જેમને કપડાં ઉતારીને ફેરવી, તે મણિપુરની યુવતીઓ ક્યાં ગઈ?:3 વર્ષથી સુનવણી ચાલુ, પીડિતાએ કહ્યું- જીવતી છું, પણ દુનિયા મને ભૂલી ગઈ

આશરે 3 વર્ષ પહેલાં. વર્ષ 2023નો જુલાઈ મહિનો. મણિપુરમાં મૈતેઈ અને કુકી સમુદાય વચ્ચે ચાલી રહેલી હિંસા સાથે જોડાયેલો એક વીડિયો સામે આવ્યો. વીડિયોમાં બે છોકરીઓ હતી, જેમની ન્યૂડ પરેડ કરવામાં આવી રહી હતી. આ વીડિયોએ સમગ્ર દેશને હચમચાવી દીધો. મણિપુરમાં હિંસા તો 3 મેથી શરૂ થઈ ગઈ હતી, પરંતુ આ દરમિયાન આવી નૃશંસતા થઈ હશે, તેવું કોઈએ વિચાર્યું નહોતું. આ ઘટના મૈતેઈ વસ્તી ધરાવતા થૌબલ જિલ્લામાં 4 મે, 2023ના રોજ બની હતી. મામલો સુપ્રીમ કોર્ટ પહોંચ્યો. વીડિયો બતાવવા પર પ્રતિબંધ લગાવી દેવામાં આવ્યો. જુલાઈ, 2023માં CBIને તપાસ સોંપવામાં આવી. આ પછી પણ એ ઘટનાનું પૂરું સત્ય સામે આવ્યું નહીં. ન તો એ નૃશંસતાની પીડાની કોઈને ખબર પડી. 26 ફેબ્રુઆરી, 2026ના રોજ સુપ્રીમ કોર્ટે CBIને આદેશ આપ્યો કે તે પીડિત પરિવારોને ચાર્જશીટ આપે. 24 માર્ચના રોજ આ કેસની આગામી સુનાવણી થશે. દૈનિક ભાસ્કરે કોર્ટમાં દાખલ CBIની 47 પેજની ચાર્જશીટની તપાસ કરી. અમે પહેલીવાર એ બે છોકરીઓના નિવેદન પરથી તે દિવસની આપવીતી જણાવીશું. એ પણ જણાવીશું કે જે બે છોકરીઓ સાથે નૃશંસતા થઈ, તેમની જિંદગી હવે કેવી રીતે પસાર થઈ રહી છે. આ ઘટનાની એકમાત્ર સાક્ષી મહિલા હવે ક્યાં છે. તેઓ તે દિવસે કેવી રીતે ભીડથી બચી નીકળી હતી. ‘ભીડે ગામ પર હુમલો કર્યો, પોલીસ હાજર હતી, પરંતુ મદદ કરી નહીં’ CBIની ચાર્જશીટમાં ત્રણ મહિલાઓનો ઉલ્લેખ છે. તેમને વિક્ટિમ નંબર 1, 2 અને 3 નામ આપવામાં આવ્યા છે. ન્યૂડ પરેડના વીડિયોમાં દેખાતી મહિલાઓ વિક્ટિમ નંબર 1 અને 2 છે. આ ઘટના બી. ફેનમ ગામમાં બની હતી. ઘટનાની વિગતો પેજ નંબર 10 થી શરૂ થાય છે. આરોપ છે કે મૈતેઈ સમુદાયના લોકોએ બપોરે આશરે 3 વાગ્યે કુકી અને જો સમુદાયના ઘરો પર હુમલો કર્યો હતો. તેમની પાસે રાઇફલ, લાકડી, કુહાડી અને છરીઓ હતી. ભીડે ઘરો અને ચર્ચમાં આગ લગાવી દીધી. ગામના લોકો છુપાવવા માટે જંગલો તરફ ભાગ્યા. આમાં જ ત્રણ પુરુષો, ત્રણ મહિલાઓ અને અઢી વર્ષની એક બાળકી