચર્ચાઈ રહ્યું છે, જેઓ અગાઉ કારોબારી સમિતિમાં સફળતાપૂર્વક પોતાની સેવાઓ આપી ચૂક્યા હોવાથી સંગઠનમાં અનુભવી અને મજબૂત દાવેદાર તરીકે જોવામાં આવે છે. ભાવનગરમાં મેયર પદ સામાન્ય મહિલા અનામત ભાવનગર મહાનગરપાલિકામાં સત્તાનું સુકાન કોણ સંભાળશે તેને લઈને અટકળો તેજ બની છે, છેલ્લા ત્રણ દાયકાથી ભાજપના ગઢ ગણાતા ભાવનગરમાં આ વખતે મેયર પદ સામાન્ય સ્ત્રી અનામત ફાળવવામાં આવ્યું હોવાથી મહિલા કોર્પોરેટરોમાં આંતરિક સ્પર્ધાએ જોર પકડ્યું છે. ​મેયર પદ માટે મહિલા નેતાઓ વચ્ચે રસાકસી ​આ વર્ષે મેયર પદ મહિલા અનામત હોવાથી જ્ઞાતિગત સમીકરણો પણ મહત્વના બન્યા છે. ક્ષત્રિય, બ્રાહ્મણ અને પટેલ સમાજની મહિલા નેતાઓના નામ હાલ ચર્ચાના ચગડોળે ચડ્યા છે, જેમાં ​વર્ષાબા વિક્રમસિંહ પરમાર જે કાળીયાબીડ વોર્ડના ક્ષત્રિય મહિલા ઉમેદવાર વર્ષાબાનું નામ હાલ મેયર પદની રેસમાં સૌથી પ્રબળ માનવામાં આવી રહ્યું છે. તેમજ હીરાબેન વિનોદભાઈ કુકડીયા જે ચિત્રા-નારી વોર્ડના પટેલ સમાજના અગ્રણી મહિલા નેતા પણ મજબૂત દાવેદાર ગણાય છે જે સતત બે ટર્મથી જીત મેળવતા આવે છે, ​અન્ય દાવેદારોમાં દક્ષાબેન નિલેશભાઈ ભટ્ટ બ્રાહ્મણ સમાજના નામો પણ પક્ષના આંતરિક વર્તુળોમાં ચર્ચાઈ રહ્યા છે.