પણ હતી. બધા જંગલમાં છુપાયા હતા, પરંતુ ભીડે તેમને જોઈ લીધા. એક-એક કરીને જંગલમાં છુપાયેલા તમામ લોકોને બહાર કાઢવામાં આવ્યા. મહિલાઓ અને પુરુષોને અલગ-અલગ કરી દીધા. ભીડે પુરુષોને નિર્દયતાથી માર માર્યો. જોકે, આ જ ભીડમાં સામેલ કેટલાક લોકોની મદદથી 3-4 વિક્ટિમ ગામ પાસે રસ્તાના કિનારે ઉભેલી પોલીસની ગાડી સુધી પહોંચી ગયા. પેજ નંબર 15 પર લખ્યું છે કે ભીડથી બચવા માટે બે છોકરીઓ પોલીસની ગાડીમાં બેસી ગઈ. તેમાં બે પોલીસવાળા અને ડ્રાઈવર હાજર હતા. ગાડીની બહાર 3-4 પોલીસવાળા હતા. એક છોકરીએ ડ્રાઈવરને કહ્યું કે જલ્દી ગાડી સ્ટાર્ટ કરો. ડ્રાઈવરે જવાબ આપ્યો કે મારી પાસે ચાવી નથી. પીડિતાઓએ ઘણી વખત મદદ માંગી, પરંતુ પોલીસ પાસેથી મદદ મળી નહીં. ભીડ બૂમો પાડીને પોલીસવાળાઓને કહી રહી હતી કે આમને પાછા સોંપો. થોડી વાર પછી ભીડ વધવા લાગી. બંને છોકરીઓને વાળ પકડીને ગાડીમાંથી બહાર ખેંચી કાઢી. ભીડ જોઈને પોલીસવાળા ભાગી ગયા. ભીડે છોકરીઓના કપડાં ફાડી નાખ્યા. તેમને કપડાં વગર રસ્તા પર ફેરવી. ચાર્જશીટના પેજ નંબર-16 પર છોકરીઓ સાથે થયેલી નૃશંસતાનો સંપૂર્ણ ઉલ્લેખ છે. ભીડમાંથી કેટલાક લોકોએ છોકરીઓને કહ્યું કે તમારા કપડાં ઉતારો, નહીં તો તમને જીવતી સળગાવી દઈશું. વિક્ટિમ 1 ના ભાઈ અને પિતાએ તેને બચાવવાનો પ્રયાસ કર્યો, તો ભીડે લાકડીઓ અને કુહાડીથી હુમલો કરી તેમની હત્યા કરી દીધી. આ પછી છોકરીઓના કપડાં ફાડવાનું શરૂ કરી દીધું. આ દરમિયાન વિક્ટિમ નંબર-1 એ ભીડમાં સામેલ અરુણ ખુંડોનગબમ અને લોયાને ઓળખી લીધા. લોયાએ જ તેના પરિવારના પુરુષ સભ્યોને ખરાબ રીતે માર્યા હતા. ચાર્જશીટમાં આગળ લખ્યું છે, ભીડમાં સામેલ લોકો બંને છોકરીઓના બ્રેસ્ટ ટચ કરી રહ્યા હતા. તેમને પીંખી રહ્યા હતા. વિક્ટિમ નંબર-1 ના પ્રાઇવેટ પાર્ટને અડી રહ્યા હતા. વારંવાર થપ્પડ મારી રહ્યા હતા. આ દરમિયાન આરોપી વિક્ટિમ નંબર-1 ને ખેતરમાં લઈ ગયા. તેનું ગળું દબાવવાનો પ્રયાસ કર્યો. તેની સાથે ગેંગરેપ કર્યો. આરોપીઓએ કહ્યું- જેણે રેપ કરવો હોય, ખેતરમાં આવી જાય CBIએ ઘટનાની બીજી વિક્ટિમનું નિવેદન પણ નોંધ્યું છે. વિક્ટિમ નંબર-2 વિશે ચાર્જશીટમાં લખ્યું છે- આરોપીઓએ કહ્યું કે જીવ બચાવવા માટે તમારી પાસે એક જ રસ્તો છે. કાં તો જાતે બધા કપડાં ઉતારી દો અથવા અમે પોતે આ કામ કરીશું. આ પછી ભીડે કપડાં ફાડવાનું શરૂ કરી દીધું. આ છોકરીની પણ ન્યૂડ પરેડ કરાવવામાં આવી હતી. વિક્ટિમ નંબર-1 સાથે જ્યાં નૃશંસતા થઈ રહી હતી, તેનાથી થોડે દૂર જ વિક્ટિમ નંબર-2 ને પણ ભીડે ઘેરેલી હતી. ભીડમાંથી કેટલાક લોકો અવાજ લગાવી રહ્યા હતા કે જે લોકોએ આની સાથે રેપ કરવો હોય, તેઓ આવી જાય. આ પછી તેની સાથે ગેંગરેપ કર્યો. આ દરમિયાન વિક્ટિમ બેભાન થઈ ગઈ. ઘણી વાર પછી તેને થોડું ભાન આવ્યું. તેની હાલત ખૂબ જ ખરાબ હતી. વિક્ટિમ નંબર-2 એ જણાવ્યું કે મેં વિક્ટિમ નંબર-1નો ચીસ પાડવાનો અવાજ સાંભળ્યો હતો. તેને જોઈ પણ હતી. તેની આસપાસ ઘણી ભીડ હતી. મેં તે ભીડમાં ચિંગલેન અને ઈનઓતોન નામના બે લોકોને ઓળખી લીધા હતા. આ પછી બંનેને ગામના મેઈન રોડ સુધી કપડાં વગર લાવવામાં આવી હતી. ભીડમાં કેટલાક લોકો છોકરીઓની મદદ કરવા માંગતા હતા. તેમણે બંનેને કપડાં આપવા ઈચ્છ્યા, પરંતુ આરોપીઓએ તેમને ધમકાવ્યા કે ફરી મદદ કરવા આવ્યા તો તમારી પણ હાલત ખરાબ કરીશું. ચાર્જશીટમાં લખ્યું છે કે વિક્ટિમ નંબર-3 પણ ત્યાં પાસે જ હતી. તેણે આખી ઘટના જોઈ હતી. પરિવારના સભ્યોની ડેડબોડી જોઈ, આખી રાત જંગલમાં છુપાયેલી રહી તપાસ અહેવાલ મુજબ, ભીડ બંને છોકરીઓને બીજી જગ્યાએ લઈ જવા લાગી. રસ્તામાં વિક્ટિમ નંબર-2 ને પોતાના કપડાં વેરાયેલા મળ્યા. તેણે કેટલાક કપડાં ઉઠાવી લીધા, પરંતુ ફાટેલા હોવાને કારણે તે પહેરી શકી નહીં. વિક્ટિમ નંબર-1 એ કપડાં પહેરવામાં તેની મદદ કરી. બંને હજુ પણ ભીડથી ઘેરાયેલી હતી. તેમણે હિંમત ભેગી કરીને જીવની ભીખ માંગી. આના પર ભીડે બંનેને છોડી દીધી. બંને થોડી આગળ વધી, તો તેમના પરિવારના બે પુરુષ સભ્યોની લાશો એકબીજાની ઉપર પડેલી જોઈ. થોડે આગળ ગામ પાસે સૂકા નાળામાં વિક્ટિમ નંબર 1 ના ભાઈની ડેડબોડી મળી. તેની ખોપરી ફાટેલી હતી. આસપાસ ઘણા લોકો લાકડી-દંડા અને કુહાડી લઈને ઉભા હતા. કેટલાકના હાથમાં મોટા-મોટા છરા પણ હતા. આ લોકો વિક્ટિમને ઉભેલી જોઈને મારવા માટે દોડ્યા. કેટલાક વડીલોએ ભીડને રોકી દીધી. ભીડનો ગુસ્સો જોઈને છોકરીઓ ઝડપથી જંગલ તરફ ભાગી. આગળ તેમને ગામના બે લોકો મળ્યા. તેમાંથી એકની પાસે ફોન હતો. વિક્ટિમ નંબર-2 એ ફોનથી પોતાના પરિચિતોને ઘટના વિશે જણાવ્યું. આ પછી પગપાળા ચાલતા બંને ઇરોંગ તાંગખુલ ગામ પહોંચી. ત્યાં વિક્ટિમ નંબર-1નો મિત્ર મળી ગયો. તેણે બંનેને પહેરવા માટે કપડાં આપ્યા. ત્યાં ખતરો હતો, તેથી મિત્ર બંને છોકરીઓને જંગલોમાં લઈ ગયો. ત્યાં તેમના સમુદાયના લોકો છુપાયેલા હતા. બંને છોકરીઓએ જંગલમાં જ રાત વિતાવી. તપાસ દરમિયાન સાક્ષીઓએ માન્યું કે બંનેના શરીર પર કપડાં નહોતા. પૌત્રીને લઈને ઘરથી ભાગી, જીવતી છું એટલે બધા ભૂલી ગયા બી. ફેનોમ ગામમાં ભીડે એટેક કર્યો, ત્યારે વિક્ટિમ નંબર 3 ત્યાં જ હાજર હતી. તેણે અઢી વર્ષની પૌત્રીને ઉઠાવી, પીઠ પર બાંધી અને ઘરથી ભાગી. ભીડે તેને ઘેરીને મારવાનો પ્રયાસ કર્યો હતો. કપડાં પણ ખેંચ્યા હતા. હવે આ મહિલા પરિવાર સાથે દિલ્હીમાં રહે છે. અમે તેમની સાથે વાત કરનારા એક સોશિયલ એક્ટિવિસ્ટ પાસેથી વિક્ટિમની આપવીતી જાણી. વિક્ટિમની ઉંમર 55 વર્ષ છે. તે ઘટના વિશે જણાવે છે, ‘એ ડર આજે પણ દિલ અને દિમાગમાં છે. મારી પૌત્રીને પણ બધું યાદ છે. તે સમયે તે અઢી વર્ષની હતી, હવે 5 વર્ષની થઈ ચૂકી છે. તેને પૂછો કે અમે કેવી રીતે ભાગ્યા હતા. તે બધું કહી દેશે.’ વિક્ટિમ જણાવે છે, ‘ન્યૂડ પરેડનો જે વીડિયો વાયરલ થયો હતો, હું એ ઘટનાની સાક્ષી છું. તે દિવસે અમારા ઘરોમાં આગ લગાડવામાં આવી હતી. અમે 10 લોકો બચવા માટે જંગલમાં ભાગ્યા હતા. ભીડે અમને શોધી કાઢ્યા. મને પણ મારી. કદાચ મારી પૌત્રીને જોઈને તેમણે મને છોડી દીધી હતી. જો મારી પૌત્રી ન હોત, તો કદાચ હું પણ જીવતી બચી ન હોત. અથવા મારી સાથે પણ એવી જ હેવાનિયત થઈ હોત.’ ‘હું કેટલાય કિલોમીટર સુધી પૌત્રીને પીઠ પર બાંધીને જંગલ તરફ ભાગતી રહી. આખી રાત જંગલમાં છુપાઈને વિતાવી. બાળકી ભૂખથી રડતી રહી. તે રાત્રે લાગ્યું કે હવે નહીં બચી શકીએ. ભૂખથી જ મરી જઈશું. પછી બીજી સવારે પાસેના એક ગામમાં પહોંચી. એક ખાલી ઘરમાં ખાવાની વસ્તુઓ મળી ગઈ. આ પછી અમે રાહત શિબિરમાં પહોંચ્યા. ત્યાં કેટલાક મહિના રહી. મારો 7 લોકોનો પરિવાર છે. બધાની સાથે દિલ્હી આવી ગઈ. અહીં બે રૂમનું મકાન ભાડે લીધું છે. બધા તેમાં જ રહી રહ્યા છીએ.’ પીડિત આજે પણ ઘરની બહાર નીકળતી નથી, આરોપી પકડાયા, પણ ડર યથાવત્ જે છોકરીઓનો વીડિયો વાયરલ થયો હતો, તેમના વિશે સાક્ષી જણાવે છે, ‘તેઓ અત્યારે મણિપુરમાં જ રહે છે. તે ખોફને કારણે આજે પણ ઘરની બહાર નીકળતી નથી. કોઈની સાથે વાત કરતી નથી. પરિવારના સભ્યો અને નજીકના લોકો સાથે થોડી વાત કરી લે છે. ડર એટલો છે કે આજે પણ કેટલાય દિવસ સુધી જમતી નથી. આ વાતથી પણ ડરે છે કે તે વીડિયો ફરીથી સોશિયલ મીડિયા પર ક્યારેક સામે ન આવી જાય.’ ‘ઘટના પછી સુપ્રીમ કોર્ટના આદેશ પર એક કમિટી બની. 12 લાખ રૂપિયા વળતર મળ્યું, આરોપીઓને જેલમાં મોકલી દેવામાં આવ્યા, પરંતુ આનાથી અમારો દર્દ ખતમ થયો નથી. તેથી હું ક્યારેય મણિપુર પાછી જવા માંગતી નથી. અમે ભલે જીવતા છીએ, પરંતુ બધા અમને ભૂલી ગયા છે. અમને દિલ્હીમાં પણ ઘણી તકલીફ થઈ રહી છે, પરંતુ મણિપુર જવામાં ડર લાગે છે. અમારી પાસે અહીં ઘર નથી.’ ‘મણિપુરમાં અમે ખૂબ ખુશ રહેતા હતા. વર્ષભરનું ડાંગર પકવતા હતા. ચોખા મળતા હતા. તે ઘટના પછીથી મગજ કામ નથી કરતું. બસ ટેન્શન રહે છે. મણિપુર પાછા ગયા, તો એ જ ડરામણી યાદો ફરી તાજી થઈ જશે. તેથી હવે અહીં જ રહેવું છે.’ દૈનિક ભાસ્કરે આ કેસની અપડેટ જાણવા માટે ગૃહ મંત્રાલય અને CBIનો સંપર્ક કર્યો. પહેલા અમે ગુવાહાટીમાં CBI ઓફિસમાં ફોન કર્યો. ત્યાં જણાવવામાં આવ્યું કે મામલો સુપ્રીમ કોર્ટમાં છે, તેથી તેનો જવાબ તમને હેડક્વાર્ટરથી મળશે. અમે દિલ્હીમાં CBI હેડક્વાર્ટરમાં સંપર્ક કર્યો. 9 માર્ચના રોજ CBI અને ગૃહ મંત્રાલયની ઓફિશિયલ ઈમેઈલ આઈડી પર આ સવાલો મોકલ્યા. 1. CBIએ મણિપુર હિંસામાં જેટલી FIR નોંધી છે, તેમાં કેટલા મામલામાં દોષિતોને સજા થઈ શકી છે? 2. ન્યૂડ પરેડ કાઢવાની ઘટનામાં પીડિત પરિવારનો દાવો છે કે તેમને તપાસ સંબંધિત જાણકારી આપવામાં આવતી નથી. આવું કેમ થયું? 3. ઘણા લોકોના નિવેદન નોંધવામાં આવ્યા નથી. આવું કેમ થઈ રહ્યું છે. અત્યાર સુધી આ સવાલોનો જવાબ મળ્યો નથી. જવાબ આવતા જ સ્ટોરી અપડેટ કરવામાં આવશે.